ROM 8
8
Thlarauva nun
1Chutichuan, tûnah zawng Krista Isuaa awmte tân chuan, thiam loh chantîrna rêng a awm tawh lo. 2Krista Isuaa nunna Thlarau dân chuan sual leh thihna dân ata chu min tichhuak tawh si a. 3Tisa a chak loh avânga Dânin a tih theih hauh loh chu Pathianin a rawn ti ta; mihring tisa sual ang puin, a Fapa ngei chu sual thawi nân Pathianin a rawn tîr a, tisaa sual awm chu thiam loh a chantîr ta;#Tirh. 13:39; Heb. 7:18; 10:1,2. 4tisa dâna awm tawh lo, thlarau dâna awm tawh keimahniah hian Dânin a phût chu hlena a awm theih nân. 5Tisa dâna awmte chuan tisa lam thilte an duh a, thlarau dâna awmte erawh chuan Thlarau lam thilte an duh ṭhîn.#Gal. 5:19-25. 6Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni. 7Tisa duhzâwng chuan Pathian a do va, Pathian Dân a zâwm si lo va, zawm pawh a zâwm thei hek lo: 8chuvângin, tisa duhzâwng anga awmte chuan Pathian an tilâwm thei lo.
9Pathian Thlarau chu in hnêna a chên chuan tisa mi in ni tawh lo va, Thlarau mi in ni tawh zâwk a ni. Tu pawh Krista Thlarau nei lo chu ama mi an ni lo. 10Tin, Krista chu nangmahnia a awm chuan in taksa chu sual vânga thi ni mah se, thiam chantîr in nih tawh avângin in thlarau erawh chu a nung a ni. 11Mitthi zîng ata Isua kaithotu Thlarau chu nangmahnia a awm chuan, mitthi zîng ata Krista kaithotu chuan nangmahniah a thlarau chêntîrin, in taksa thi thei chu a tinung ang. #1 Kor. 3:16.
12Chuvâng chuan, unaute u, bat kan nei, tisa dâna tisa taka nung tûr chuan a ni lo. 13Tisa dâna in awm chuan in thi ngei ang: amaherawhchu, in taksa châk zâwng thil sual tihte Thlarauva in tihhlum chuan in nung ang. 14Pathian Thlarau hruaia awm apiangte chu Pathian fate an ni e. #Gal. 5:18. 15In Thlarau dawn chu bawih anga hlauva awmtîr leh tûr che u ni lovin, fa-a siam tûr che u Thlarau a ni zâwk e; chuvâng chuan, “Abba, Ka Pa” tiin kan au chhuak ṭhîn a ni. #Mk. 14:36. #Gal. 4:5-7. 16Chu Thlarau ngei chuan keimahni thlarau nên inkawpin, Pathian fate kan nih min hriattîr a. 17Pathian fate kan nih chuan a roluahtute kan ni, Krista tuarna kan ṭâwmpui si chuan a ropuina pawh kan ṭâwmpui ngei dâwn a ni.
Ropuina lo awm tûr
18Tûna tuarnate hi nakîna kan tân ropuina tihlan tûr nên chuan tehkhin thamah ka ruat si lo. #2 Kor. 4:17. 19Thil siam zawng zawngte chuan Pathianin a fate a tihlan hun an nghâkhlel êm êm a ni. 20Thil siamte chu anmahni duh vâng ni lovin, a siamtu thu avângin chhiatna tâwk tûra tih an ni; amaherawhchu, beisei tûr a la awm; #Gen. 3:17-19; 5:29; Thuh. 1:2. 21thil siamte chuan chhiatna bawih ata tihchhuaha awmin Pathian fate zalênna ropui chu an ṭâwm ve dâwn a ni. #2 Pet. 3:13; 1 Jn. 3:2. 22Thil siam zawng zawng chu tûn thlengin nau vei rûm angin an rûm tih kan hria. 23Chu chang a ni lo, keini Thlarau rah hmasa dawngtute ngei pawh hi, a fa-a min siam#8:23 Mss ṭhenkhatah, ‘fa-a min siam hun,’ tih hi a tel lo. hun, kan taksa tlanna tûr chu, nghâkhlelin kan rûm a ni. #2 Kor. 5:2-4. 24Chu beiseina avâng chuan chhandam kan ni si a; amaherawhchu, hmuh tawh reng beiseina chu beiseina a ni lo ve. A hmuh tawh reng chu tu nge la beisei fo? 25Kan hmuh loh chu kan beisei erawh chuan kan nghâk fan fan ṭhîn a ni.
26Chuvângin, Thlarau pawh chuan kan chak lohnaah min pui ṭhîn. Engtia ṭawngṭai tûr nge tih pawh kan hre si lo va. Thlarau chuan rûm sawi hleih theih lohvin min ṭawngṭaisak ṭhîn a ni. 27Mi thinlung enfiahtu Pathian chuan, Thlarau sawi tum chu eng nge ni tih a hria; Thlarau chuan Pathian duhzâwng ang zêlin min ṭawngṭaisak si a. #Sam. 139:1,2.
28Pathian hmangaihtu, ama ruat anga a kohte tân chuan, an ṭhatna tûrin engkimin#8:28 Mss ṭhenkhatah, ‘Pathian hmangaihtute tân thil engkim hian a ṭha zâwngin a thawk ṭhîn,’ tih a ni. a thawhsak ṭhîn tih kan hria; 29a hriat lâwkate chu ama Fapa ang taka awm tûrin a ruat lâwk si a; tichuan, Fapa chu unau tam tak zînga fa u ber a lo ni tawh ang. 30Tin, a ruat lâwkate chu a ko va, a kohvate chu thiam a chantîr a, thiam a chantîrte chu a ropuina a chantîr bawk a.
Pathian hmangaihna
31Chûng thu-ah chuan eng nge kan sawi tâk ang? Pathian kan lama a ṭan chuan tuin nge min do thei ang? #Sam. 118:1. 32Ama Fapa ngei pawh zuah lova, kan zaa tâna petu chuan engkim a thlâwnin min pe tel lo vang em ni? 33Pathian mi thlante chu tu nge hêk ngam ang? Pathian chu thiam chantîrtu a ni si a.#Lk. 18:7; Isa. 50:8,9. 34Tu-in nge thiam loh chantîr ang? Krista Isuan maw? Ani chu kan tân a thi chauh pawh ni lovin,#8:34 Mss ṭhenkhatah, ‘Mitthi zîng ata,’ tih a tel. a tholeh a, Pa Pathian ding lama awmin min sawisaktu a ni a. #Sam. 110:1.
35Krista hmangaihna ata chu engin nge min ṭhen thei ang? Hrehawmnain emaw, mangannain emaw, tihduhdahnain emaw, ṭâmin emaw, saruaknain emaw, khandaihin emaw min ṭhen thei dâwn em ni?
36“Nangmah avângin nilêngin thah mai hmabâkin kan awm a,
berâm talh tûr anga dah kan ni,”
tih ziak ang khân. #Sam. 44:22.
37Thei suh e! Chûng zawng zawngah chuan min hmangaihtu avângin ropui taka ngamtu kan ni.
38Eng mahin - thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te, 39sânna te, thûkna te, thil siam dang rêng rêng te pawhin, kan Lalpa Krista Isuaa awm Pathian hmangaihna ata chu min ṭhen thei lo vang tih ka hre chiang a ni.
Currently Selected:
ROM 8: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
