LUKA 9

Sâwmpahnihte

(Mt. 10:1-6; Mk. 6:7-13)

1Sâwmpahnihte chu a ko khâwm a, ramhuai tin rêng chunga thiltihtheihna leh thuneihna a pe a, nâte tihdam theihna pawh a pe bawk a; 2Pathian ram thu hril tûr leh damlote tidam tûrin a tîr chhuak ta a.

3An hnênah chuan, “Zin kawng atân tiang te, iptê te, chhang te, tangka te eng mah keng suh u; kawr pahnih pawh keng suh u.#Lk. 10:4-11. 4In kalna apiangah in thlen in ngaiah thleng reng ula, chuta ṭang ngei chuan chhuak leh ang che u. 5Nangni lo ngaihsak lo che u khua chu, in chhuahsan hunah an tihdik lohzia hriattîr nân in kephaha vaivut chu thing thla ang che u,” a ti a. #Tirh. 13:51. 6Tichuan, an chhuak ta a, khaw tin an fang a, hmun tinah Chanchin Ṭha hrilin mite an tidam zêl a.

Heroda a mangang

(Mt. 14:1-12; Mk. 6:14-29)

7Lal Heroda chuan chûng thil chu a lo hre ve a. Ṭhenkhatin, “Johana kha mitthi zîng ata a tho leh ta a ni,” te an ti a; #Mt. 16:14; Mk. 8:28; Lk. 9:19. 8a ṭhenin, “Elija a lo inlâr ta a ni,” te an ti a; a ṭhenin, “Hmânlai zâwlnei tu emaw kha a lo tho leh ta a ni,” te an tih avâng chuan a ngaihna a hre lo va. 9Heroda chuan, “Johana chu a lu ka tansak tawh kha! A chanchin heti kauva nasa ka hriat hi tu nge ni ta?” a ti a, amah chu hmuh a tum ta a. #Lk. 23:8.

Mi sângnga hrai

(Mt. 14:13-21; Mk. 6:30-44; Jn. 6:1-14)

10Tirhkohte kha an lo haw a, a hnênah an thiltihte an rawn sawi a. Anni chu a hruai a, Bethsaida an tih khuaah chuan a kal hranpui ta a. 11Nimahsela, mipuiho chuan an hriatin an zui ve ta a. Anni chu a lo lâwm a, Pathian ram thu a lo hrilh a, tihdam ngai apiang a tidam a.

12Ni a tlâk dâwn lai chuan Sâwmpahnihte chu an lo kal a, “Mipuiho hi kan kiang vêl khuaahte leh lovahte thlen in leh ei tûr zawngin kaltîr ta che, hmun thlalêra awm kan nih hi,” an ti a. 13Ani erawh chuan, “Nangmahnin ei tûr pe rawh u,” a ti a. Anni chuan, “Chhang panga leh sangha pahnih bak kan nei hlei nêm - hêng mi zawng zawng ei tûr kan va lei ngawt loh chuan,” an ti a. Patling ngawt pawh sângnga lai an ni si a. #2 Lal. 4:42-44. 14Ani chuan zirtîrte hnênah, “A pâwl pâwlin ṭhuttîr rawh u, sawmnga vêl zêlin,” a ti a. 15Chutiang chuan an ti a, an ṭhuttîr ta vek a. 16Chhang panga leh sangha pahnih chu a la a, vân lam enin malsâwmna a sawi a, a phel a, mipui hnêna sem tûrin zirtîrte chu a pe a. #Lk. 24:30,31; Tirh. 2:42; 20:11; 27:35. 17An zavai chuan an ei a, an tlai ta ṭheuh va; an sem bâng chu an la khâwm a, bâwm sâwm leh pahnih khat a la ni.

Peteran Isua nihna a puang

(Mt. 16:13-19; Mk. 8:27-29)

18Vawi khat chu fianriala a ṭawngṭai laiin a zirtîrte pawh an awm ve a, an hnênah, “Mipuiten tu nge nia min sawi?” tiin a zâwt a. 19Anni chuan, “ ‘Baptistu Johana,’ ti che an awm a, a ṭhenin ‘Elija,’ an ti che a, ṭhenkhat erawh chuan ‘hmânlai zâwlneite zînga tu emaw tholeh ta,’ ni âwmin an sawi che,” tiin an chhâng a. #Mt. 14:1,2; Mk. 6:14,15; Lk. 9:7,8. 20Ani chuan, “A nih, nangnin tu nge nia mi hriat?” a ti a. Petera chuan, “Pathian Krista chu,” tiin a chhâng a. #Jn. 6:68,69.

