MARK 14

Yisu Tepsettsü Tasa Asaba

(Mat. 26.1-5; Luk. 22.1-2; Yoh. 11.45-53)

1 # Ani. 12.1-27 Kümtettsü Benjong aser piyazü meinokba benjong atongtsü ananü lia, puti-ungertem aser tezülurtemi ashi-külak agi pa aputsü aser tepsettsü bushimeso. 2Kechiaser parnoki ashi, “Telok rongnung rongrongshishia lir benjong mapang nungbo meinyakli.”

Bethani Nung Totzü Mezütsüba

(Mat. 26.6-13; Yoh. 12.1-8)

3Bethani nung zütsüra adokba Simoner kidang chiyungdak mena alidang, tetsür kati sen jenti alangba teronem menemba totzü temerük bongdang ka bener aru aser lai bongdangji lapok aser pa tekolak nung totzüji mezütsü. 4Saka parnok rongnung kari mepelai ashi, “Kechiba totzüji ya oda lalur? 5Kechiaser totzü ya senpak noklang asem tema yong yoker, sensaker nem agütsütetla.” Aser parnoki la arütsü. 6Saka Yisui ashi, “La oda tokjang, kechiba nenoki la meinprongdaktsür? Lai kü dang mapa tajung ka inyakogo. 7#Taz. 15.11 Kechiaser sensakertem nenok den teti alitsü; aser kodangsa nenoki tajung inyaknüdir, parnok dang tajung inyaktet. Saka nibo nenok den teti malitsü. 8Lai kechi akok aji lai inyakogo lai ni aremtsü asoshi mapang matongdang kü mang nung totzü mezütsüogo. 9Anungji ni nenok dang ashir, alima ajak nung kongsa Osangtajungji sayutsüngidir, la mamatettsüsa lai kechi inyak ya bilemeteta jembitsü.”

Yihudai Yisui Ashioktsütsü Nangzükba

(Mat. 26.14-16; Luk. 22.3-6)

10Yihuda Iskariot, terana rong-nung kati, putiungertem ket nung Yisu bendanga agütsütsü asoshi pai parnok dangi ao. 11Aser parnoki aji kodang angashi, parnoki pela, aser pa nem sen agütsütsü nangzük. Aser pai Yisu parnok nem bendang agütsütsü mapang tajung ka bushi.

Nütsüngtem Den Kümtettsü Benjong Achiba

(Mat. 26.17-25; Luk. 22.7-14,21-23; Yoh. 13.21-30)

12Piyazü meinokba Benjong mezüngnü kodang parnoki kümtettsü san chanuji tenla, pa nütsüngtemi pa dang ashi, “Na asoshi Kümtettsü Benjong achitsüsa onoki kong renemdaktsünür?” 13Pai pa nütsüngtem ana yoka parnok dang ashi, “Yimti jagi oang, aser idakji nisung ka tzü mori ka bener nenok den ajuruteptsü, pa sülen oang, 14aser pa kongi idir, ki kibur dangji shiang, ‘Tesayuri ashi, ni kü nütsüngtem den Kümtettsü Benjong achitsü asoshi kü aener taktang kong ali?’ 15Aser pai nenok dang temaba taktang tulu ka renema akaba aji sayutsü; idakji asenok asoshi renemang.” 16Aser nütsüngtemi ao, aser yimti jagi aru aser pai parnok dang ashiba amaji angu; aji oda parnoki Kümtettsü Benjongji renem. 17Kodang nikongtsütsü aru, pai terana den külemi aru. 18#TKe. 41.9 Parnok langbang nung mener chiyungdang, Yisui ashi, “Atangji ni nenok dang ashir, nenok rongnung kati, oda kü den chiyungsangi ni ashioktsütsü.” 19Idangji parnok jashia aküm aser parnok kati khen kati khen ta pa dang “Aji ni asü?” ta asüngdang. 20Pai parnok dang ashi, “Paji terana rongnung ka, shiba kü den su ka nung külemi chiyunger. 21Kechiaser Nisung Chirbo pa indang zülua aliba ama aor, saka shiba ajanga Nisung Chir ashioktsür, iba nisung asoshi aiatai! Iba nisung asoshibo pa mesoi ali tajungba süla.”

