MARK 15

Yisu Pilat Tsüngdang

(Mat. 27.1-2,11-14; Luk. 23.1-5; Yoh. 18.28-38)

1Anepdang puti-ungertemi tamburtem, tezülurtem aser mungdang ajak den bangjemteper parnoki Yisu alen aser pa anir oa Pilat nem agütsü. 2Pilati pa dang asüngdang, “Na Yihuda nunger Chubaji asü?” Pai pa dang langzü, “Nai ashir.” 3Aser putiungertemi tesem aika nungi pa aitsü. 4Pilati tanaben pa dang asüngdang, “Nai kecha melangzür no? Parnoki na kwisü nung aitsür ajiang.” 5Saka Yisui joko kecha melangzü; anungji Pilati süngmang.

Yisu Tasütsü Bendanga Agütsüba

(Mat. 27.15-26; Luk. 23.13-25; Yoh. 18.39—19.16)

6Tang benjong mapang nungji parnoki shiba asoshi asüngdangdir, tepuokdak alir ka chioktsüsa liasü. 7Baraba tenüng agi nisung ka yimten anemertem den tepuokdak liasü, shibai yimten anema apusoba mapang nung nisung tepset. 8Aser teloki tur külen parnok dang akhi benshiba ama benshiang ta pa dang asüngdangtsü tenzük. 9Pilati parnok dang ashi, “Ni nenok dangi Yihuda nunger Chubaji chiokdaktsünür asü?” 10Kechiaser mokokaji ajanga puti-ungertemi pa bendanga agütsü ta pai ajitet. 11Saka parnok dangi Baraba-ang pai chiokdaktsütsü asoshi puti-ungertemi telokji ajongmeso. 12Pilati tanaben parnok dang ashi, “Sürabang, nenoki Yihuda nunger Chuba ta ajaba nisung dangji ni kechi inyaktsü?” 13Parnoki tanaben ayimten, “Pa kangki nung angenlokang.” 14Aser Pilati parnok dang ashi, “Kechiba? Pai kechi tamajung inyak?” Saka parnoki tali tesashiba dang ayimten, “Pa kangki nung angenlokang.” 15Anungji Pilati telok mulung chidaktsünü nung, pai parnok dangi Baraba chiok, aser Yisu dak tareptsü lisü agi repdaktsür külen kangki nung pa angenloktsü bendanga agütsü.

Temerangertemi Yisu Menütsüba

(Mat. 27.27-31; Yoh. 19.2-3)

16Temerangertemi pa governor kidangi anir ai; aser parnoki temeranger telok ajak jaten. 17Aser parnoki pa nem nakrema meremba sü ka abendaktsü, aser ayi agi chuba korang ka mesena yanglur, pa dak semoktsü. 18Parnoki pa nem salem agütsü aser ashi, “Yihuda nunger Chuba, sangang!” 19Parnoki pa tekolak nung tzütok kati azük, pa dak metzü metsüloktsü, aser pa akhüm tsübua pa tsüngdang apudak. 20Aser parnoki pa sensatsür külen, pa dak nungi nakrema meremba süji agizük, aser pa nem pei süoshi abendaktsü. Aser pa kangki nung angenloktsü asoshi parnoki pa anir ao.

Yisu Kangki Nung Angenlokba

(Mat. 27.32-44; Luk. 23.26-43; Yoh. 19.17-27)

