MATHI 10

Nütsüng Terana Yokba

(Mar. 3.13-19; Luk. 6.12-16)

1Yisui pei nütsüng terana pa dangi aja aser temenen tanelatem aridoktsü aser tashitak tapu ajak aser shirangba ajak anebtsütsü tashi-ain pai parnok nem agütsü. 2Tang nütsüng terana tenüngji itemi lir: Mezüngbubaji, Simon, shiba dang Peter ta aja, aser pa tenu Andria; Zebedi chir Yakob aser tenu Yohan; 3Filip aser Bartholoma; Toma aser ali melen sarur Mathi, Alfa chir Yakob aser Thadia; 4Kanan nunger Simon, aser Yihuda Iskariot, shibai Yisu bendanga agütsü.

5Item terana Yisui yoka parnok dang mela-a ashi, “Bendangertem lenmang kechaia tuo, aser Samaria nunger yimti katia tei. 6Saka tesamaba Israel kidong santem dangi ang oang. 7Aser nenoki aodang, ‘Kotak Yimli anasa lir’ ta shia sayutsüngiang. 8Shirangertem anebjang, tasürtem shia arudakjang, zütsüra aketertem meshitetjang, aser temenen tanelatem aridokang. Nenoki angati angu, angati agüjang. 9Nenok juli nung hon mesüra taribi mesüra sen teben. 10#1 Ko. 9.14; 1 Ti. 5.18 Nenok lenmang asoshi yangku, mesüra sepoksü ana, mesüra tsüngsem, mesüra mechi teben; kechiaser inyakerbo pei chiyungtsü angutsü tetemsü. 11Aser kechi yimti mesüra yimi nenok idir, yangji shiba tetemsü lir, bushiang; aser nenok mao tashi yangji liang.

12“Aser nenok ki jagi aidang, salem agüjang. 13Aser kiji temsüa lira, nenok tesünep iba madakji arudakjang; saka kiji metemsü lira, nenok tesünep nenok dangi meyipdakjang. 14#TMa. 13.51 Aser shirisa nenok magizüklir, mesüra nenok o mangalir, nenoki iba ki mesüra iba yimti nungi adokdang nenok tetsüng nungi auyi temdokang. 15#Lip. 19.24-28 Atangji ni nenok dang ashir, o bendangba anogo nung iba yimti dang nungi Sodom aser Gomora tia azüzüktsü temelaba alitsü.

Tarutsü Aliba Rishikangshi

(Mar. 13.9-13; Luk. 21.12-17)

16 # Luk. 10.3 “Ajiang, tsünütem rongnung santem ama ni nenok yokdagi. Anungji nenok per ama shisa ka-a liang, aser posü ama ajemalu sang. 17Saka nisungtem asoshi kümdangang, kechiaser mungdang o bendang dak parnoki nenok bendanga agütsütsü aser par sinagogtem nung parnoki nenok dak areptsü. 18Aser parnok tsüngdang aser Bendangertem madang kuli asütsü asoshi yimsüsürtem aser chubatem tsüngdangi ni asoshi parnoki nenok anir aotsü. 19Saka kodang parnoki nenok bendanga agütsüdir, nenoki koda jembitsü mesüra kechi jembitsü ta shisa tebulu; kechiaser nenoki kechi jembitsü tim iba mapang nungjisa aji nenok nem agütsütsü. 20Kechiaser tejembibaji nenok masü, saka nenok Tebu Tanelai nenok ajanga jembir. 21#Mar. 13.12; Luk. 21.16 Adianui adianu aser tebui pei chir, tasütsü bendanga agütsütsü. Aser techirtemi tsüraburtem anema apusotsü aser parnok südaktsütsü. 22#Mat. 24.9,13; Mar. 13.13; Luk. 21.17 Aser kü tenüng nung nisung ajaki nenok sempatsü; saka shibai tatem tonga aremdir, kümzüktsü. 23Saka kodang yimti ka nung parnoki nenok rishikangshidir, tanga yimti kati jenang; kechiaser ni nenok dang züngpong ashir, Nisung Chir marudang, nenoki Israel yimtitem sema moumai alitsü.

