MARK 12

Tsükmenatzü Lu aser Aluyimertem

(Mat. 21.33-46; Luk. 20.9-19)

1 # Isa. 5.1,2 Pai parnok den o-entepba agi jembitsü tenzük “Nisung kati tsükmenatzü lu ayim, aser aji meketa atsü agi atsübang, aser temenüngdak tarok ka tupok, aser semtu ka yanglu. Aji sür külen aluyimertem nem aji yimdaktsütsü toktsür alinük talang kati ao. 2Kodang mapang tonga aru, aluyimertem nungi tsükmenatzü lu süngjang angutsü atema pai kilir ka yok. 3Aser parnoki pa apu, pa dak azük aser teka tazüng meyipa yok. 4Aser pai parnok dangi kilir tanga ka yok; parnoki pa tekolak nung yirutsü aser pa dak maksüa benshi. 5Pai ano ka yok, parnoki pa tepset, yamaji ano aika yok; kar dak parnoki azük aser kar tepset. 6Pa ano tanga ka-a liasü, Temeimba chir ka, parnok dangi pa tatemsa yoka ashi, ‘Parnoki kü chirbo akhüm tsübutsü.’ 7Saka item aluyimertemi parnok o parnok na jembitepa ashi, ‘Ibai senmangbaji lir, arung, asenoki pa tepsetdi aser senmangji asenok meyong asütsü.’ 8Parnoki pa apu aser tepset, aser tsükmenatzü lu tezülen endok. 9Tsükmenatzü lu kibuba jagi kechi inyaktsü? Pai arutsü aser aluyimertemji samatsütsü, aser tsükmenatzü luji tangar nem agütsütsü. 10Nenoki iba lai mezüngdangka ma:

‘Kisürtemi koba lung magi,

aji kinük nung tongtiba aküm;

11 # TKe. 118.22 Aji Kibubai inyakba,

aser aji asen nükdang tesüngmangtsü lir.’”

12Aser parnoki pa aputsü bushi saka parnoki telokji tsübu, kechiyong o-entepbaji parnok anema jembi ta parnoki metet; anungji parnoki pa toktsür oadok.

Kaisar Nem Alimelen Agütsüba

(Mat. 22.5-22; Luk. 20.20-26)

13Parnoki Farisitem aser Herod telok nungi kar pai jembiba nung pa aputsü asoshi pa dangi yok. 14Parnok aru aser pa dang ashi, “Tesayur, na ochishir nisung ka aser shinga metsübur ta onoki metet; kechiyong nai nisung jak merepranger saka ochiba agi Tsüngrem lenmang tuyur. Kaisar nem alimelen agütsütsü tim asü masü? 15Onoki agütsütsü asü masü?” Saka parnok anemsüba meteta pai parnok dang ashi, “Kechiba nenoki ni tendanger? Ni ajidangtsüsa kü dangi adholi ka bener arung.” 16Parnoki adholi ka bener aru. Aser pai parnok dang asüngdang, “Ya shiba mesükba noksa aser tenüng züluba?” Parnoki pa dang langzü, “Kaisar.” 17Yisui parnok dang ashi, “Ajangla kechi Kaisar meyong aji Kaisar nem agüjang, aser kechi Tsüngrem meyong aji Tsüngrem nem agüjang.” Aser parnoki pa dang kanga süngmangadok.

Shia aruba Indang Asüngdangba

(Mat. 22.23-33; Luk. 20.27-40)

18 # TMa. 23.8 Sadukitem, shiri shia aruba mali ta ashi, parnoki pa dangi aru aser parnoki pa dang asüngdanga ashi, 19#Taz. 25.5 “Tesayur, nisung ka tedi, techir metoktsüi kinungtsü ka toktsür süadokra, tenui pa kinungtsüji agitsü aser tedi asoshi metsü adokdaktsütsüla ta Mosai onok nem zülua toktsü. 20Adianu tenet liasü; mezüngbuba jagi kinungtsü ka agi, aser pai metsü metoktsüi asü; 21aser tanabubai laji agi, aser techir metoktsüi pa-a asü; aser ano tasembubajia yamaji asü, 22aser tenet pronglai techir metoktsü. Tatemsa tetsürlaji asü. 23Shia aruba mapang nung la shiba kinungtsü asütsü? Kechiyong parnok tenetprongi pei kinungtsü asütsü laji agi.” 24Yisui parnok dang ashi “Laishiba mesüra Tsüngrem ain memetetba yong, nenoki ya aibelener masü no? 25Kechiyong kodang parnok tasüba nungi shia arudir, parnoki ki mayimtsü mesüra kiyi meyoktsü; saka parnok kotak nung tenyartem ama alitsü. 26#Ani. 3.6 Saka tasürtem shia-aruba indang Mosa kaket nung süngsem indang shia alidak yamai mezüngdang ama? ‘Ni Abraham Tsüngrem, Isak Tsüngrem aser Yakob Tsüngrem’ 27Pa tasürtem Tsüngrem masü, saka taküm alirtem Tsüngrem lir; Nenok kanga aibelenogo.”

