ROM 9
9
Pathian hnam thlan Israel
1Kristaah chuan thu dik tak ka sawi a ni; ka daw lo ve: Thlarau Thianghlim zârah ka chhia leh ṭha hriatna pawhin a hre chiang. 2Ka rilru nasa takin a hrehawm a, ka lungngaihna pawh a reh thei lo. 3Ka unaute, tisa lama ka chipuite aiah hian ânchhia dawngin Krista hnên ata tihhran ni ila ka ti hial ṭhîn.#Exod. 32:32. 4Israel mi an ni a, fa nihna te, ropuina te, thuthlung te, Dân te, rawngbâwl hna te, Pathian thutiam te an chang a.#Exod. 4:22; Deut. 7:6; 14:1,2. 5Thlahtute chu an pute an ni a, tisa lam chhui chuan Krista ngei pawh chu an chipui a ni; engkim chunga awm Pathian chu chatuana fakin awm rawh se. Amen.
6Pathian thu chu a thlâwn ta tihna zawng a ni hauh lo; Israela thlah zawng zawng Israel mi an ni vek lo ve. 7Abrahama thlah zawng zawng pawh a fate an ni vek hek lo. “Isaka-ah hian i thlahte chhui an ni ang,” Pathianin a tih zâwk kha.#Gen. 18:10; 21:12. 8Tichuan, tisa lama a fate chu Pathian fate an ni chuang kher lo, Pathian thutiam avânga a fate erawh chu Abrahama thlah dik taka ngaih an ni. 9“Tûn ang hunah hian ka lo kal ang a, Sari chuan fapa a nei ang,” ti-a tiam a nih kha. #Gen. 18:10. 10Chu chang chu a ni hlei nêm: mi pakhat, min thlahtu Isaka lakah Rebeki chuan phîr a pai a, #Gen. 25:21. 11naute pian hma, a chhia emaw, a ṭha emaw an tih theih hma khân Pathianin a duhzâwng angin pakhat zâwk a thlang a ni tih a lang: 12thiltih avâng ni lovin, a kotu duhzâwng avâng zâwkin Rebeki hnênah, “A upa zâwkin a naupang zâwk rawng a bâwl ang,” a tih kha. #Gen. 25:23. 13“Jakoba ka hmangaih a, Esauva erawh chu ka hua,” tih ziak a ni bawk. #Mal. 1:2-3.
14Chuti a nih si chuan eng nge kan sawi tâk ang? Pathianah dik lohna a awm em ni? Awm lo ve.#2 Chr. 10:7. 15Ani chuan, “Ka khawngaih apiang chu ka khawngaih ang a, zah ka ngaihna chung apiangah zah ka ngai ang,” tia Mosia hnêna a sawi kha. #Exod. 33:19. 16Chuvângin, mihring duh thu emaw, thiltih emaw ni lovin, Pathian khawngaihnaah a innghat zâwk a ni. 17Lehkha Thu-in Farawa hnênah, “He mi avâng ngawt hian ka tungding che a ni, nangmaha ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a. #Exod. 9:16 (LXX). 18Tichuan, Pathian chuan a duh apiang a khawngaih ṭhîn a, a duh apiang pawh a tiluhlul ṭhîn a ni.
Pathian thinurna leh a khawngaihna
19“Chuti chu Pathianin engati nge mi a la dem cheu vang? A duhzâwng chu tu nge dodâl thei awm?” in ti a ni thei e.
20Aw mihring, Pathian hnial veitu chu tu nge maw i nih le? Thilsiam chuan a siamtu hnênah, “Engati nge hetianga mi siam?” a ti ang em ni. #Isa. 29:16; 45:9 (LXX). 21Bellei tlang khat aṭangin bêl hlu deuh te, hlu lo deuh te siam tûrin bêlvawtu chuan bellei chungah thu a nei lo vem ni? #Jer. 18:6; 2 Tim. 2:20. 22Chutiang chuan Pathianin a ti ṭhîn; a thinur leh a thiltihtheihna chu lantîr duh mah se, a thinurna dawngtu bêl, tihboral mai tûrte chu a dawh hrâm hrâm a;#Thuf. 16:4. 23tin, a khawngaihna bêl, a ropuina chang tûra a buatsaih keiniho hnênah hian ropuina nasa tak a rawn tilang thung a ni. 24Juda-te zîng ata chauh ni lovin, Jentail-te zîng ata a koh chhuahte hi chutiang bêlte chu kan ni. 25Hosea lehkhabuah hetianga a sawi kha:
“Ka mi ni ngai lote chu
‘Ka mite,’ ka ti ang a,
Hmangaihngailohvi chu
‘Hmangaihi,’ ka ti ang. #Hos. 2:23; 1 Pet. 2:10.
26‘Ka mite in ni lo ve,’ an tihna hmunah ngei chuan
Pathian nung fate vuah in ni ang,”
tiin. #Hos. 1:10.
27Isaia pawh khân Israel mite thu aupuiin, “Israel mite chu tuifinriat ṭiau zâtin tam mah sela, a bâng tlêm tê chauh chhandam an ni ang. #Isa. 10:22,23 (LXX). 28Lalpa chuan lei chunga a rorêlna tûr chu a hlen thuai dawn si,” a tih kha.
29Isaia vêkin,
“Engkim Lalpa chuan a chi thlah min lo zuahsak suh sela chuan,
Sodom khua ang kan ni tawh ang a,
Gomora khua ang mai kan ni tawh ang,”
tia a lo sawi lâwk ang khân. #Isa. 1:9 (LXX).
Israel-te leh Chanchin Ṭha
30Eng nge kan sawi tâk ang le? Jentail thiam chan tum lêm lote chu thiam chantîr an lo ni ta, rinna avânga thiam chantîrna chu. 31Dân zâwma thiam chan tum Israel-te zâwk chuan Dân ang chuan thiam an chang zo ta lo. 32Eng vâng nge ni? Rinna lova thiltiha hmuh an tum vâng a ni a, Tlûkna lungah chuan an tlu ta a ni.
33“Ngai teh, Zion-ah chuan inchhuiha tlûkna lung,
Insuta tlûkna lungpui ka dah a,
Tu pawh amah ring apiang chu
An mualpho lo vang,”
tih ziak ang khân. #Isa. 28:16 (LXX); Mt. 21:42; 1 Pet. 2:6.
Currently Selected:
ROM 9: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
