LUKA 7

Sipai za hotu bawih tihdam

(Mt. 8:5-13; Jn. 4:43-45)

1Mite hriat atâna a duh ang a sawi zawh chuan Kapernaumah a lût ta a. #Jn. 4:46-53. 2Sipai za hotu pakhat bawih duh tak a dam lo va, a thi lek lek a. 3Isua chanchin a lo hriat chuan a bawih tidam tûra ngên tûrin Juda upate a tîr a. 4Anni chuan Isua hnên an va thleng a, ṭhahnemngai takin an ngên a, “Hei hi i tihsak tlâk a ni e, 5kan hnam hi a hmangaih a, sunagog pawh min saksak a ni,” an ti a. #Tirh. 10:2.

6Tichuan, Isua chu an rualin a kal ve ta a. In a thlen dâwn chuan sipai za hotu chuan a ṭhiante a tîr a, “Lalpa, lo kal harsa duh suh, 7ka in chhûng i luhna tlâk a ni lo va, i hnêna lo kal tlâkah pawh ka inngai lo va ni; thu pe la, ka nau chu a dam mai ang. 8Kei pawh mi thuhnuaia awm ka ni a, ka hnuaiah sipaite an awm leh chhâwng a, ‘Kal rawh,’ ka tiha chu a kal a, ‘lo haw rawh,’ ka tiha chu a lo haw mai a, ka bawih pawhin ‘hei hi ti rawh,’ ka tih chu a ti mai ṭhîn,” a ti a. 9Tin, Isuan chu chu a hriatin chu mi chu mak a ti hle a, a lehhawi a, a zuitu mipui hnênah, “Ka hrilh a che u, heti êma ring nasa hi Israel-te zîngah tu mah ka hmu lo,” a ti a. 10Mi tirhte kha inah an va haw leh chuan bawih chu damin an va hmu a.

Nain hmeithai fapa kaihthawh

11A hnu lawkah khaw pakhat Nain an tihah chuan a kal a, a zirtîrte leh mipui nasa tak an kal ve a. #1 Lal. 17:17-24; 2 Lal. 4:32-37. 12Khaw kulh kawngka a thlen dâwn chuan, ngai teh, mitthi an rawn zâwn chhuak a; a nu chu hmeithai a ni a, a fapa mal a ni. Khuaa mi tam tak pawh an lo kal ve a. 13Lalpa chuan a han hmuhin chu nu chu a khawngaih ta êm êm a, “Ṭap tawh suh,” a ti a. 14A va hnaih a, hlâng chu a chelh a, a zâwntute pawh chu an ding ta a; “Tlangvâl, tho rawh, ka ti a che,” a ti a. 15Mitthi chu a ṭhuchhuak a, a lo ṭawng ta a, a nu hnênah chuan a pe a.

16Mi zawng zawngin an hlau ta a, Pathian an fak a, “Kan zîngah zâwlnei ropui tak a lo awm ta a nih hi,” an ti a; “Pathianin a mite a rawn tlawh ta a nih hi,” an ti bawk a. #Lk. 7:39; 24:19; Mt. 21:11; Jn. 6:14. 17Chûng thu chu Judai ram zawng zawngah leh a kiang vêl ram tinah a thang chhuak ta a.

Baptistu Johana mi tirhte

(Mt. 11:2-19)

18Chûng thu zawng zawng chu Johana zirtîrte chuan an pu chu an hrilh a. 19Johana chuan a zirtîr pahnih a ko va, Lalpa hnênah chuan a tîr a, “Lo kal tûra chu i ni nge, mi dang kan la nghâk ang?” tiin. 20Chu mite chu Isua hnên an va thleng a, “Baptistu Johanan, ‘Lo kal tûra i ni nge mi dang kan la nghâk ang?’ tiin i hnênah min tîr a ni,” an ti a. 21Chutih lai tak chuan Isuan mi tam tak, natna tuar te, hripui vei te, thlarau bawlhhlawh paite a tidam a, mitdel tam tak pawh an mit a lo tihvârsak a. #Mt. 4:23; Mk. 3:10. 22Tichuan, anni chu a chhâng a, “Kal leh ta ula, in thil hmuh leh in hriatte hi Johana chu va hrilh tawh u; mitdelte chu an mit a vâr a, kebaite kein an kal a, phârte an thianghlim a, bengngawngte pawh an beng a vâr a, mitthite kaihthawh an ni ta a, pachhiate hnênah Chanchin Ṭha hrilh a ni ta. #Isa. 29:18,19; 35:5,6; Lk. 4:18,19. 23Tu pawh ka laka beidawng lo chu an nihlawh e,” a ti a.

