TENYARTEM MAPA 1

Tanela Temeshi Nangzükba

1 # Luk. 1.1-4 Teofil, tetenzük nung Yisui kechisa inyak aser sayu, item ajak indang kü mezüng kaket nung ni züluogo, 2oda pai shimtetba tenyartem dang pai ozüng agütsür külen, pa kotaki matuba anogo tashi. 3Pa tuoshia sür külen parnok dang pei sasa taküm sayu, aser lirnü tashi Tsüngrem Yimli indang sayua kuli tejangja jenti agi jungkai adoka sayua liasü. 4Parnok den külemi lemsatepa lungjema alidang pai parnok nem ozüng agüja ashi, Yirusalem nungi tuo, saka Tebui nangzükba koba nenoki kü dang angashi, iba asoshi ata-a liang, 5#Mat. 3.11; Mar. 1.8; Luk. 3.16; Yoh. 1.33 “Kechiaser Yohani nenok tzü nung dang baptitsü; saka anogo aika meli-i nenok Tanela Temeshi nung baptitsütsü.”

Yisu Kotaki Atuba

6Anungji kodang parnok külemi sentep parnoki pa dang asüngdang; “Kibuba, Israel nem yimli meyipa agütsübaji iba mapang ya asü?” 7Pai parnok dang ashi, “Mapang mesüra tsüngkhüm mongputem kechisa Tebui pei tashi-ain nung yua aka itemji nenoki metettsü tim masü; 8#Mat. 28.19; Mar. 16.15; Luk. 24.47,48 saka kodang Tanela Temeshi nenok dangi arudir nenoki ain agizüktsü, aser Yirusalem nung, Yihuda aser Samaria ajonga nung aser alima tatem tonga, nenok kü kulitem asütsü.” 9#Mar. 16.19; Luk. 24.50,51 Kodang pai item o ashi, parnoki repranga lia paji anir tuadok aser parnok nükdang nungi mepet kati pa agienadok. 10Pa atudang parnoki rangketa anünglen ajia alidang, aoksa dang nisung ana süoshi temesüng abener parnok anasa noktak. 11Tenati ashi, “Galil nungertem, kechiba anünglen ajia nenoki noktaker? Iba kasa Yisu shiba nenok nungi kotaki anir atu, kechi koda pa kotaki tuya nenoki nguogo yamaji pa meyipa arutsü.”

Yihuda Melena Shimba

12Idangji Oliv ta ajaba tenem nungi parnok Yirusalemi meyipa shilang; iba tenemji Yirusalem anasa oda amungnü lenmang shi dang liasü. 13#Mat. 10.2-4; Mar. 3.16-19; Luk. 6.14-16 Kodang parnok yimti jagi ait, parnok anendak temaba taktangi parnoki atu, parnokji Peter, Yohan, Yakob aser Andria, Filip aser Toma, Bartholoma aser Mathi, Alfaeus-er chir Yakob, Zealot ta ajaba Simon, aser Yakob tenu Yihuda. 14Parnok ajak tetsürtem den, Yisu tetsü Mari den tenu nunger densema ka küma lungjemer bendanga agüja sarasadema liasü.

15Item anogo nungji adianutem rongnung Peter noktaka ashi, (parnok telokji nisung noklang ka ser metsü shi liasü). 16“Adianutem, shibai Yisu apurtem dang len sayu, iba Yihuda indang kechi Tanela Temeshi-i alemli Dawid tebang ajanga ashi, iba Lai ataloktsü tenüngdaktsü liasü; 17Kechiaser pa asenok rongnung ka liasü, aser iba tenzükba pa shilem lemzüka liasü. 18(Tang iba nisungi pa temenen mapa taa agi ali ka aliogo; aser pa tejak rembanga tsüka pa tepok sapok aser pa poknüng ajak nungteta adok. 19#Mat. 27.3 Yirusalem nung alir ajaki ya meteta aküm, anungji parnok oshi agi iba li dang ‘Akeldama’ ta ajar, koba tetezü, ‘Azü Li’). 20#TKe. 69.25; 109.8 Kechiaser Tenüngsang Ken kaket nung ashir,

Pa alidak menendokdakjang,

Aser idakji shinga telidaktsü.

Aser pa mapa tangar ka nem agidakjang.

21“Anungji Yohan baptitsüba anogo nungi tenzüka Kibuba Yisu asenok rongnungi anir atuba anogo tashi, 22#Mat. 3.16; Mar. 1.9; Luk. 3.21; Mar. 16.19; Luk. 24.51 kopiga pa asenok rongnung oli aruli ta liasü papigaji asenok den medema aliba nisung rongnungi ka asenok den pa shia aruba kuli asütsüla.” 23Parnoki nisung ana nungtettsü: Barsaba ta ajaba Yosef, shiba dang ano Yusta ta aja aser Mathia. 24Parnoki sarasadema ashi, “Oh Kibuba, nai nisung ajak mulung metet, Yihuda pei tiadaki aotsü asoshi koba tenzükba aser tenyar mapa nungi tsük, 25iba tenzükba aser tenyar mapa nung atatsü asoshi, item nisung ana rongnung nai shiba shimogo onok dang paji sayuangma.” 26Aser parnoki tena asoshi antoktang aser antoktangba Mathia dak kao. Anungji pa tenyar terka den züngsem.

Currently Selected:

TENYARTEM MAPA 1: AONAGABSI

Highlight

Copy