MATHI 9
9
Togimra Agi Shirangba Nisung Ka Anebtsüba
(Mar. 2.1-12; Luk. 5.17-26)
1Yisu rong kati yir tzüyimji ajanga oa pei yimtaki#9.1: Iba yimji Kapernaum, Mat. 4.13 ji reprangang. aru. 2Aser ajiang, togimra agi shirangba nisung ka yipten ka nung ontaka mejanger parnoki Yisu dangi bener aru, aser kodang Yisui parnok tamangji angu, pai togimra agi shirangba dangji ashi “Tasü itang tebu! Ne menentem tokogo.” 3Saka ajiang, tezülurtem kari parnok sasa ashi, “Iba nisungi Tsüngrem atalar.” 4Saka Yisui parnok tebilembatem meteta ashi, “Kechiba nenoki nenok mulungjang nung tamajung bilemer? 5Koba ashitsü temelaba, ‘Ne menen tokogo’ mesüra, ‘Shishiang aser jajang.’ 6Saka alima nung temenentem atoktsü asoshi Nisung Chir dak tashi-ain keta lir ta nenoki metettsü.” Idangji pai togimra agi shirangba dang ashi, “Shishiang, ne yipten benang aser ner kidangi oang.” 7Pai shishi aser par kidangi ao. 8Saka teloki aji kodang angu, parnoki tsübuadok aser nisung nem yamala tashi-ain agütsüba asoshi Tsüngrem sentsüwangshidaktsü.
Mathi Ajaba
(Mar. 1.13-17; Luk. 5.27-32)
9Yisui aji toktsür pila-a aodang Mathi ta ajaba nisung ka alimelen sarudak mena angu aser Yisui pa dang ashi, “Kü sülen anitakang.” Aser Mathi-i noktak aser pa sülen anitak. 10#Luk. 15.1,2 Aser pa Mathir kidang chiyungdak mena alidang, ajiang, alimelen sarurtem temenenpurtem aika arua Yisu aser pa nütsüngtem den amen. 11Kodang Farisitemi aji angu, parnoki pa nütsüngtem dang ashi, “Kechiba nenok tesayuri alimelen sarur aser temenenpur den chiyunger” 12Saka Yisui aji angashia ashi, “Anema alirtem asoshi mozü shiteter nüngdak mali, saka shirangertem asoshi tenüngdaktsü. 13#Hos. 6.6; Mat. 12.7 Saka oang aser ya kechi tetezüar nenoki angazükang. Ni tenla masü, taochi aginür, kechiaser temenenpurtem ajatsü ni aru.”
Lumiba Indang Tasüngdangba
(Mar. 2.18-22; Luk. 6.6-11)
14Idangji Yohan nütsüngtemi Yisu dangi arua ashi, “Kechiba onoki aser Farisitemibo aiben lumir, saka ne nütsüngtemibo melumir?” 15Yisui parnok dang ashi, “Kiyimsang parnok den ali tashi kiyimdak aliba medemertemi mang ayimtsü akok asü? Saka anogo ka tonga arutsü kodang kiyimsang parnok nungi anir oadoktsü; idangji parnoki lumitsü. 16Shingaia sü tejen nung sü tasen mateploker, kechiaser tateplokba sü tasenji sü tejen nung jagi shizüker aser tapokji tamajungba padaktsür.
17“Aser shingaia yi tasen yi shiküp juli tejen nung shioka mayur yamaji yura, shiküp juliji pokmar aser yiji tokshir aser shiküp juliji raksar; saka parnoki yi tasen shiküp juli tasen nung shioker, aser anapronglaji kümzüka ayur.”
Sinagog Yimsüsür Jala Aser Yisu Sütsüng Nung Kongshila Tetsür
(Mar. 5.21-43; Luk. 8.40-56)
18Yisui item o parnok dang jembia alidang, sinagog nung yimsüsür ka aru aser Yisu madang apudaka ashi, “Kü jala tang süli lir; saka na arung aser ne teka agi la dak nemetang, aser la taküm alitsü.” 19Yisui arameso aser pa nütsüngtemi pa sülen anitak.
20Ano ajiang, tetsür ka shiba küm terana azü ayimba agi timtema liasü, lai Yisu sülen aru aser pa sütsüng nung kongshi. 21Kechiaser lai ashi, “Ni pa sü nung danga kongshira ni anebadoktsü.” 22Yisui tesülen meyipa reprang aser la ngua ashi, “Tenü tasü itang,” Ne tamang agi na anebtsüogo! Aser tetsürji iba mapang nungjagi anebadok. 23Kodang Yisu sinagog yimsüsür kidangi aru, aser jemji apurtem aser telok rongrongshishiba angu; 24pai ashi, “Senshiadokang, kechiaser aiürlaji tasü masü, saka la amua aoba dang.” Saka parnoki pa atala-a menütsü. 25Saka kodang telokji senshidaktsü, pai ai aser la dak teka agi amet aser laji shishi. 26Iba nüngsangji iba linük ajonga nung ayimsünga prokshi.
Nükpoker Ana Anebtsüba
27Aser Yisui yang nungjagi aodang, nükpoker nisung anati pa sülen anitak, aser ayimtena ashi, “Dawid Chir, onok dang aochiangma.” 28Aser kodang pa kidangi ait, nükpokertemji pa dangi aru. Aser Yisui parnok dang ashi, “Ni ya inyaktettsü ta nenoki amanger asü?” Parnoki pa dang ashi, “Hau Kibuba.” 29Idangji pai parnok tenük nung kongshia ashi, “Nenok tamang ama nenok dang inyakang.” Aser parnok tenük lapok. 30Aser Yisui akang akanga parnok dang mela-a ashi, “Shinga nema ya temetetdaktsü.” 31Aji saka parnoki ao aser iba lima ajak nungji pa nüngsang sangdong.
Suwar Ka Anebtsüba
32Parnok adokdang, ajiang, temenen tanelai apuba temeli tatsük nisung ka Yisu dangi anir aru. 33Kodang temenen tanelaji aridok, suwar jagi o jembi. Idangji ajaki süngmanga ashi, “Israel nung yamai kodanga munguka.” 34#Mat. 10.25; 12.24; Mar. 3.22; Luk. 11.15 Saka Farisitemi ashi, “Temenen tanelatem chuba agi pai temenen tanelatemji aridoker.”
Yisu Aria Bilemba Temeim
35 #
Mat. 4.23; Mar. 1.39; Luk. 4.44 Tang Yisui yimti aser yimtsüng ajak sema, parnok sinagog nung sayua, Kotak Yimli Osangtajungji sayutsüngia, aser tashitak aser shirangba tapu tapu anebtsüyonga ao. 36#Zün. 27.17; 1 Ch. 22.17; 2 Pu. 18.16; Ezk. 34.5; Mar. 6.34 Saka kodang pai telokti angu, pai parnok asoshi aria bilem, kechiaser sannüker maliba santem ama parnok timtema aser teimla makai liasü. 37#Luk. 10.2 Idangji pai pei nütsüngtem dang ashi, “Alu rutsü jenti kar, saka nübu ishika dang. 38Anungji nenoki aluruba Kibuba dang pei alurudaki nübu yoktsü sarasademang.”
Currently Selected:
MATHI 9: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
