PONGAOPEIYU 4
4
Rakiva nou Rathoyu
1Haiphabü hinou Enou kukhe zho ali hinou Raki vanou kikhuli houkhaitoua ngaoe. Alia Enou raiki chouyu bekhona büa Ahi chipao-a buyu lapai sünanou haibüa paoe, “Haihi tapakhaio, alia hainathai pavu zülaiyu taosü Enou nehi ngaopeilai.” 2Süphabü hinou Esü rako hinou buloure. Alia zhukhaio, raki vanou vebuh ali bua sühisü mai alinou chobua bue. 3Alia sühinou chobua buyu puh zhusü muhtei shoyu Jaspar chuh ea hohoyu sana chuh Karnelia büa va veishoe, alia dainünayu Hira chuh zhu büyu rüraipao alinou vebuh sünaye khahao poa bue. 4Vebuh sünaye sü kukhe vebuh kaidainou sühaopoa bue, alia sütao vahisü tsümai kaidainou chobua bue. Puletao sü sabah nüh kaanou nouwe ea puletao peiva hisü sana vepeirü rüpfüe. 5Vebuh süna hinou tei peivavayu, pairao ea teisüyu kho tyatyali pawe. Alia vebuh süna nghojü hisü mei keivava pfüa buyu meibvü anai bue, sütaosü Ramai vei rako anaitaoe. 6Alia vebuh süna nghojülo hisü leivavathou zhuzhu büyu zai ali bue. Vebuh sünaye sühaopoa, na-zhou, thai-jü hisü, thai-jü hi nghithou nou phoupfüa buyu hrikhaona adai bue. 7Hrikhaona arainasü souveo kuwe, ahai chenasü chode kuwe, asü chena vei zhusü emai zhu küwe; alia adai chenasü zhaopoa buyu lühche kuwe. 8Hrikhaona adai sütao ali linou shouh arou-rou pfüe, alia puletao phaole teitei hisü nghithounou phoutsüpfüa bue, alia puletao nou sokhaimoa khei-hea nou haibüa lousouwe:
“Mashee, mashee, mashee, raiki nou buyu, chuchu buyu
alia thaikhai hi velaiyu puhsü Khoukhoulai Ramai Mapaowo süe.”
9Alia hrikhaona sütaonou teisanou hria vebuh hinou buyu puh hi adusho, tsükhouyu ea kalo pao-a lou souyu tsühsü, 10tsümai kaidai sütaonou vebuh hinou buyu puh nghojü nou kou kaoloua teisa nou hria buyu puhye sü khurüwe. Puletao nou puletao vei veo peirü taosü vebuh süna nghojü hi polai koulou-a haibüa lou souwe:
11“Eh Mapao ea Ramai! Newo adusho,
tsükhouyu ea, khouko ngaozüe.
Daiolouzü nenou na teitei soupeie alia ne leli hinou puletao sü veloue ea hriloue.”
Currently Selected:
PONGAOPEIYU 4: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