24“Nütsüng kaji tesayur dang temaba masü, mesüra alar kaji pei kibur dang temaba masü; 25#Mat. 9.34; 12.24; Mar. 3.22; Luk. 11.15 Nütsüng kaji pei tesayur ama lira, pa asoshi aji teperi, aser alar kaji pei kibur ama lira aji teperi. Parnoki pei kibur dang Belzebul ta jara, pa kidang alirtem dang koda tali parnoki ajatsü.

Shiba Dang Tsübutsü Tim

(Luk. 12.2-7)

26 # Mar. 4.22; Luk. 8.17 “Anungji parnok tetsübu; kechiaser temai madoktsüsa kecha nembanga mali. Aser memetettsüsa kecha miima mali. 27Ammang nung ni nenok dang kechi ashir, aji nenoki sangwa nung jembiang.Aser nenok narong nung kechi angashir aji kilem manung ayimang 28Shiri temang tepseter saka tanela takümbo tepsettsü makok parnok tetsübu; saka shibai tanela aser temang anaprongla molumi nung samatsütsü akok, pa ang tsübuang. 29Alushijak ana poisa ka yong mayoker ama? Aji saka item ka danga nenok Tebui memeteti ali nung metsüktsü. 30Nenok kolak nung kua ajak züngdangteta lir. 31Anungji tetsübu, alushijak aika dang nungi nenok taoba.

Nisung Matsüngdang Khrista Nangzükba

(Luk. 12.8-9)

32“Anungji shibaisa nisungtem madang ni nangzükdir, kotak nung aliba kü Bu madang nia pa nangzüktsü. 33#2 Ti. 2.12 Saka shibaisa nisungtem madang ni menangzüklir, kotak nung aliba kü Bu madang nia pa menangzüktsü.

Yimjung Masü Saka Nok

(Luk. 12.51-53; 14.26-27)

34“Alima nung yimjung adokdaktsütsü ni aru ta tebilem; yimjung masü saka nok adokdatsütsü ni aru. 35#Mik. 7.6 Kechiaser nisung kati pei tebu anema, aser jalai pei tetsü anema apusodaktsütsü, aser jabaso kinüngtsüi jabaso tetsü anema apusodaktsütsü ni aru. 36Aser nisung ka tsükchirtemji pei kinungertem alitsü. 37Shibai pei tebu mesüra tetsü kü dang nungi tali meimdir; pa ni atema metemsü. Aser shibai jabaso mesüra jala kü dang nungi tali meimdir pa ni atema tetemsü masü. 38#Mat. 16.24; Mar. 8.34; Luk. 9.23 Shibai pei kangki mapui kü sülen anitaker pa ni atema tetemsü masü. 39#Mat. 16.25; Mar. 8.35; Luk. 9.24; 17.33; Yoh. 12.25 Shibai pei taküm angur aji samatsü, saka shibai ni asoshi pei taküm samadir aji pai angutsü.

Sempettem

(Mar. 9.41)

40 # Mar. 9.37; Luk. 9.48; 10.16; Yoh. 13.20 “Shibai nenok agizüker pai ni agizüker, aser shibai ni agizüker, pai ni shibai yok paji agizüker, 41aser shibai ainkar ka ainkar tenüng nung agizüker pai ainkar sempet angutsü. Aser shibai temeshi nisung ka temeshi tenüng nung agizüker, pai temeshi nisung sempet angutsü. 42Aser shibai item tilatem rongnung ka nem tzüzü marok ka danga nütsüng tenüng nung tajemtsü agütsüdir, atangji ni nenok dang ashir, pai kodaka-ang pei tajangzük mesamatsü.”

Currently Selected:

MATHI 10: AONAGABSI

Highlight

Copy