PONGAOPEIYU 2
2
Ephesa Lüloumame hi Seiveyu Chipao
1“Ephesa hi buyu lüloumaime vei rakivamai nahi rükhaio:
“Chi haitaosü bah zhoulo vanou teivuh anai keipoa buyu ea sana meibvü dzükhaiyu buh anaitao hronou talaia buyu maisüna vei chipao nasüe. 2Enou nevah ea nenou kazhou koute te-a ea shamea-a vah sousa touyu sü süwe; alia nenou maishimai taoye koa shamea zholouhoe touyu süolouzü puletaohai sei-atamai mokhaia sei-atamai baie tea paoyu sümaitao zhaisü nenou zhuloua puletao vei amadasü phoupaloue touyu sü Enou süwe. 3Nenou shamealoue ea Azhih donou veahoyu sü daoloue, alia ne sü chathai takhaimoe. 4Ana Enou nepei hi motouyu sü hainae: nenou raiki Eye leshiyu büa chuwo leshi peikhai more. 5Südonou ne daizhozhou kaadoua dekouresa touyu sü lichokhaio! Nemah hinou le dalouwo ea nenou raiki souyu vahtaosü souloukhaio. Nenou nemah hinou le daluomo louzü, Enou ne hi taveloua nevei meibvü dzükhaiyu buh nasü süna buh hinou potalou bailai. 6Ana Enou paoshonüyu haina hai nehi bue süolouzü Enou Nikolaitan mainou soupfüyu vahtao ngaorayu süzhou ne-a ngaorawe.
7“Nou pfüa buyu puhnou Rakonou lüloumaime taohi pao-a buyu nasü keiloukhaio!
“Reih ko louyu puh hisü Ramai vei Shofü hinou paopayu ahri süübe vei rashithouna touloure zü nasü Enou peilai.
Smurna Lüloumaime hi Seiveyu Chipao
8“Smurna hi buyu lüloumaimevei rakivamai nahi rükhaio:
“Chi haitaosü araikha ea nakhana soua buyu, thailoua hripulou khaiyu puh chipaoe. 9Enou nevei veahoyu ea toure hayu sü süwe, ana newo chechenou haniwe! alia lah puletao münou puletaohai Jihudimaie tea paokhaia chechemoyu ea Saitanme hinou vebaiyu puletao nou nepei hi chishi paoyutaosü Enou süwe! 10Nenou thala-a veahoyu daore süvanou pikhaiso. Zhukhaio rashinanou neletao kamaiye zhai zhure donou hukhahi laithoulai, alia neletaosü teithe kiruopha veaholai. Athai koute Ahinou cheche-a bulo, alia ahri Veo peirüsü peilai.
11“Nou pfüa buyu puhnou Rakonou lüloumaime taohi pao-a buyu nasü keiloukhaio!
“Reih kolouyu puhye sü athai ahai chenanou hakia souzhuwu laimoe.
Pergamam Lüloumaime hi Seiveyu Chipao
12“Pergamam hi buyu lüloumaime vei rakivamai nahi rükhaio:
“Chi haisü thai-jü hri pfüyu haivei shoyu khoche süna buyu puh chipaoe. 13Nenou hrüa buyu buh sü Enou süwe, sühisü Saitan vei vebuh bue. Newo Azhih hinou cheche-a bue, alia Avei cheche zhopaoh sou-apeio Antipas ye Saitan nou buyu buh sühinou southeayu ki koutea newo Ahi lüa buyu hai hakia thaokhai moe. 14Ana Enou nepei hi motouyu daotu bue, süolouzü neletao hrohinou kamaisü Balaam nou doupeiyu thaifüyu mai bue. Puhnou Israel maitaoye panou bashara hi posheelayu touso touloure ea khulou vah souloua mah hi louloure donou puletao nghojühi do ashi laithou peire sü Balak hi doupeie. 15Sübüa nehi-a Nikolaitan mainou doupeiyu thaifüa laiyu mai kamai bue. 16Südonou ledalo! Sükumo louzü Enou nehi thala taveloua Amü hi buyu khoche sünanou puletao pei hisü reih zülai.
17“Nou pfüa buyu puhnou Rako nou lüloumaime taohi pao-a buyu nasü keiloukhaio!
“Reih kolouyu puh hisü pokukhai touyu manna sü Enou peilai, alia ngaolouyu puh likheinou sübaiyu zhih ashu rüthoukhai touyu chuh kaali Enou puh hi peilai.
Thuatira Lüloumaime hi Seiveyu Chipao
18“Thuatira hi buyu lüloumaime vei rakivamai na hi rükhaio:
“Chi haitaosü meikei büa keivavayu nghithou pfüyu ea puh phisü mei hinou pothou deiloua kukhai touyu peivavayu hu baosa kuyu Ramainah Poutu chipaoe. 19Enou ne vah taosü süwe. Nevei leshi ea lü, nevei kuvah ea shameayu, alia nenou chu soua buyu sünanou raiki souyu jünou veikoure touyu sü Enou süe. 20Ana Enou nepei hi motouyu haitao bue: Nenou lah puhye nou rachi paolapai tea kuyu naotupai Jezebel ye koa shamea peiwe. Puhnou Akilaitaoye khulou vah soure ea bashara hi posheelayu tousotao toure donou doupeia sümah peiwe. 21Enou puhye puh mah hinou le daloure teile peiwe ana puhnou puhvei khulou vah souyu hinou le daloure sü bae. 22Alia zhukhaio, Enou puhye sü veahoyu züh hi polai khailai, alia puhye koa khulou souyu maitaoye sü puhvei vah ashitao hinou puletao ledalou molouzü puletaoye sü panou ngaopishoa veaholai. 23Enou puh nahmai taoye sü southealai, alia sükisü lüloumaime hrülainou Esü maikhemai hrülai tsüle süyu mai nasüe touyu sü sülai, alia Enou neletao mai aliliye lah lahnou soukhai touyu vah thaifüa ngaozü nasü peilai.
24“Ana Thuatira hi buyu kukhe neletaowo louzü ashi doupeiyu haina thaifüa tamoe; neletaowo, thoushoyu Saitan vei kheitsü tea kamainou kua buyu nasü doulou moe. Enou neletao hi paowe süolouzü Enou neletao pei hi kou süyu halia pokhai laimoe. 25Ana E vemo koute sü neletao hi buyu nasü potoulo. 26Reih kolouyu ea akhai koute Azüpa vah soua buyu puh hisü tahrü khemaitao pei hi khore khouko sü Enou peilai, 27alia lah E-a Apuo hinou khouko ngaolouyu sübüa puhnou puletaoye sü hu südanou poa tukha sahrülai ea puletaoye sü nai lee soukho sasayu kua soukhowulai, 28alia Enou puh hisü shona teivuh-a peilai.
29“Nou pfüa buyu puhnou Rako nou lüloumaime taohi pao-a buyu nasü keiloukhaio!
Currently Selected:
PONGAOPEIYU 2: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