21Lenmang nungji Simon ta sür nisung ka, shiba yimtaklen nungi yimti jagi süia liasü, aser parnoki pa dang Yisu kangkiji aputsü kangok. Iba Simon ya Cyrene nunger, Alexander aser Rufu na tebu liasü. 22Parnoki Yisu Golgotha, koba tetezü “tekolak-ret” ta ajaba tesem kati anir aru. 23Parnoki pa nem tsükmenatzü yi den teronem menemtsü meyokteper agütsü, saka pai aji magizük. 24#TKe. 22.18 Parnoki pa kangki nung angenlok; aser nisung shia kechi lemzüktsü an toktang, parnoki parnok rongnung pa süoshi lemsa. 25Parnoki pa kangki nung angenlokba mapangji tuku baji meta liasü. 26Pa aitsüba oji yamai zülu, “YIHUDA NUNGER CHUBA.” 27Aser parnoki pa den ashir ana ka tajichilen aser ka tabelen ta angenlok. 28“Pa menen purtem den aroki züngsem” ta Laishibai ashibaji atalok. 29#TKe. 22.7; 109.25; Mar. 14.58; Yoh. 2.19 Pa anasa süisübongertemi pa sensaja pei tekolak angemlokja ashi, “Aha, Na shibai tenla ki raksar asemnü nung yanglutsüba, 30ne sasa kümzükang, aser kangkidong nungi alungjong!” 31Yamaji puti-ungertemi, tezülurtem dena, parnok rongnung pa atalaja ashi, “Pai tangarbo kümzük, saka pa sasa mekümzükteter. 32Onoki ngur amangtsü asoshi, Israel nunger Chuba, Khristaji tang kangki nungi alungjong.” Aser kangki nung pa den külemi angenlokbatemia pa atala.

Yisu Asüba Indang

(Mat. 27.45-56; Luk. 23.44-49; Yoh. 19.28-30)

33Terana baji nungi asem baji tashi alinük ajak nung tammang liasü. 34#TKe. 22.1 Asem baji meta nung Yisui ola adoka ayimten, “Eloi, Eloi, lama sabak thani?” Koba tetezü. “Kü Tsüngrem, kü Tsüngrem kechiba nai ni toktsür?” 35Anasa noktaka alirtem kari aji angashia ashi, “Ajiang, pai Elija ajar.” 36#TKe. 69.21 Kati asema oa, renrajeb ka nung yi tasen agi süngdaktsür, rangdong ka nung aji toloker, pa nem tajemtsü agüja ashi, “Atangji Elija pa ajungzüktsü arudisü marulir asenoki ajia lidi.” 37Aser Yisui ola tulu ka adok, aser pa asü. 38#Ani. 26.31-33 Aser tenla ki teyindangba sü temalen nungi tetsünglen tashi ana küma shima. 39Aser noklang madak kibur shiba pa jakdang noktaka liasü, pai pa yamaji asüba ngua ashi, “Atangji iba nisung ya Tsüngrem Chir liasü.” 40Aser tetsürtemi oji nungi repranga liasü, item rongnung Mari Magdalin, aser Yakob tanubusang o Yosef na tetsü Mari, aser Salome dena liasü; 41Shiri pa Galil nung alidang, pa sülen anitak, aser pa yaria liasü, aser tangar tetsür aika pa den Yirusalemi aruba, parnok den liasü.

Yisu Aremba Indang

(Mat. 27.57-61; Luk. 23.50-56; Yoh. 19.38-42)

42Aser nikongtsütsü akümdang, kechiaser aji terenemba anogo, tetezü, Amungnü atongtsü anogo ka lia, 43Arimathia nunger Yosef, mungdang nung tamaren züngsem ka, shibai Tsüngrem yimli asoshi ata-a liasü, tasü ita Pilat dangi ao, aser Yisu mang meshi. 44Pilati Yisu asüba meteta süngmanga liasü, anungji noklang madak kibur ka jar, pa joko sür südi ta asüngdang. 45Noklang madak kibur jagi pa süogo ta kodang ashi, pai tasü mangji Yosef nem agütsü, 46Aser pai sü tanük ka alir, pa ajungzüka sü tanük nungji alung, aser lung nung angenpoka aliba leprungki nung ayu; aser leprungki kikümbangji lungpak kati nembanga toktsü. 47Mari Magdalin aser Yoses tetsü Mari pa kong ayu aji angu.

Currently Selected:

MARK 15: AONAGABSI

Highlight

Copy