PONGAOPEIYU 3
3
Sardis Lüloumaime hi Seiveyu Chipao
1“Sardis hi buyu lüloumaime vei rakivamai nahi rükhaio:
“Chi haisü Ramai rako anai ea teivuh anai buyu puhvei chipaoe. Enou nevah taosü sü we; ne hrihie touyu zhihsü bue ana newo thaire! 2Südonou kaishulo, alia nehi chu koute buyu taosü teiteinou thaitamo jühinou soutsülo. Daiolouzü Enou nevah taosü Aramai nghojünou liche-a ngaolou moe. 3Südonou ne hi doupeikhai touyu ea nenou choulouyu sü lichokhaio; süsü zülo ea ledalo. Nenou kaishumo louzü, Enou vaomaili büa nehi tavelai, alia Enou daipha hinou ne hi velaisa touyu sü nenou sülai moe. 4Ana Sardis hi buyu neletao hrohinou mai daotuwo louzü puletao vei sabanüh soutei mohie. Puletao nou sahkaa ba-a Eye koa talaitalai, daiolouzü puletao nou süsü souzüe. 5Reih kolouyu puletaoye sü sübüa sabanüh kaanou tupeilai, alia Enou hakia puletao zhihsü ahri larübvü hinou sounghiwu laimoe. Apuo ea puhvei rakivamaitao nghojünou puletao hai Amai baie tea Enou dua paopalai.
6“Nou pfüa buyu puhnou Rako nou lüloumaime taohi pao-a buyu nasü keiloukhaio!
Philadelphia Lüloumaime hi Seiveyu Chipao
7“Philadelphia hi buyu lüloumaime vei rakivamai nahi rükhaio:
“Chi haisü mashee ea checheyu puhvei chipaoe. David vei khareih sü puh hi bue, alia puhnou kikhu houpawu louzü, süsü maitalinoua khulouhoe, alia puhnou süsü khuwu louzü, süsü maitalinoua houpa louhoe. 8Enou nevah taosü süwe. Zhukhaio, maitalinoua khulou hoyu houkhai touyu kikhuli Enou ne nghojühi pokhai peire. Neivei khouko daotu bubaie touyu sü Enou süwe, sütoukhai-a nenou Achi sü poloua Azhihsü bamoe. 9Zhukhaio, Saitan vei me sou-a buyu süolouzü puletao hai Jihudimaie tea paokhai-a chekhao moyu ana dabaiyu puletaoye sü Enou panou ne hi taveloua nephi hinou kou khurülai, alia Enou neye leshiwe touyu sü puletaoye panou süloulai. 10Avei shamea loure chikha nasü nenou zülouyu vanou, Enou neye sü deiphao teiteihi velaiyu veahoyu teilecho süna hinou khaipa peilai. 11E thala-a laire. Maitalinoua nevei veo peirüsü saolou more donou, nehi buyu nasü soutao soua polo. 12Reih kolouyu puhye sü Enou Aramaivei Rathokihi kikali panou soulai, alia süsü thaowu-a puhsü hakia takhai laimoe. Enou puh vahisü Aramai zhih ea rakiva Aramai hinou koulaiyu Aramaivei nuhdu, ashu Jerusalem zhihsü rukhai peilai, alia Enou puh vahisü Avei ashu zhihna-a rükhai peilai.
13“Nou pfüa buyu puhnou Rakonou lüloumaime taohi pao-a buyu nasü keiloukhaio!
Laodikia Lüloumaime hi Seiveyu Chipao
14“Laodikia hi buyu lüloumaime vei rakivamai na hi rükhaio:
“Chi haisü acheche ea chekhaoyu zhopaohsouwo, Ramai nou soukhai touyu teiteivei beihna, Amen puhvei chipaoe. 15Enou nevah taosü süwe; newo kao-a kaomoe, sou-a soumoe. Nenou kaomo louzü souyu sü Enou züpae! 16Ana nenou sou-a soumo, kao-a kaomo lülala baiyu do nou Enou neye Amü hinou süpalaiwulai!” 17Daiolouzü nenou, “Ewo haniwe ea kini alaosou ngaoloue, alia chemoyu hae,” tea paowe. Ana ne sü veahoyu, lelouhoyu, toure hayu, nghichayu ea baitoua laiyu maibaie touyu sü nelahnou sülou mohie. 18Südonou ne hani loure donou mei hinou pothou deiloua kukhai touyu sana, ne baitouyu vanou ahraoyu sü mainou ngaolou more hokhaiyu sabanüh kaa, alia nenou ngaoloure donou ne nghithouhi naloure theadzü sü Ahinou hrüloure donou Enou nehi paodou peiwe. 19Enou leshimai hrülaiye sü zü-a tudee peiwe, südonou lünoutoulo, alia nemah hinou ledalo. 20Zhukhaio, Esü kikhu hinou la-a khouwe; maitalinoua Apaisü chouloua kikhu houpeilouzü Enou puh hisü talouloua puhye koa touzholai, alia puhnou Eye koa touzholai. 21Enou reih koloua Apuoye koa puh vebuh hinou buzhoyu büa, reih kolouyu puhtao hisü Eye koa Avebuh hinou buloure zü nasü Enou peilai.
22“Nou pfüa buyu puhnou Rako nou lüloumaime taohi pao-a buyu nasü keiloukhaio!”
Currently Selected:
PONGAOPEIYU 3: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
