LUKA 10

Zirtîr sawmsarih tirh

1Chumi zawhah chuan Lalpan mi dang sawmsarih#10:1 Mss ṭhenkhatah ‘sawmsarih leh pahnih’ tih a ni. a ruat a, an kalna tûr khaw tinah leh hmun tinah lo kal hmasa tûrin pahnih zêlin a tîr a. 2An hnênah, “Buh seng tûr a tam tehlul nên, thawktu lah an tlêm si. Chutichuan, a buh seng tûra mi tîr tûrin buh Neitupa dîl rawh u. #Mt. 9:37,38; Jn. 4:35.

3“Kal ta ula, chinghne zînga berâmno lût angin ka tirh che u hi. 4Tangka ip te, iptê te, pheikhawk te keng suh u; kalkawngah tu mah chibai bûk hek suh ang che u. #Mt. 10:7-16; Mk. 6:8-11; Lk. 9:2-5; 22:35,36. 5In thlen in apiangah, ‘He inah hian thlamuanna thleng rawh se,’ ti hmasa zêl ang che u. #1 Samu. 25:6. 6Chu inah chuan thlamuanna ngaina mi an lo awm chuan, in thlamuanna thu chu an chungah awm sela, an awm loh erawh chuan in hnênah lo kîr leh rawh se. 7Chumi in hlîrah chuan chêng ula, an pêk apiang che u eiin in ang che u, hnathawktu chu hlawh hmu tlâk a ni. In hrang hrangah thleng lâwr suh u. #1 Kor. 9:14; 1 Tim. 5:18; Deut. 24:15.

8“Tin, khua in luhna apiangah an lo lawm che u chuan, an hlui che u apiang ei ula, 9damlo awmte pawh tidam ula, an hnênah, ‘Pathian ram chu in hnênah a lo thleng ta,’ ti ang che u. 10In luhna khuaten an lo ngaihsak loh che u chuan, in chhuahsan pahin an kawtlaiah, 11‘In khaw vaivut takngial pawh hi kan kai duh lo ve, kan kephah ata kan vuak fai hi; Pathian ram in hnênah a lo thleng ta tih erawh chu lo hre rawh u,’ in ti dâwn nia. #Tirh. 13:51. 12Ka hrilh a che u. Rorêl ni-ah chuan chu khaw tuar tûr ai chuan Sodom khaw tuar tûr chu a ziaawm zâwk ang. #Gen. 19:24-28; Mt. 10:15; 11:24; Jud. 7.

Sim duh lo khuate

(Mt. 11:20-24)

13“Nang Korazin, i chung a pik e. Nang Bethsaida, i chung a pik e; in zînga thil mak tihte kha Tura leh Sidona tih ni sela, saiip puan sina vaivut zîngah ṭhuin an simzia an tilang daih tawh tûr. #Isa. 23:1-18; Ezek. 26:1—28:26; Joel. 3:4-8; Amos. 1:9,10; Zak. 9:2-4. 14Rorêlnaah chuan in tuar tûr aiin Tura leh Sidon tuar tûr chu a ziaawm zâwk ang. 15Nang pawh, Kapernaum, vân thlenga chawisân i ni dâwn êm ni? Mitthi khaw thlenga nam thlâk asin i nih dâwn!

16“In thu awih chuan ka thu pawh an awih ang, a hnâwl che u chuan kei pawh mi hnâwl a ni; tin, kei mi hnâwltu chuan mi tîrtu pawh a hnâwl a ni e,” a ti a. #Mt. 10:40; Mk. 9:37; Lk. 9:48; Jn. 13:20.

Sawmsarihte lo haw

17Sawmsarihte chu hlim takin an lo haw leh a, “Lalpa, ramhuaite pawh i hming avângin kan thu thuin an awm,” an rawn ti a. 18Ani chuan an hnênah, “Vân ata ṭêk anga Setana tla ṭhuai kha ka lo hmu reng asin.#Thup. 12:9; Jn. 12:31. 19Ngai teh u, rûl te, khawmualkaikuang te, hmêlmapa chakna zawng zawngte rah beh theihna thu ka pêk che u hi, eng mahin a tina hauh lo vang che u. #Sam. 9:13. 20Amaherawhchu, thlaraute in thu thu-a an awm avâng hian lâwm suh u, vâna in hming ziak a nih avângin lâwm zâwk rawh u,” a ti a. #Exod. 32:32; Sam. 69:28; Dan. 12:1; Fil. 4:3; Heb. 12:23; Thup. 3:5; 13:8; 21:27.