Kibuba Benjong Tenzükba

(Mat. 26.26-30; Luk. 22.15-20; 1 Ko. 11.23-25)

22Aser parnok chiyungdang, pai amtsük bena arua, aji moatsür sangsa aser aji parnok nem agütsü, aser pai ashi, “Chiang, ya kü mang.” 23Aser ano pai marok ka am, aser pai tenüngsang agüja moatsür parnok nem agütsü, aser parnoki iba nungi ajem. 24#Ani. 24.8; Yer. 31.31-34 Aser pai parnok dang ashi, “Ya tezüngzüktepba kü zü lir, koba jentipur asoshi tokshi. 25Atangji ni nenok dang ashir, ni Tsüngrem yimli nung tsükmenatzü tasen majem tashi, joko ni tsükmenatzü süngjang nungi majemtsü.” 26Aser parnoki ken ka tener kimai adoka Oliv tenemi atu.

Peteri Menangzüktsüba Indang Shinba

(Mat. 26.31-35; Luk. 2.31-34; Yoh. 13.36-38)

27 # Zek. 13.7 Yisui parnok dang ashi, “Nenok ajak metsüdaktsü, kechiaser ya zülua lir;

‘Ni sannüker dak azüktsü, aser santemi prokshia aotsü.’

28Aji saka ni shia arur külen, nenok dang tama Galili aotsü. 29Saka Peteri pa dang ashi, “Ajaki metsüdakaka, nibo memetsüdaktsü.” 30Aser Yisui pa dang ashi, “Atangji ni ne dang ashir, tanü, oda taonungsa, ani anaben makongdang, nai ni asemben menangzüktsü.” 31Sakasa Peteri ajang ajanga ashi, “Ni ne den tasütsü liaka, ni na menangzüki malitsü.” Aser parnok ajaki yamaji ashi.

Gethsemane Nung Sarasademba

(Mat. 26.36-46; Luk. 22.39-46)

32Parnok Gethsemane ta ajaba tesem kati aru, aser pai parnok dang ashi, “Ni sarasademdang nenoki idaki mena liang.” 33Pai Peter, Yakob aser Yohan pa den anir ao aser kanga tetsübutsüka timtemmeso. 34Aser pai parnok dang ashi, “Kü taküm tasütsü amato jashir; nenoki yangi ata-ang, aser saksalema liang.” 35Pa tejakleni tatsüka ao aser ali nung apudak, aser kokrabang, iba mapang pa nungi agienjang ta sarasadem. 36Aser pai ashi, “Aba, Oba ne madang ajak takoktsü dang; iba marok ni nungi agienang; aji saka kü mulung masü, ne mulung.” 37Pa meyipa arudang nütsüngtem mejanga angu, aser Peter dang ashi, “Simon, na mejanga alir no? Nai ghonda kata saaka meliteter no? 38Nenok tatitang nung metsüktsü asoshi saksalema liang aser sarasademang; tanelai jangrar saka shi nung tashi mait.” 39Pai tanaben oagi o kasa shia sarasadem. 40Aser pa tanaben arudang pai parnok amua oa angu, kechiaser parnok tenük kanga chilar liasü, aser parnoki pa dang kechianga melangzü. 41Pai tasembenbuba aru aser parnok dang ashi, “Joko mejanga liang aser anisüngzükang. Ya teperi, mapang tongogo; ajiang Nisung chir temenen pur ket nung bendanga agütsütsü. 42Aramesoang, asenoki odi, ajiang, ni ashioktsüba anasa lir.”

Yisu Ashioktsüba aser Apuba

(Mat. 26.46-56; Luk. 22.47-53; Yoh. 18.3-12)

43Idangyongji, pai ano jembia alidang, Yihuda, terana rongnung ka, aser pa den telok tulu ka, nok aser süngsü bener, puti-ungertem o tezülurtem aser tamburtemi yokba tonga aru. 44Tang pa ashioktsübai parnok nem temaitsü ka agüja ashi, “Ni shiba dak tebang mesepdir iba nisungbaji puang aser kümdanga anir oang.”

