MATHI 11

Yohan Baptitsüba Nungi Osangbenertem

(Luk. 7.18-35)

1Yisui pei nütsüng terana dang pa temelaba ozüngtem shimar külen, parnok yimtitem nung sayutsü aser sayutsüngitsü asoshi pai yang nungjagi pila-a ao.

2Tang Yohan tepuokdak alidang Khristai inyakba mapatem indang pai angazüka, pai pei nütsüngtem dang o shioka pa dang asüngdang. 3“Tarutsü alibaji na asü, mesüra, onoki tangar ka asoshi atatsü?” 4Yisui parnok dang langzü, “Oang aser nenoki kechi angashir aser angur Yohan dang shiang: 5#Isa. 35.5,6 Nükpokertemi angur, tsüngtsükertemi jajateter, zütsüra aketertem meshitettsür aser narongjakertemi angashir, tasürtem shia arudaktsür aser sensakertem dang osangtajung sangoktsür; 6Aser shiba kü dak temetsüdaktsü kecha mali paji koda tepelatsü.”

7Parnokji pila aodang Yisui teloktem dang Yohan indang ashitsü tenzük, “Kechi ajitsü nenoki azüngmeyakdak lisem limai ao? Mopungi tzütok azüshiba ajitsüba asü? Nenoki kechi ajitsü ao? 8Süoshi tanük sobuba nisung ka ajitsü ao asü? Ajiang, sü tanük abenertem chuba kidang lir. 9Ajangla nenoki kechi ajitsü ao? Ainkar ka asü? Hau ni nenok dang ashir, ainkar ka dang nungi taoba. 10#Mal. 3.1 Zülua aliba ya pa indang lir, ‘Ajiang kü tenyar ni ne jakdang yokdagi, shibai ne jakdang ne lenmang renemtsü.’ 11Ni nenok dang züngpong ashir, tetsütemi asoba rongnung Yohan Baptitsüba dang nungi tuluba shinga madoka; saka shiba Kotak Yimli nung tilatiba lir paji Yohan dang nungi tuluba lir. 12#Luk. 16.16 Yohan Baptitsüba anogo nungi tang tonga Kotak Yimliji rakteper, aser tesashirtemi aji rakzüka agir. 13Kechiaser ainkartem aser ozüng ajaki Yohan tashi kechi tataloktsü ali aji shin. 14#Mal. 4.5; Mat. 17.10-13; Mar. 9.11-13 Aser nenoki agizüktsü mulunga lira, tarutsü aliba Eljiaji pa lir. 15Shiba dak angashitsü tenarong aten pai angang. 16Saka kechi den iba putu ni medemdangtsü? Ibai shishidak mena aliba tanurtem mesük, shiri pei medemertem dang ajar, 17aser ashir, ‘Onoki nenok dang jemji apu aser nenoki metsüngsang; onoki mang ayim, saka nenoki teku nung matsüng.’ 18Kechiaser Yohan chiyunga aser jema maru, aser parnoki ashir, ‘Pa dak temenen tanela lir.’ 19Nisung Chir, chiyunga aser jema aru, aser parnoki ashir, ‘Ajiang, ibaibo chidiyungdir aser yi ajemer nisung ka, alimelen sarur aser temenenpur tembar ka!’ Aser shisatsüji la chirtemi agi medentsür.”

Temulung Memeyipba Yimti asoshi Aiatai

(Luk. 10.13-15)

20Idangji koba yimtitem nung Yisui ain mapatem timba inyak item jagi temulung memeyip nung, Yisui parnok arütsümeso. 21“Aiatai, na Korazin! Aiatai Bethsaida! Kechiaser koba ain mapatem nenok rongnung inyak aji Tair aser Sidon nung inyak asübo, parnoki anem sü abener aser aut mezür alemli parnoki temulung meyiper lila. 22Saka ni nenok dang ashir, obendangba anogo nung nenok dangbo Tair aser Sidon tia azüzüktsü temelaba asütsü. 23#Isa. 14.13-15 Aser Kapernaum, na anüng tonga mesotsü ama? Na tasü yimi alutsü. Kechiaser koba ain mapatem ne dak inyak aji Sodom nung inyak asübo, aji tanü tashi noktaka lila. 24#Mat. 10.15; Luk. 10.12 Saka ni ne dang ashir, o bendangba anogo nung ne dangbo Sodom lima tia azüzüktsü ang temelaba asütsü.”

Kü Dangi Arung Aser Anisüngzükang

(Luk. 10.21-22)

25Iba mapang nungji Yisui ashi, “Oh Oba, anüng aser ali Kibuba, itemi nai shisa akar aser temeteter tsüngdang nungi miimbang aser kinü tanurtem tsüngdang jungkai adokdaktsü nung ni ne dang pelar. 26Hau, Oba, kechiaser yamaji nai mulungba liasü.

27“Kü Bui kü nem ajak bendanga agütsüogo; aser Tebu alema, Techir shingaia memetet; mesüra Techir alema Tebu shingaia memetet aser Techiri shir dang pa jungkai adokdaktsütsü mulungtet par dak alema shingaia Tebuji memetet.

28“Nenok tebelemer aser khu reta abener ajak kü dangi arung aser ni nenok nem anisüngzük agütsüdi. 29Nenoki kü süngra nung apuang, aser ni nungi angazükang, kechiaser ni ajemalur aser mulungsentsü anükanüker, aser nenoki nenok tanela asoshi anisüngzük angutsü. 30Kechiaser kü süngra melamelar aser kü khu pungbapungbar.”

Currently Selected:

MATHI 11: AONAGABSI

Highlight

Copy