A thih leh thawhleh tûr Isuan a sawi lâwk

(Mt. 14:20-28; Mk. 8:30—9:1)

21Tichuan, chu chu tu mah hrilh lo tûrin thu a pe tlat a. 22“Mihring Fapa hian thil tam tak a tuar tûr a ni; upate, puithiam lalte, Dân zirtîrtuten an hnâwl ang a, an tihlum dâwn a; amaherawhchu, ni thum chinah kaihthawh a ni ngei dâwn,” a ti a. #Lk. 9:44; 17:25; 18:31-34.

23Tin, mi zawng zawng hnênah, “Tu pawh mi zui duh chuan mahni inngaihtuah chang lovin, ni tin mahni kraws puin mi zui rawh se. #Mt. 10:38; Lk. 14:27. 24Tu pawh mahni nun humhim tum chuan an chân ang a, tu pawh keimah avânga nun chân chuan an humhim ang.#Mt. 10:39; Lk. 17:33; Jn. 12:25. 25Miin khawvêl hi a pumin nei sela, amah chuan chhiat phahin, boral phah si sela, a tân eng nge sâwt ang? 26Ka thu leh kei mi zahpui apiang chu, Mihring Fapa pawhin a ropuina nên, Pa leh vântîrhkoh thianghlimte ropuina nêna a lo kal hunah anni chu a la rawn zahpui ve ang. 27Dik takin ka hrilh a che u, heta dingho ṭhenkhat hi, Pathian ram an hmuh hma chu thi lo tûr an awm,” a ti a.

Isua hmêl danglam

(Mt. 17:1-8; Mk. 9:2-8)

28Chûng thu a sawi aṭanga ni riat lai hnuah chuan, Petera te, Johana te, Jakoba te hruaiin, ṭawngṭai tûrin tlângah a chho va. #2 Pet. 1:17,18. 29Chutia a ṭawngṭai lai chuan a hmêl lan dân chu a lo danglam ta a, a puante chu a vâr ta sur mai a. 30Ngai teh, mi pahnihin an rawn kâwm a, chûng mite chu Mosia leh Elija an ni; #Tirh. 1:10. 31ropui takin an rawn inlâr a, Jerusalem-a a thih tleitlâkna tûr chungchâng an sawi a ni. 32Petera leh a ṭhiante chu an mut a chhuak hle a, an han harh chian chuan a ropuina leh a bula mi pahnih dingte chu an hmu a. 33Tin, Isua an ṭhen dâwn lai chuan Peteran, “Hotupa, heta kan awm hi a ṭha e, bâwkte pathum kan khawh ang e, i tân pakhat, Mosia tân pakhat, Elija tân pakhat,” a ti a, eng nge a sawi pawh a hre mumal lo va ni. 34Chûng thu chu a sawi lai mêkin chhûm a lo zîng a, anniho chu a rawn khuh a, chhûmin a rawn chîm chuan an hlau hle a. Chhûm aṭang chuan aw a lo chhuak a, 35“Hei hi ka mi thlan, ka Fapa chu a ni; ama thu hi ngai rawh u,” tiin. #Mt. 3:17; 12:18; Mk. 1:11; Lk. 3:22. 36Aw a reh hnu chuan Isua chauh chu an hmu a. Chûng lai chuan an thil hmuh chu an ngawihpui tlat a, tu mah eng mah an hrilh lo.

Thlarau bawlhhlawh pai naupang tihdam

(Mt. 17:14-18; Mk. 9:14-27)

37A tûka tlâng ata an chhuk chu mipui nasa takin an lo hmuak a. 38Mipui zînga pa pakhat chu a au chhuak a, “Zirtîrtu, ka fapa, ka fa neih chhun chu, en tûrin ka ngên a che; 39thlarauvin a man fo mai a, a khawih ṭê tuar tuar ṭhîn a, chilphuan tla bawrh bawrhin a sawisa a, thi ang dêrin a kalsan ṭhîn. 40I zirtîrte hi hnawt chhuak tûra ka ngên lahin an thei si lo,” a ti a. 41Isuan a chhâng a, “Tûnlai mi, rinna tlachham leh tihmawhte u, eng chen nge in hnênah ka awm anga, ka dawh theih dâwn che u? I fapa chu han hruai teh,” a ti a. 42A rawn hruai laiin ramhuai chuan a ṭhuai thlu a, a sawisa nek a. Nimahsela, Isuan thlarau bawlhhlawh chu a hau va, naupang chu a tidam a, a pa hnênah chuan a pe ta a. 43Mi zawng zawng chuan Pathian ropuizia chu mak an ti êm êm a.