45Kodang Yihuda aru, pai yakta oa pa dang ashi, “Tesayur.” Aser pai pa dak tebang mesep. 46Aser parnoki pa dak teka ia pa apu. 47Saka anasa noktakba rongnung kati pei nok atsüteter, temaba putir kilir dak lepoktsü, aser pa tenarong leptoktsü. 48Yisui parnok dang ashi, “Nenoki ashi-auür anema arur ama nok aser süngsü amer ni aputsü arur no? 49#Luk. 19.47; 21.37 Tenla kidang ni nenok den anogo shia sayua liasü, idangji nenoki ni mapu, saka Laishiba ataloktsü asoshi ya inyaker dang.” 50Aser parnok ajaki pa toktsü aser ajen.

Asangur Ka Ajenba Indang

51Aser asangur ka shibai sü tanük ka pei mang nung abenloka liasü; pai pa sülen anitaka ao aser parnoki pa apu; 52saka pai sü toktsür mangsa ajen.

Yisu Mungdang Tsüngdang

(Mat. 26.57-68; Luk. 22.54-62; Yoh. 18.13-14)

53Parnoki Yisu temaba putir dangi anir ao, aser pa dangi putiungertem, tezülurtem, tamburtem ajak sentep. 54Aser Peteri temaba putir kima telung tashi oji-oji nungi anitak; aser pa tanükertem den mi wanga mena liasü. 55Tang puti-ungertem aser mungdang ajongai Yisu südaktsütsü asoshi kuli bushi; saka parnoki tai kecha mangu. 56Kechiaser aikati pa anema tiyazü kuli ai, aser parnok kuli meputepi adok. 57Karibo noktaker tiyazü kuli pa anema ia ashi, 58#Yoh. 2.19 “Ni iba teka agi yangluba tenla ki raksatsü, asemnü nung teka agi meyangluba tanga ka yanglutsü ta pai ashiba onoki angashiogo.” 59Aji oda saka parnok kuli meputepi liasü. 60Temaba putir parnok tiyong nungji noktaker Yisu dang asüngdang, “Nai kecha melangzür no? Na anema kechi kuli item nisungi asür?” 61Saka pai kuka mesüi ali aser kecha melangzü. Tanaben temaba putiri pa dang asüngdang, “Na temoatsüba Chir, Khristaji asü?” 62#Dan. 7.13 Idangji Yisui langzü, “Hau Nia.”

“Aser nenoki Nisung Chir

Tajichilen mena aliba Ajak Takoksang,

aser anüng mepet den aruba angutsü.”

63Aser temaba putiri pei sü shisa-a ashi, “Asenok asoshi kuli tali kechi tenüngdaktsü aka? 64#Lev. 24.16 Pai Tsüngrem atalaba nenoki angashiogo. Nenok telemtetbaji kechi? Aser parnok ajaki pa asütsü tetemsü” ta o kuloktsü, 65Kari pa dak metsü metsüloktsü, aser pa tejak nembangtsür pa dak maoktsümeso, aser ashi, “Shin o jembiang.” Aser tanükertemi maokja pa aniok.

Peteri Yisu Menangzükba

(Mat. 26.69; Luk. 22.56-62; Yoh. 18.15-18,25-27)

66Peteri luagi kima kilempok nung alidang, temaba putir kilir aiür chanu rongnung ka aru, 67aser Peter mi wanga alibaji ngua, pa dak ranglok, aser lai ashi, “Na-a Nazaret nunger Yisu den liasü.” 68Saka pai menangzüki ashi, “Nai kechi ashir ni aji temeteta memetet mesüra mangateter.” Aser pai kiküm leni tuguadok, idangji ani akong. 69Aiürla jagi pa tanaben angu, aser anasa noktaka alirtem dang ashi, “Iba nisungbaji parnok rongnung ka lir.” 70Saka tanaben pai menangzük. Tatsüka lir külen noktaka alirtemi Peter dang ashi, “Atangji na-a parnok rongnung ka lir, kechiaser na Galil nunger.” 71Saka pai peiji atakatemtsü, aser azüngashitsü tenzük, “Nenoki shiba indang jembir, iba nisungbaji ni memetet.” 72Aser idangyongjisa ani tanaben akong aser “Ani anaben makong dang, nai ni asemben menangzüktsü” ta Yisui ashiba pai bilemtet. Aser pai temulung raksa aser ajeb.

Currently Selected:

MARK 14: AONAGABSI

Highlight

Copy