PONGAOPEIYU 5
5
Larübvü ea Zhaotu
1Alia vebuh süna vahi buyu mai süna bah zhoulo vanou Enou larübvü ali ngaoe; Sühavei phao-le ahai hisü larüchah rüthou phoutsü khaitoua paoshee anai nokhaitoue. 2Alia haibüa, “Thaohnou paoshee taosü soukholoua larübvü nasü hapalou süe?” tea pai kushoa paoyu khou-chihshoyu rakivamai aliye Enou ngaoe. 3Ana rakihi-a, deiphao hi-a moa deikhehi-a larübvü sünasü hapalou süyu mo-a sühi zhuthoulou süyu maitalia hare. 4Larübvü süna hapalou süyu moa sühi zhuthoulou süyu maitalia ngaolou hoyu donou Esü krasho loure. 5Sühinou tsümaitao hrohinou mai alinou Ahi paoe, “Kraso, zhukhaio! Judah khühi Souveo, David vei Ma sünanou reih koloure, alia puhnou paoshee anaitaosü soukholoua larübvü nasü hapalou süre.”
6Süthaisü Enou Zhaotu aliye vebuh tsüle hinou, hrikhaona adaitaonou ea tsümaitao nou sühao-a buyu sü ngaoe. Zhaotu sünasü raichoki datheayu kue. Sünavei kai anai ea nghithou anai bue. Nghithou sütaosü deiphao teiteihi seitayu Ramai vei rako anaitaoe. 7Zhaotu sünanou taloua vebuh süna vahi buyu mai süna bah zhoulo vanou larübvü sünasü poloure. 8Alia puhnou süsü polouyu kisü, hrikhaona adai sütao ea tsümai kaidai taosü kou Zhaotu nghojünou kaotare. Puletao mailili bah hisü lanabvü aduna chekhei bue, alia mei deiloure kaivei shoyu nanou phoua buyu sana paitao-a bue, sütaosü sheeyu maitao vei veachi nasüe. 9Alia puletao nou haibüa ashu lousü souwe:
“Newo larübvü süna poyu ea sünavei paosheetao hapayu züdoue.
Daiolouzü neye sü southeare,
alia khü, la, mai ea tahrüh liki hinou maikhe maiye ne zhenou Ramaiye donou hrüloue.
10Alia nenou panou Eletao Ramaiye kuvah soure donou puletaoye napaomai vedei ali soupeire alia puletao nou deiphaosü tukha-sahrülai.”
11Süthai-a Enou zhukhaie, alia Enou rakivamai thethe ea zzü zzü paisü chouwe! Puletao sü vebuh süna, hrikhaona sütao ea tsümai sütaoye sühao poa la-a bue, 12alia haibüa pai kushoa lou soue:
“Southeawuyu Zhaotu puhsü khouko,
kini, ratsü, khou-chihyu, tsükhouyu, adusho,
alia paoshoyu sü ngaozüdoue!”
13Süthaisü Enou raki hi, deiphao hi, deikhe hi, zai hi, alia teideiphao teitei hi buyu hrikhaona hrülai nou haibüa lou souyu sü choue:
“Vebuh hinou buyu puh ea Zhaotu hisü paoshoyu, tsükhouyu, adusho ea khou-chihyu buyu sü teisanou souloukhaio, teisanou!”
14Sükisü hrikhaona adaitao nou chila peie, “Amen!” Alia tsümaitao nou deiphinou kou kaoloua khurü loure.
Currently Selected:
PONGAOPEIYU 5: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