24Johana mi tirhte an haw hnu chuan mipui hnênah Johana chungchâng a sawi ta a. “Eng ennawm en tûrin nge thlalêrah in kal? Thli chhêm nghîn luang maw? 25A nih leh tu en tûrin nge in kal? Puan nêm sina inchei maw? Puan nêm sin leh mi neinungte chu lal inah asin an awm. 26Eng ber en tûrin nge in kal? Zâwlnei en tûrin maw? A nih ngei kha; ka hrilh a che u, ani chu zâwlnei ai pawha ropui zâwk a ni. He mi hi alâwm:

27‘Ngai teh, ka tirhkoh i hmaah ka tîr a,

Ani chuan i hmaah i kawng a buatsaih ang,’

tia a chanchin an ziak kha. #Mal. 3:1; Mk. 1:2. 28Ka hrilh a che u, hmeichhe hrin zîngah Johana aia ropui zâwk an awm lo; amaherawhchu, Pathian rama mi tê ber pawh ani ai chuan a ropui zâwk,” a ti a.

29Vântlângho leh chhiahkhawntute chuan Johana thu an hriatin Pathian thiltih dik tak chu pawmin a baptisma an chang hlawm a; #Mt. 21:32; Lk. 3:12. 30Farisai-te leh Dân hremite erawh chuan baptisma chu an chang ve duh lo, anmahni tâna Pathian remruat chu an duh lo a ni.

31Isuan, “Tûnlai mite hi eng nên nge ka tehkhin ang? Eng ang nge an nih? Naupang dâwrpui hmuna ṭhu-a, inau tawna,

32‘Phênglâwng kan tumsak che u a, in lâm lo va,

kan ṭap vak a, in ṭap chuang bawk si lo,’

intite ang hi an ni. 33Baptistu Johana chu a lo kal a, chhang a ei lo va, uain a in hek lo va, nangnin ‘ramhuai a zâwl a nih hi,’ in ti a. #Lk. 1:15. 34Mihring Fapa a lo kal a, a eiin a in a, nangnin, ‘En teh u, mi vir, uain heh mi, chhiahkhawntute leh mi sualte ṭhian saw,’ in ti leh si a. #Lk. 5:29; 7:36; 11:37; 14:1,2. 35Nimahsela, Pathian finna dikzia chu a pawmtuteah a lang chhuak a ni,” a ti a.

Hmeichhe sual ngaihdam

36Farisai zînga pakhatin chaw eiah a sâwm a, Farisai inah chuan a lût a, chaw a kîl a. #Mt. 26:6-13; Mk. 14:3-9; Jn. 12:1-8. 37Ngai teh, chumi khuaa hmeichhe sual pakhatin Farisai inah chaw a ei tih a hriat chuan alabasta bûrin hriak rimtui a rawn keng a. 38A hnungah, a ke bulah chuan ṭap chungin a ding a; a mittui chuan a ke chu a far huh a, a sam chuan a zu hru a, a ke chu a fâwp ta ngawih ngawih a, hriak rimtui chu a leih a. 39A sâwmtu Farisai chuan a hmuhin, “He mi hi zâwlnei ni tak tak se chu a dektu hmeichhia hi tu nge a niha, eng ang mi sual nge a nih hi a hre tûr,” a ti rilru a.

40Isuan a hnênah, “Simon, i hnênah thu kam khat sawi tûr ka nei,” a ti a. Ani chuan, “Sawi ta che, Zirtîrtu,” a ti a. 41Isuan, “Mi pahnihin tangka pûktîrtu hnênah lei an ba a, pakhat chuan duli zanga, pakhat chuan duli sawmnga. Rulhna an neih loh avângin a ngaidam ve ve ta a. 42Chutichuan, tu zâwk chuan nge ani chu hmangaih zâwk ang?” a ti a. #Mt. 18:27. 43Simona chuan, “A ngaihdam tam zâwk chuan a ni ang chu,” a ti a. Ani chuan, “I ti dik e,” a ti a. #Lk. 10:28. 44Hmeichhe lam chu a hawi a, Simona hnênah, “He hmeichhia hi i hmu êm? I inah ka lo lût a, nangin ka ke silna tûr tui mi pe lo va, ani hi chuan a mittuiin ka ke a tihuh a, a samin a hru a. 45Nangin mi lo fâwp lo va, ani hi chuan a lo luh tirh ata ka ke fawh a bâng lo. 46Nangin ka luah hriak mi thih lo va, ani erawh hi chuan hriak rimtui a leih a ni. 47Chuvângin, ka hrilh a che, a sual zawng zawng chu ngaihdam a ni ta, ani pawhin heti tak hian a hmangaih a ni. Ngaihdamsak nêp chuan a hmangaih nêp ṭhîn,” a ti a. 48Hmeichhe hnênah chuan, “I sualte ngaihdam a ni ta,” a ti a.#Mt. 9:2; Mk. 2:5; Lk. 5:20. 49A chaw kîlpuite chuan, “Sualte pawh ngaidam ta mai chu tu nge maw a nih le?” an inti a. 50Tin, anin hmeichhe hnênah chuan, “I rinna hian a chhandam che a ni, thlamuang takin kal rawh,” a ti a.#Mt. 9:22; Mk. 5:34; Lk. 8:48.

Currently Selected:

LUKA 7: MIZCLBSI

Highlight

Copy