TENYARTEM MAPA 2

Tanela Temeshi Aruba

1 # Lev. 23.15-21; Taz. 16.9 Kodang tenemnübuba Benjong anogo atong, parnok ajak külemi tesem ka nung sentepa liasü, 2aser aoksa dang kotak nungi mopung tesashi aonba ama ola aru, aser iba jagi parnok mena alidak ki ajak asüng. 3Mi jangruba temeli ama parnok dangi adok aser aji lemsar parnok shia dak amenlok. 4Parnok ajak Tanela Temeshi agi asüng, aser Tanelai parnok nem jembitsü tashi agüja bendanger oshitem nung parnoki jembimeso. 5Tang anüng kübok aliba kin ajak nungi aruba, yimsü nung keta asenba Yihuda nungertem Yirusalem nung anena liasü. 6Kodang iba olaji aru, telokti külemi sentep aser süngmangtep, kechiaser nisung shiai pei oshi nung jembia angashi. 7Parnok ajaki aoksa aser süngmanga ashi, “Ajiang, item tejembir ajak Galil nunger masü no? 8Ajangla kodaser asenok shiai asen pei pei oshi nung angashir? 9Parthia nungertem, Media nungertem, Elam nungertem, Mesopotamia, Yihuda, Kapadokia, Ponta, Asia, 10Frugia, Pamfulia, Ijip, aser Kurini meketa aliba tesem kar nung alirtem, aser Yihuda nungertem, aser Bendangertemi Yihuda yimsü amangertem, Rom nungi tesemdangertem, 11Kreta aser Arabia nungertem, Tsüngremer tesüngmangtsü mapatem asenoki asen pei pei oshi nung parnoki jembia angashir.” 12Parnok ajaki süngmang aser rata-a kati ka dang ashi, “Ya kechi tetezü?” 13Saka tangartemi atala-a ashi, “Parnok yi lanu agi mesepogo.”

Peteri Sayutsüngiba

14Saka Peteri terka den noktaka pai ola adoka parnok dang ashi, “Yihuda nungertem aser Yirusalem nung alirtem ajak, nenok nem ya metetdaktsünür, aser tenarong tena kü o angang. 15Nenoki bilema aliba amaji, item nisungtem ya yi agi memesep kechiaser ya ano tuku baji dang lir. 16#Yoe. 2.28 Saka iba indang Yoel ainkari yamai jembia kar:

17‘Tsüngremi ashi,

tatem anogo nung meimchir ajak nem ni kü nela meküploktsütsü.

Aser ner jabaso aser jalatemi shintsü;

aser ner asangurtemi mangdang angutsü

ner tamburtemi pungmang pungmangtsü.

18Hau, item anogo nung kü kilirtem aser kilitsürtem madak,

kü nela meküploktsütsü aser parnoki shintsü.

19Temalen anüng nung tesüngmangtsütem,

azü, mi aser mokozü tangula ni sayutsü.

20Iba tulu aser sentsüwangshi Kibubar anogoji arudang,

anüji tammang kümdaktsütsü aser itaji azü ama merema kümdaktsütsü.

21Aser idangji shirisa Kibuba tenüng nung jadir kümzüktsü.’

22“Israel purtem item o angang! Mapa tulu aser tesüngmangtsü aser temaitsü agi, Tsüngremi nungtettsüba Nazaret nunger Yisui nenok dang inyaka aser nenoki pei sasa metetba ama item nenok rongnung Tsüngremi pa ajanga inyak. 23#Mat. 27.35; Mar. 15.24; Luk. 23.33; Yoh. 19.18 Tsüngremer tasatetba aser tamasa nungi metetjema aliba agi pa ozüng memetetertem teka agi kangki nung nenoki südaktsütsü asoshi bendanga agütsü. 24#Mat. 28.5,6; Mar. 16.6; Luk. 24.5Saka Tsüngremi tasü timtem salar pa shia arudaktsü, kechiaser tasüba agi pa sottsü tamakoktsü liasü. 25#TKe. 16.8 Kechiaser Dawidi pa indang ashi,

‘Kibubaji teti ni kü jakdang angu,

kechiaser pa kü tajichilen lir;

aji asünung ni manokshi-daktsütsü.

