MARK 13
13
Tenla Ki Raksatsü Indang Shinba
(Mat. 24.1-2; Luk. 21.5-6)
1Pa tenla kidang nungi adokdang pa nütsüngtem rongnung kati pa dang ashi, “Tesayur, ajiang, kechi amala tesüngmangtsü lung aser kechi amala kitem,” 2Yisui pa dang langzü, “Item ki tulu nai nguali ma? Melokshidaktsüi idaki lung ka manung lung ka anünga malitsü.”
Timtem Toushi Tenzükba
(Mat. 24.3-14; Luk. 21.7-19)
3Oliv tenem nung tenla ki jakdang pai mena alidang, Peter, Yakob, Yohan aser Andria nungeri pa dang miima asüngdang, 4“Itemi kodang ataloktsü, aser item ajak ataloktsü mapang aitdang temaitsü kechi asütsü, onok dang shiangma.” 5Yisui parnok dang ashitsü tenzük, “Shingaia nenok mashileni manidaktsütsü kümdangangma. 6Kechiaser aikati ‘Ni paji lir’ ta kü tenüng nung jembia arutsü aser parnoki aika mashileni anitsü. 7Aser kodang nenoki raraba indang aser rara adoktsüba osang angashidir; nenok taoksama; item ya ataloktsüla, saka tatem ano masü. 8Kechiyong kini kin anema aser yimli-i yimli anema aramesotsü, tesem tesem nung menoknok anoktsü aser ayawara alitsü. Item ya tekangshitsü tetenzüker asütsü. 9#Mat. 10.17-20; Luk. 12.11,12 Saka nenoki pei sasa kümdangangma; kechiyong parnoki nenok mungdang nem bendanga agütsütsü, sinagog nung nenok dak azüktsü aser yimsüsür tulur o chubatem madak ni asoshi nenoki parnok tsüngdang kuli asütsü. 10Aser Osangtajungji kin ajak dang tamasa sangoktsütsüla. 11Kodang parnoki nenok o bendangdaki anir arudir, nenoki kechi jembitsü mapang matongdang kecha teratama, saka iba mapang nung nenok nem kechisa agütsüdir aji jembiang, kechiyong tejembirtemji nenok masü, saka Tanela Temeshi asütsü. 12Saka adianui adianu aser tebui techir südaktsütsü asoshi bendanga agütsütsü; aser techiri tsüraburtem anema apusotsü aser parnok südaktsütsü. 13#Mat. 10.22 Aser kü nüng atema nisung ajaki nenok sempatsü; saka shibai tatem tashi aremdir pa kümzüktsü.
Timtem Tekangshi Tulu
(Mat. 24.15-28; Luk. 21.20-24)
14 #
Dan. 9.27; 11.31; 12.11 “Saka nenoki kodang tesempatsü tesamaba nisung, Tsüngrem temeshi kidang, kong pa noktaka alitsü metemsü, idakji noktaka ngudir (shibai azünger pai angatetang), idangji Yihuda lima nung alirtem tenemleni jenang. 15#Luk. 17.31 Aser shiba par kilem manung ali pa par kidang nungi kecha abentsü telu, mesüra tei; 16aser shiba alu nung ali pa pei sü abentsü meyipa tetugu. 17Saka iba tensa nung temang mazüngertem aser mama yongdaktsürtem asoshi aiatai! 18Aser aji tsüngkhüm nung masütsü nenoki sarasadema liang. 19#Dan. 12.1; TMa. 7.14 Kechiyong item anogo nungji timtem tekangshi tulu alitsü, Tsüngremi alima yangluba tenzükli nungi tang tashi iba ama maliasü, aser kodanga malitsü. 20Saka Kibubai item anogo mesüktoktsü asübo, nisung shinga mekümzüki lila; saka teshimtetpur, shir pai shimtet, parnok asoshi pai anogoji süktoktsü. 21Anungji nisung kari nenok dang, ‘Ajiang, Khrista yangi lir!’ mesüra ‘Ajiang, pa yangji lir’ ta shira aji tamangma. 22Kechiyong tiyazü Khristatem aser tiyazü ainkartem adoktsü aser takoktsü süra, teshimtetba purtem mashileni anitsü asoshi temaitsü aser tesüngmangtsü sayutsü. 23Saka nenok kümdangangma; ajiang, ni nenok dang tamasayongi ajak shiogo.
Nisung Chir Aruba
(Mat. 24.29-31; Luk. 21.24-28)
24“Saka item anogo nungji, iba timtem tekangshi süir külen, anü mangadoktsü aser itai pei tesangwa magütsütsü. 25#Isa. 34.4; Yoe. 2.10; TMa. 6.13 Aser anüng nungi petinutem tsüktsü aser anüng nung aliba aintem anokshitsü. 26#Dan. 7.13; TMa. 1.7 Aser idangji Nisung Chir ain aser sentsüwangshi tulu den mepet nung aruba parnoki angutsü. 27Idangji pai kotak tenyartem yoktsü aser ali tatem külen nungi kotak tatem külen tashi, kinük pezü sülen nungi, pei teshimtetba purtem anitentsü.
Mungudong Nungi Tangazüktsü
(Mat. 24.32-35; Luk. 21.29-33)
28Mungudong nungi o-entepbaji angazükang; kodang pa kongsang lanu küma to adokdir mei anasa lir ta nenoki metet. 29Anungji nenokia itemi ataloka aruba angudang, pa ana nung, oda kishizüng nung lir ta metetang 30Atangji ni nenok dang ashir, item ajak matalok tashi iba putu süia maotsü. 31Anüng aser ali süitemtsü, saka kü o mesüitemtsü.
Memetetba Anogo aser Mapang
(Mat. 24.36-44)
32“Saka iba anogo mesüra mapang indang, Tebu alema kotak tenyartemia, mesüra, techiria mesüra shingaia memetet. 33Nenoki kümdanga liang, saksalemang aser sarasademang; kechiaser mapangji kodangar nenoki memetet. 34Ya tanga linüki aeni aoba nisung ka mesüker, shibai pei kilirtem nem tashi agütsür, nisung shia nem pei pei mapa nungloktsür kinüker dang saksalema liang ta ozüng agütsür pei ki toktsür bendang limai talangi aeni ao. 35Anungji saksalemang, kechiaser ki kiburji nikongtsütsü asü, ayatrem nung asü, an kongbang nung asü, anepdang asü, kodang arutsüar nenoki memetet. 36Aji mesüra pa aoksa arutsü aser pai nenok mejanga angutsü. 37Aser ni nenok dang kechi ashir, aji nenok ajak dang ashir saksalema liang.”
Currently Selected:
MARK 13: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