Ozüng Tuluba

(Mat. 22.34-40; Luk. 10.25-28)

28Tezülurtem rongnung ka aru aser parnok toktepa o jembitepbaji angashi, aser Yisui itemji junga langzüteter ta meteta, pai pa dang asüngdang, “Ozüng rongnung mezüngbubaji koba asütsü?” 29#Taz. 6.4; Luk. 10.25 Yisui langzü “Mezüngbuba ya lir, ‘Oh Israel, angang; Kibuba asen Tsüngrem, Kibubaji ka dang; 30aser Kibuba ne Tsüngremji ne mulungjang ajonga agi, aser ne taküm ajonga agi, aser ne mulungsentsü ajonga agi, aser ne tashi ajonga agi nai pa meimang.’ 31Aser tanabubaji ya lir, ‘Nai ne kiyonger dang pei ama meimtsüla.’ Item dangi tuluba tanga ozüng mali.”

32 # Taz. 4.35 Aser tezülur jagi pa dang ashi, “Tesayur aji shitak; atangji pa ka dang ta nai shitak shiogo, aser tangar shinga mali saka pa dang; 33#Hos. 6.6 aser temulung ajonga agi, aser tangatetba ajonga agi, aser tashi ajonga agi pa meimtsü aser pei kiyonger dang pei ama meimtsübaji rangben tarongba aser tenlabatem ajak dang taoba lir.” 34Aser kodang pai shisa ka-a langzüogo ta Yisui angu, pai pa dang ashi, “Na Tsüngrem yimli nungi talangka masü.” Iba sülenjibo pa dang asüngdangtsü nisung shingaia temulung moulu.

Dawid Chir Indang Tasüngdangba

(Mat. 22.41-46; Luk. 20.41-44)

35Yisui tenla kidang sayudang pai ashi, “Khristaji Dawid Chir ta tezülurtemi koda ashir? 36Dawidi pei sasa Tanela Temeshi nung ashi,

‘Kibubai kü Kibuba dang ashi,

ni ne tsükchirtem ne tsüng kübok mayu tashi

na kü tajichilen menang.’

37Dawidi pei sasa pa dang Kibuba ta aja, anungji kodaser paji pa chir asütsü?”

Aser teloki pa dang pelashishia anga.

Tezülurtem Aitsüba

(Mat. 23.1-36; Luk. 11.37-44)

38Aser pai pei tesayuba nung ashi, “Tezülurtem asoshi kümdangang, shiri sü talang abener jajanür, aser shishidak akhümtsübu den salem aginür. 39Aser sinagog nung temaba menden, aser benjongdak tamaren menden aginür, 40saka shiri amitsür rongsen chireptsür, aser sarasadem talanglang shia sayur, parnoki obendang tesashiba angutsü.”

Amitsür Ka Tenla

(Luk. 21.1-4)

41Aser pai tenla sen rizüngdak jakdang amen, aser nisungtemi koda sen rizüngdak sen enoktsür repranga liasü, aser takar aikati sen jenti enoktsü. 42Idangji amitsür sensaker ka aru aser lai poisa ana enoktsü. 43Pai pei nütsüngtem pa dangi aja, aser parnok dang ashi, “Atangji ni nenok dang ashir, sen enoktsür ajak dang iba sensaker amitsüri timba tenla senbong nung sen enoktsüogo; 44kechiyong parnok ajaki pei jenti akaba nungi agütsü, saka lai pei maka-maitba nungi la taküm alitsü akaba ajonga enoktsü.”

Currently Selected:

MARK 12: AONAGABSI

Highlight

Copy