26Aji asünung kü mulung pela-a liasü,

aser kü melia kanga pela.

Ano kü temanga teimla nung alitsü;

27Kechiaser kü taküm tasü yim nung nai metoktsütsü,

mesüra Ne Temeshiba nem shizüka aobaji mereprangdaktsütsü.

28Taküm lenmangtem nai kü dang sayu,

ne tsüngdang nai ni tepela agi süngdaktsütsü.’

29“Adianutem, tebuti Dawid indang nenok dang indang indanga shitet: pa asü aser arem aser pa leper tanü tashi asenok den lir. 30#TKe. 132.11; 2 Sa. 7.12,13 Pa ainkar ka liasü, aser pei semchirtem rongnungi ka pa chuba menden nung mendaktsütsü ta Tsüngremi pa dang nangzükba pai meteta liasü, 31aji apiteta Khrista shia aruba indang pai jembi, oda pa tasü yim nung metoktsütsü mesüra pa temang shizüka moudaktsütsü. 32Iba Yisu, Tsüngremi shia arudaktsüogo. Onok iba atema kulisürtem lir. 33Anungji Tsüngrem tajichilen ajungketa, aser Tebu nungi Tanela Temeshi tenangzükba agizüker, nenoki anguba aser angashiba ya pai meküploktsüogo. 34#TKe. 110.1 Kechiaser Dawid kotaki ajungketa anir matu, saka pai pa sasa ashi,

‘Kibubai kü Kibuba dang ashi,

Kü tajichilen menang,

35Oda ni ne tsükchirtem ne tsüng kübok mayu tashi.’

36“Anungji iba Yisu shiba nenoki kangki nung tepset, Tsüngremi paji Kibuba aser Khrista kümdaktsü ta Israel purtem ajongai metetang.”

37Kodang parnoki ya angashi, parnok mulungjang nung kongshi aser parnoki Peter aser tanüngba tenyartem dang asüngdang, “Adianutem, onoki kechi inyaktsüla?” 38Peteri parnok dang ashi, “Temulung meyipang, aser nenok nisung shia pei temenen atoktsü asoshi Yisu Khrista tenüng nung baptiang; aser nenoki Tanela Temeshi sempetji agizüktsü. 39Kechiaser nenok aser nenok chirtem aser talang nung alirtem ajak, aser Kibuba asen Tsüngremi kwika pa dangi jadir, paikaji asoshi tenangzükbaji lir.” 40Tanga o aika agi Peteri kuli asü aser parnok dang ajungshia ashi, “Iba tekülak putu dangi temerenshi arutsü aliba nungi nenok sasa kümzüka liang’ 41Idangji pa o agizükertem baptitsü aser panüji nisung meyirijang asem shi parnok rongnung zünglok. 42Aser tenyartem tesayuba, telungjem, amtsük sangsaba aser sarasademba nung parnoki akang akanga ali.

Tamangertem Rongnung Telungjem

43Aser nisung shia tetsübu agi asüng, kechiaser tesüngmangtsütem aser temaitsütem aika tenyartem ajanga inyak. 44Tamanger ajak külemi ali, aser oset ajak arok meyong aküm. 45Parnoki parnok akaba osettem ayok aser nisung shia nüngdak yari parnoki ajak nem lemsa-a agütsü. 46Aser kenüamati temulung ka sür parnoki tenla kidang sentep. Kodang kidang amtsük sangsa, tepela aser tagütsünü mulungsentsü agi parnoki chiyungtsü chiyung; 47aser Tsüngrem tenüng sanga nisung ajaki parnok dang junga bilem. Aser kenüamati kümzükba purtemji Kibubai parnok telok rongnung züngsemdaktsü.

Currently Selected:

TENYARTEM MAPA 2: AONAGABSI

Highlight

Copy