LUKA 8

Isua rawngbâwlsaktu nuho

1Chûng hnu lawkah chuan khaw lian leh khaw tête fangin Pathian ram Chanchin Ṭha chu hrilin a puang zêl a; Sâwmpahnihte pawh an tel ṭhîn. 2Nu ṭhenkhat, thlarau bawlhhlawh pai tihdamte leh na dam lehte pawh an tel bawk; Magdala khaw mi, a kawchhûng ata ramhuai pasarih chhuak ta Mari an tih te, #Mt. 27:55,56; Mk. 15:40,41; Lk. 23:49. 3Heroda sum enkawltu Chuza nupui Joani te, Susani te leh mi dang tam takte chu; chûngte chuan anmahni neihin Isua leh a hote rawng an bâwlsak ṭhîn.

Buh chi thehtu tehkhin thu

(Mt. 13:1-9; Mk. 4:1-9)

4Tin, mipui nasa tak an lo pung khâwm a, khaw tin ata miin an rawn pan huai huai a; tehkhin thu hmangin thu a lo hrilh a. 5“Buh chi thehtu chu buh chi thehin a feh a; chutia a han theh chuan a ṭhen kawngah a tla a, miten an rap mai mai a, chunglêng savaten an tlân zo ta thuai a. 6A ṭhen pialtlêp chungah a tla a, ṭo chu a han ṭo thuai a; mahse, a hnâwn loh avângin a râwp ta mai a. 7A ṭhen hnimhlîngnei zîngah a tla a, hnim chuan a ṭhan khalh a, a dîp ral ta a. 8A ṭhen lei ṭhaah a tla a, a lo ṭhang lian a, a lêt za-in a rah ta a,” a ti a. Chûng thu chu a sawi a, “Ngaihthlâkna beng nei chuan ngaithla ngun rawh se,” tiin a au va. #Mt. 11:15.

Tehkhin thu sawi chhan

(Mt. 13:10-17; Mk. 4:10-12)

9A zirtîrte chuan chu tehkhin thu chu eng tihna nge tih an zâwt a. 10Ani chuan, “Pathian ram thu ril chu nangni hriat atâna tih a ni a, mi dangte tân erawh chuan thu harsa a ni; hmu reng mah se an hmuh fiah theih lohva, hre mah se an hriatthiam loh nân. #Isa. 6:9 (LXX); Jer. 5:21; Ezek. 12:2.

Buh chi thehtu tehkhin thu awmzia

(Mt. 13:18-23; Mk. 4:13-20)

11“Tehkhin thu awmzia chu hei hi a ni: Buh chi chu Pathian thu hi a ni. #1 Thes. 2:13; 1 Pet. 1:23. 12Kawnga mi chu thu ngaithlatute an ni, an awih lohva chhandam an nih loh nân Diabola a lo kal a, an thinlunga thu chu a lâk zawhsak ṭhîn. 13Pialtlêp chunga mi chu, an hriat veleh thu chu lâwm taka pawm tate hi an ni; nimahsela, zung rêng an kai lo va, rei lo tê zawng an awih mai a, thlêmna an han tâwk hlek a, an tlûksan leh mai ṭhîn. 14Hnimhlîngnei zînga tlate chu thu chu an hria a, a han ṭhang ve a; mahse, dam chhûng khawsak engtona leh nawmsak duhna chuan a rawn dîp a, rah puitling a chhuah ve ta lo va ni. 15Lei ṭhaa mi chu hêngte hi an ni, thu chu hriaa, rilru dik leh ṭha pua, vawng tlata, bei hrâm hrâma rah chhuah tate hi an ni.

Khâwnvâr bêla khuh

(Mk. 4:21-25)

16“Tu man an khâwnvâr hâl chu bêlin an khuh ngai lo, khum hnuaiah pawh an dah ngai hek lo, a lût apiangin a êng an hmuh theih nân a dahnaah an dah zâwk ṭhîn. #Mt. 5:15; Mk. 4:21; Lk. 11:33. 17Eng mah puan leh loh tûra zêp a awm lo, hriat loh tûr leh tihlan loh tûrin eng mah thuhrûk a awm hek lo.#Mt. 10:26; Mk. 4:22,23; Lk. 12:2; Efe. 5:13. 18Chutichuan, in thu dawnsawn dânah fîmkhur rawh u, a nei apiang chu an pêk belhchhah ang a, a nei lo chu neia a inhriat chhun pawh an lâksak ang,” a ti a. #Mt. 13:12; 25:29; Mk. 4:24,25; Lk. 19:26.

