ROM 7

Inneih tehkhin thu

1Unaute u, Dân in hre hlawm bawk a, ka sawi hi in hai lo vang chu, Dân chuan mi an dam chhûng chauh an chungah thu a nei a ni lâwm ni? 2Nupui chu a pasal dam chhûng zawng a pasalah Dân chuan a phuar bet a; mahse, a pasal a thih chuan a pasal lama Dânin a phuarna chu phelhin a awm ṭhîn. #1 Kor. 7:39. 3A pasal dam laiin mi dang a neih chuan a uire a ni a; a pasal thih hnuah erawh chuan Dân phuarna lak ata chu a fihlîm a, mi dang nei mah se uire a ni tawh lo.

4Chutiang bawk chu a ni, ka unaute u: Krista taksa pêngte in nih tâk avângin Dân chu in thihsan tawh a. Pathian tân rah kan chhuah theihna tûrin tûnah zawng mi dang ta, mitthi zîng ata kaihthawha ta chu kan ni e. 5Kan mihring hlui nuna kan khawsak lai kha chuan kan châkna sual, Dânin a chawh thawh khân, kan taksaah a thawk a, thihna a thlen ṭhîn. 6Tûnah zawng, min phuar ṭhîntu kha kan thihsan tawh a, Dân lakah kan fihlîm tawh: Dân thu ziak hlui ang mai ni lovin, Thlarau dân tharin rawng kan bâwl zâwk a ni.

Sual chhûng khung

7Eng nge kan sawi tâk ang le? Dân chu sual em ni? Ni suh e. Amaherawhchu, Dânin mi hriattîr lo se sual hi ka hre lo vang. Dân chuan “Awt suh,” ti lo se, awh hi ka hre lo vang.#Exod. 20:17; Deut. 5:21. 8He thupêk hi remchânga hmangin sual chuan keimahah hian awhna chi tinrêng a chawk tho va. Dân awm lo sela chu sual hi thil thi mai a ni. 9Hmânah chuan Dân tel lovin ka nung ṭhîn a; mahse, thupêk chu a lo awm a, sual chu a lo harh a, 10kei chu ka thi ta a. Nunna tûra thupêk chu ka tân thihna a lo ni ta. #Lev. 18:5. 11Sual chuan thupêk chu remchânga hmangin mi bum a, mi tihlum ta a ni.#Heb. 3:13. 12Dân zawng a thianghlim a ni, thupêk pawh a thianghlim a, a dik a, a ṭha a ni.

13A nih loh leh, thil ṭha chuan kan tân thihna a rawn thlen a ni maw? Thlen suh e. Sual zâwk hian a ni; sual a nihzia tilang tûrin thil ṭha hmangin ka tân thihna a rawn thlen a, thupêk avângin sual râpthlâkzia chu a lo lang fiah ta a ni.

14Dân chu thlarau lam thil a ni tih kan hria; kei erawh chu mihring mai, sual bawiha hralh tawh ka ni. #Sam. 51:5. 15Ka chêt dân hi ka hrethiam lo ve; tih ka duh chu ti lovin, ka huatzâwng chu ka ti zâwk tlat ṭhîn. #Gal. 5:17. 16Ka tih duh loh zâwng ka tih hian Dân chu a ṭha ka tihpui ve tihna a ni. 17Tichuan, keimah hi zawng a titu tak ka ni lo, keimaha sual chêng hi a ni zâwk. 18Keimah mihringah hi zawng thil ṭha eng mah a awm lo tih ka hria, thil ṭha tih duhna nei ṭhîn mah ila ka ti thei si lo. 19Ka tih duh thil ṭha chu ti lovin, ka duh loh thil sual chu ka ti zâwk ṭhîn. 20Ka tih duh loh zâwng chu ka tih ṭhin si chuan, a titu chu keimah tak hi ka ni tawh lo tihna a ni a, keimaha sual awm hi a ni zâwk.

21Hetiang hi thil awm dân a ni tih ka hre chhuak ta; Thil ṭha tih ka duh na a, thil sual ka ti leh mai ṭhîn. 22Ka mihring chhûngril chuan Pathian Dân chu a lâwm a; #Sam. 1:2. 23nimahsela, ka taksaah hian thawktu, dân danglam tak a awm tih ka hria; chu chuan ka chhûngril ṭha tihzâwng dân chu a do va, sual dân ka taksaa thawk ṭhîn bawihah mi siam ṭhîn a ni. #Gal. 5:17; Jak. 4:1.

24Mi khawngaihthlâk ka va han ni tak êm! He thihna taksa lak ata hi tuin nge mi chhan chhuak ang? 25Pathianin le! Kan Lalpa Isua Krista zârah ani chu fakin awm rawh se.#7:25 Mss ṭhenkhatah, ‘Pathian hnênah lâwmthu awm rawh se,’ tih a ni. Tichuan, ka thinlung chhûngril tak chuan Pathian Dân a zâwm a, ka taksa hi chuan sual dân a zâwm thung a ni.

Currently Selected:

ROM 7: MIZCLBSI

Highlight

Copy