ROM 10
10
1Unaute u, ka chipuite chu chhandam ni se tih hi ka duhthusâm leh Pathian hnêna ka dîl ber ṭhin a ni. 2Pathian tân ṭhahnem an ngaih nasatzia ka hria, hre chiang lovin ṭhahnem an ngai a ni. 3Pathianin mi thiam a chantîr dân chu an hrethiam lo va, anmahni kawng an zawh tlat a, Pathianin thiam a chantîr dân hnuaiah an intulût duh lo. 4A ring apiangte thiam chantîra an awm theihna tûrin, Krista chu Dân tibângtu a ni si. #Mt. 5:17; Gal. 3:24.
Mi zawng zawng chhandamna
5Mosia chuan Dân zawm avânga thiam chan chungchâng thu heti hian a ziak: “Dân zâwmtu chu a nung ang,” tiin.#Lev. 18:5; Neh. 9:29; Ezek. 20:11,13,21. 6Rinna avânga thiam chan chungchâng thu erawh chu, “ ‘Tu nge vânah lâwn ang?’ (Chu chu chung lam ata tu nge Krista hruai chhuk ang, tihna a ni) emaw,#Deut. 30:12,13. 7‘Tu nge leilâwtah chhuk ang?’ (chu chu, mitthi khua ata tu nge Krista hruai chhuak ang, tihna a ni) emaw, in rilruin ti suh u,” a ti a. 8“Thu chuan a hnaih a che, i kâah leh i thinlungah a awm,” a ti zâwk a ni. ‘Thu’ tih chu rinna thu kan hril hi a ni. 9I kâin Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandam i ni ang. #Mt. 10:32; Lk. 12:8. 10Thinlunga ring chu thiam chantîr an ni a, kâa ṭan chu chhandam an ni bawk a. 11Lehkha Thu-in, “A ring chu tu mah an mualpho lo vang,” a ti a ni. #Isa. 28:16 (LXX). 12Juda nih emaw, Grik nih emaw danglamna a awm chuang lo; Lalpa pakhat chu an zaa Lalpa a ni a; amah lamtu apiangte tân chuan engkim a ngah a ni. #Gal. 3:28; Kol. 3:11. 13“Tu pawh Lalpa hming lam apiang chhandam an ni ang,” tih a ni si a.#Joel. 2:32; Tirh. 2:21.
14An rin lohva chu engtin nge an lam theih ang? An hriat lohva chu engtin nge an rin theih ang? Hrilhtu an awm si loh chuan engtin nge an hriat ang? 15Tirh an nih si loh chuan tu nge hril ang? “Thil ṭha chanchin#10:15 Mss ṭhenkhatah, ‘remna chanchin ṭha,’ tih a ni. rawn hriltute ke chu a va mawi êm!” tih ziak ang khân. #Isa. 52:7.#Isa. 53:1 (LXX). 16Nimahsela, Chanchin Ṭha chu an za-in an awih vek lo. Isaia ngei pawhin, “Lalpa, kan thu sawi tuin nge ring?” a ti si a. 17Tichuan, rinna chu thu hril an hriat avângin a lo awm a, thu hril chu Isua Krista#10:17 Mss ṭhenkhatah, ‘Krista’ aiah ‘Pathian’ tih a ni. thu hi a ni. 18A nih leh, an bengin an hre ngai lo vem ni? Hria e a!
“An thâwm chu ram tinah a thang a, an thu chu kâwlkil thlengin a thang chhuak ta,”
tih a ni. #Sam. 19:4 (LXX); Kol. 1:6.
19A nih leh Israel miten an hre ve lo vem ni?
“Chi-a sawi tham lohte chu ka thîktîr ang che u a,
Chi fing lote avângin ka tithinur dâwn che u a ni,”
tiin Mosia chuan a sawi hmasa a. #Deut. 32:21.
20Isaia chuan a sawi huai lehzual a:
“Mi zawng lote chuan mi hmu a,
Mi lam lote hnênah ka inhriattîr a,”
a ti a. #Isa. 65:1 (LXX).
21Israel-ho chungchâng thu-ah erawh chuan,
“Mi tihmawh leh hel hmangho tân
Nilêngin ka bân ka phar ṭhîn,”
a tih kha. #Isa. 65:2 (LXX).
Currently Selected:
ROM 10: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