Isuan a thih tûr thu a sawi leh

(Mt. 17:22,23; Mk. 9:30-32)

44Mi zawng zawngin a thil tihte mak tia an ngaihsân êm êm lai chuan a zirtîrte hnênah, “Hêng thu hi nangni bengah chuan châm reng rawh se. Mihring Fapa hi mihringte kuta mantîr a ni dâwn si a,” a ti a. Nimahsela, a thu sawi chu a ngaihna an hre lo. 45An hriatthiam theih loh nân an lakah thup a ni; chu thu chu amah lah an zâwt fiah ngam bawk si lo.

Tu nge ropui ber

(Mt. 18:1-5; Mk. 9:33-37)

46An zîngah tu nge ropui ber ang tih thu-ah an lo inhnial a.#Lk. 22:24. 47Isuan an thil ngaihtuah chu a hria a, naupang tê hi a kai a, a bulah a dintîr a, 48an hnênah, “Tu pawh he naupang hi ka hming avânga lâwm chu kei mi lâwm a ni; kei mi lâwm chu mi tîrtu lâwm a ni; in zînga tê ber hi a ni ropui ber,” a ti a.#Lk. 10:16; Mt. 10:40; Jn. 13:20.

Dodâl lo che u chu in lamṭang an ni

(Mk. 9:38-40)

49Tin, Johana chuan ani chu a bia a, “Hotupa, mi pakhat i hminga ramhuaite hnawt chhuak kan hmu a, keini anga a zui ve loh che avângin khap kan lo tum asin,” a ti a. 50Isuan a hnênah, “Khap suh u. Tu pawh dodâl lo che u chu in lamṭang an ni ngai e,” a ti a.

Samari mite khuaah Isua a hnawng

51Amah hruai chhoh hun a lo hnaih chuan Jerusalem-a kal a tum lui tlat a. 52A hmaah lamkal a tlântîr a. Anni chu an kal a, a tân engkim lo buatsaih fel tûrin Samari mite khaw pakhatah an lût a; #Lk. 17:11; Jn. 4:40-42. 53mahse, Jerusalem pana kal zêl a tum tlat avângin an lo ngaihsak lo va. 54Tichuan, a zirtîr Jakoba leh Johana chuan chu chu an han hmuh ve chuan, “Lalpa, hêngho kan hlum vek nân hian vân ata#9:54 Mss ṭhenkhatah ‘Elija ang khân’ tih a tel. mei ko thla ila i duh em?” an ti a. #2 Lal. 1:9-16. 55Ani erawh chu a han lehhawi a, a kamkhat a; 56khaw dangah#9:56 Mss ṭhenkhatah ‘In thu sawi hmang chu in hre lo va ni, Mihring Fapa hi mihring nun tiboral tûr ni lovin, chhanhim tûra lo kal a ni zâwk,’ tih a tel. an kal ta a.

Isua zui tumte

(Mt. 8:19-22)

57Kalkawnga an kal laiin mi pakhatin a hnênah, “I kalna apiangah ka zui ang che,” a rawn ti a. 58Isuan, “Sihalten kua an nei a, chunglêng savate pawhin riahhmun an nei; Mihring Fapa erawh hi chuan lu nghahna hmun tûr a nei lo,” a ti a. 59Mi dang hnênah, “Mi zui rawh,” a ti ve thung a. Ani chuan, “Lalpa, ka pa ka va vui ta zet ang e aw?” a ti a. 60Isua erawh chuan, “Mitthiin anmahni mitthi chu lo vui mai rawh se; nang erawh chuan Pathian ram thu hi va hril darh zâwk rawh,” a ti a. 61Mi dangin, “Lalpa, ka zui ang che, amaherawhchu, in lama mite ka va chibai zet ang e,” a ti a. #1 Lal. 19:20; Fil. 3:13. 62Chu mi hnênah chuan Isuan, “Leilehnaa kut nghat reng chunga hnung lam hawi bawk si chu tu mah Pathian ram mi ni tlâk an awm lo ve,” a ti a.

Currently Selected:

LUKA 9: MIZCLBSI

Highlight

Copy