Isua lâwmna

(Mt. 11:25-27; 13:16,17)

21Chumi lai tak chuan Thlarau Thianghlimah a lâwm ta êm êm a. “Aw ka Pa, lei leh vân Lalpa, nangin mi fingte leh mi thiamte lakah hêng thu hi i thup tlat a, mi mâwlte hnêna i puan avângin ka fak a che; a ni, ka Pa, chutiang chu ṭha i tih zâwng tak a ni. 22Ka pain engkim mi kawltîr tawh; Fapa hi tu nge a nih Pa chauh lo chuan tu man an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu man an hre lo,” a ti a. #Jn. 3:35; 10:15; 17:25.

23Tin, a zirtîrte lam a hawi a, 24Ka hrilh a che u, zâwlneite leh lal tam takte pawhin in thil hmuhte hi hmuh an lo duh ṭhîn a, an hmu si lo; in ngaihthlâkte hi ngaihthlâk an duh a; mahse, an ngaithla si lo,” a ti a.

Samari mi ṭha

25Ṭum khat chu Dânhremi pakhat hi a ding a, amah fiah nân, “Zirtîrtu, chatuan nun nei tûrin eng nge ka tih tûr?” a ti a.#Mt. 19:16; Mk. 10:17; Lk. 18:18. #Mt. 22:35-40; Mk. 12:28-34. 26Ani chuan, “Dân bu-ah eng nge chuang? A eng lai nge in chhiar ziah ṭhin kha?” a ti a. 27Ani chuan, “ ‘Lalpa i Pathian chu i thinlung zawng zawngin, i nunna zawng zawngin, i chakna zawng zawngin, i rilru zawng zawngin i hmangaih tûr a ni; nangmah i inhmangaih angin i vêngte pawh i hmangaih tûr a ni,’ tih hi,” a ti a.#Deut. 6:5; Lev. 19:18; Rom. 13:9; Gal. 5:14; Jak. 2:8. 28Isua chuan, “I chhâng dik e, chutiang chuan ti la, i nung ang,” a ti a. #Lev. 18:5.

29Ani erawh chuan thiam inchantîr a duh a, Isua hnênah, “A nih leh ka vêngte chu tute nge?” a ti a.

30Isuan a chhâng a, “Mi pakhat, Jerusalem aṭanga Jeriko khuaa kal tûr chu, kawng lakah suamhmanghovin an lo bei a, a silhfênte chu an hlihsak a, an vaw nek a, thi chhâwngin an kalsan ta a. 31Chumi kawngah chuan puithiam pakhat a zu kal hlauh va, ani chu a han hmuh chuan a hêl ta mai a. 32Chutiang bawkin Levia chi mi pakhat pawhin chumi hmun chu a lo thleng a, ani chu a han hmuh chuan a hêl ve ta mai a. 33Samari mi pakhat zin kal chuan a awmna chu a lo thleng ve a, ani chu a han hmuh chuan a khawngaih ta êm êm a; #2 Chr. 28:15. 34a va pan a, a pemte chu hriak leh uain hnawihin a tuamsak ta a; ama sabengtung chungah a chuantîr a, khualbûkah a kalpui a, a enkawl ta a. 35A tûkah chuan duli pahnih a phawrh a, khualbûk enkawltu chu a pe a, ‘Lo enkawl la, hemi bâka i sên zawng chu ka lo kîr leh hunah ka rawn rûl ang che,’ a ti a.

36“Aw le, chûng mi pathum zînga tu ber chu nge suamhmang tâwktu vêngte nia i rin?” a ti a. 37Ani chuan, “A khawngaihtu chu,” a ti a. Isuan, “Nang pawh chutiang bawk chuan va ti ve rawh,” a ti a.

Marthii leh Mari

38An kal pah chuan khaw pakhatah an lût a, hmeichhe pakhat Marthii an tih chuan a lo thleng a.#Jn. 11:1. 39Laizâwn pakhat, Mari an tih chu a nei a. Mari chuan Lalpa ke bula ṭhuin a thu a ngaithla a. 40Marthii erawh chu ei tûr buatsaihin a indaih lo hle a, a hnênah a lo kal a, “Lalpa, ka laizâwnnuin keimah chauh che tûra mi ring mai hi ṭha i ti em ni? Mi rawn pui se a ṭha lâwm ni?” a ti a. 41Lalpa chuan a chhâng a, “Marthi, Marthi, ngaihtuah i ngah a, i buai hle tak e; mahse, thil ṭûl tak pakhat a awm. 42Mari chuan chan ṭha a thlang a, chhuhsak tûr a ni lo ve,” a ti a.

Currently Selected:

LUKA 10: MIZCLBSI

Highlight

Copy