Isua nu leh unaute

(Mt. 12:46-50; Mk. 3:31-35)

19A nu leh a unaute pawh a hnênah an lo kal a; nimahsela, mipui avângin an pawh thei lo va. 20“I nu leh i unauten hmuh tum chein pâwnah sâwn an nghâk a che,” tiin an hrilh a. 21Ani chuan a chhâng a, “Pathian thu hriaa zâwmte hi ka nu leh ka unaute an ni e,” a ti a.

Thlipui hau reh

(Mt. 8:23-27; Mk. 4:35-41)

22Ni khat chu a zirtîrte nên lawngah an chuang a, an hnênah, “Dîl râl lehlamah sâwn i kai ang u,” a ti a, an chhuak ta a. 23Chutia an kal lai chuan a lo muhîl a, dîlah chuan thlipui a lo tleh chhuk phut a, an lawng chu tuiin a khat dâwn ta mai a, an ngaihtuahawm ta hle a. 24A hnênah an kal a, an kai tho va, “Hotupa, hotupa, kan boral dâwn e,” an ti a. Ani chu a lo tho va, thli leh tuifâwn chu a hau va; a bâng a, a reh ta ṭhuap a. 25An hnênah chuan, “Khawiah nge in rinna?” a ti a. An hlau va, mak an ti êm êm a, “He mi hi tu nge ni le? Thli leh tui lam pawh thu a pe a, an awih mai hi!” an inti hlawm a.

Gerasin mi ramhuai man tihdam

(Mt. 8:28-34; Mk. 5:1-20)

26Galili ram zâwn Gerasin#8:26 Mss ṭhenkhatah ‘Gergasin, Gadarin’ tihte a ni. mite ramah chuan an va kai a. 27Khawmuala a chhuah chuan khuaa mi, ramhuai man pakhat hian a rawn pan a. Chu mi chu rei tawh tak puan sin lovin inah pawh awm lovin thlânahte a chêng ṭhîn a. 28Isua a han hmuh chuan a au va, a hmaah a bawkkhup a, ring takin “Isu, Pathian chungnungbera Fapa, ka chungthu-ah rawn inrawlh i tum elo? Mi nghaisa lul lo tûrin ka ngên a che,” tiin a au va. #Mk. 1:24; Jn. 2:4. 29Chu mi kawchhûnga thlarau bawlhhlawh chu chhuak tûrin thu a lo pe tawh si a. Ramhuai chuan vawi tam tak a buan tawh ṭhîn a, khaidiat te, kawlte an buntîr a, an vêng ṭhîn a; nimahsela, an hlinnate chu a tichat a, ramhuai chuan thlalêrahte a hruai ṭhîn. 30Tin, Isuan, “Tu nge i hming?” a ti a. Ani chuan “Sângruka”#8:30 ‘Legion’ chu chu Rom sipai pâwl khat mi 6000. a ti a, a chhûnga ramhuai lût chu an tam êm vâng a ni. 31Leilâwta paih thla lo tûrin amah an ngên chûl a.

32Chumi tlângah chuan vawk rual, tam tak an tla a, an kawchhûnga luh phal tûrin a hnênah an ngên a; ani chuan a phalsak ta a. 33Ramhuaite chuan chu mi chu an chhuahsan a, vawk kawchhûngah chuan an lût a, vawk rual chu khâm kovah chuan an tlân liam a, tuiah an tla hlum ta a.

34A enkawltute chuan thil lo thleng chu an hmuhin an tlânchhia a, khuaa mite leh a chhehvêla mite chu an hrilh a. 35Tichuan, eng thil nge lo thleng ta tih en tûrin mite chu an thawk chhuak a, Isua hnên an lo thlen chuan ramhuai chhuahsan tâka kha puan sina, rilru ngai puin Isua ke bula a ṭhu chu an rawn hmu a, hlauhawm an ti êm êm a. 36Chûng thil hmutute chuan ramhuai man lo dam tâk dân chu an lo hrilh bawk a. 37Gerasin rama mi zawng zawng chuan hlauhawm an tih êm avâng chuan an hnên ata chhuak tûrin an ngên a; tichuan, ani chu lawngah a chuang a, kîr leh a tum a.

38Ramhuai chhuahsana khân a hnêna tel ve zêl a ngên a. 39Nimahsela, Isuan, “I in lamah haw la, Pathianin thil a tihsak che hi va hril zâwk tawh,” tiin a kirtîr ta a. Tichuan, a kal a, khawpui chhûng zawng zawngah chuan Isuan thil a tihsak chu a va tlângaupui ta a.

Jaira fanu leh hmeichhe thi pût tihdam

(Mt. 9:18-26; Mk. 5:21-43)

40Tin, Isua lo kîr leh chu mipuite chuan an lo nghâk ṭuai a, an lo lâwm a. 41Ngai teh, mi pakhat, a hming Jaira, sunagog hotu chu a lo kal a, Isua ke bulah a bawkkhup a, 42a fanu mal kum sâwm leh pahnih vêl mi chu thi chhâwnga a lum reng avângin a ina kalah a ngên a. A kal ta a, innêk tûlh tûlh khawpa mipui nasain an zui a.

43Tin, hmeichhe pakhat kum sâwm leh pahnih thi pût tawh, a sum neih zawng zawng pawh daktor laka sêng zo tawh,#8:43 Mss ṭhenkhatah insênso thu hi a tel lo. tu man an tihdam theih loh chu a hnungah a lo kal a, a puan fêm chu a rawn dek a, 44chawplehchilhin a thi pût chu a reh ta nghâl a. 45Isuan, “Mi dek kha tu nge ni?” a ti a. ‘Kei chu ka ni lo’ an ti ṭheuh va, Peteran#8:45 Mss ṭhenkhatah ‘leh a ṭhiante’ tih a ni. “Hotupa, mipuiin an zîm huai huai che a, an nêk nuk nuk che alâwm,” a ti a. 46Nimahsela Isuan, “Tu emaw zawngin mi dek a ni, thiltihtheihna ka chhûng ata a chhuak tih ka hria a ni,” a ti a.#Lk. 5:17; 6:19. 47Tin, hmeichhia chuan inthup rual a ni ta lo tih a hriatin, khûr chungin a lo kal a, a hmaah a bawkkhup a, a deh chhan leh chawplehchilha a dam tâk mai thu mi zawng zawng hmaah a hrilh ta a. 48Ani chuan, “Ka fanu, i rinna hi i dam phah a ni e, thlamuang takin kal rawh,” a ti a. #Lk. 7:50; 17:19; 18:42.

49A la ṭawng lai mêkin Jaira in ata mi pakhat a lo kal a. “I fanu a thi ta, zirtîrtu hi tihah duh suh,” a rawn ti a. 50Isuan a lo hria a. Jaira hnênah, “Hlau suh, ring mai la, a dam leh ang,” a ti a. 51In chu a va thlen chuan Petera te, Johana te, Jakoba te leh naupang nu leh pa chauh lo chu tu ma luh ve a phal lo va. 52An za chuan an âwm chûm vak vakin an lo ṭah tuar tuar a. Nimahsela, ani chuan, “Ṭap suh u, a thi lo ve, a muhîl a ni zâwk,” a ti a. 53A thi tawh ngei tih an hriat avângin an nuihsan mai a. 54Isua chuan a kut a chelh a, “Mami, tho rawh,” a ti a, a ko va. 55A thlarau chu a lo kîr leh a, a tho ta nghâl a, “Ei tûr eng emaw pe rawh u,” a ti a. 56A nu leh pa chuan mak an ti êm êm a; nimahsela, thil awm dân chu mi dang hrilh a khap tlat a.

Currently Selected:

LUKA 8: MIZCLBSI

Highlight

Copy