TENYARTEM MAPA 3

Tsüngtsüker Ka Anebtsüba

1Asem baji sarasademba mapang nung, Peter aser Yohan tenla kidangi tuya liasü. 2Nisung ka tasodang nungi tetsüng tatsük, Tobur Tajung Kiküm ta ajaba süngkhümbong züngdang tenla kidangi aturtem nungi meshi metsüdaktsütsü asoshi yangji parnoki pa anogo shia bener oa toktsü. 3Peter aser Yohan tenla kidangi tair ngua pai meshi metsü asü. 4Idangji tenapronglai pa dak ranglok aser Peteri ashi, “Onok dak ajiang.” 5Parnok nungi langka angutsü ta imla-a, pai parnok dang anga; 6Saka Peteri ashi, “Ni taribi aser hon maka, saka ni kechi aka aji ni ne nem agütsüdi; Nazaret nunger Yisu Khrista tenüng nung jaja-ang!” 7Pai pa teka tajichi agi amer atsümeso, idangyongji pa tetsüng aser tenüklangret tashi ita aküm. 8Pai pungmesoa noktak, aser jaja aser pungtena Tsüngrem tenüng sanga pai parnok den tenla kidangi atu. 9Nisung ajaki pa jaja-a aser Tsüngrem tenüng sanga angu, 10aser tenla ki Tobur Tajung Kiküm süngkhümbong züngdang mena meshi metsüba nisung to pa ta parnoki ajitet; aser pa dak kechi atalok aji meteta parnok tesüngmangtsü aser ratamata agi asüng.

Tenla kidang Peteri Sayutsüngiba

11Peter aser Yohan dak meshimetsüsangi ameta alidang, Solomon Kilempok ta ajaba jagi nisung ajaki kanga süngmanga parnok dangi aru. 12Peteri ya angudang nisungtem dang ashi, “Israel nungertem, kechiba ya atema nenok süngmanger? Onok pei ain aser temeshiba agi pa jajadaktsü ama kechiba nenoki onok dak rangketa ajir? 13Abraham, Isak aser Yakob Tsüngrem, asen tetsüteboutem Tsüngremi pa Chir Yisu sentsüwangshidaktsüogo. Nenoki pa bendanga agütsü, aser Pilati pa chioktsü mulungteter alidang, Pilat madang nenoki Yisu magizük. 14#Mat. 27.15-23; Mar. 15.6-14; Luk. 23.13-23; Yoh. 19.12-15 Saka Temeshi aser Ochi ashisang nenoki magizüki, nisung tepseter ka ang agitsü nenoki meshizük. 15Aser taküm Kibubaji ang nenoki tepset, saka Tsüngremi pa tasü nungi shia arudaktsü. Iba indang kulitemji onok lir. 16Pa tenüng nung amangba yong pa tenüng agi iba nisung shiba nenoki angur aser meteter, pa tashi ita kümdaktsü. Hau, kechi nenoki angur aser metetter aji tamang agi pa tenüng nung inyak. Nenoki metetba ama ibai Yisu dak amangba ajanga pa anebtsüogo. 17Aser tang adianutem, “nenok yimsüsürtemi inyakba ama nenoki ya memeteti inyak ta ni metet.” 18Saka Yisu Khristaji tuo ashitsüla ta kechisa ainkartem o ajanga shin yamaji Tsüngremi ya ataloktsüogo. 19Anungji nenoki temulung meyipang aser Tsüngrem dangi arung, aji asü nung dang pai nenok tai temenentem atoktsü. 20Yamaji süra anisazük mapang Kibuba nungi arutsü aser nenok asoshi shimteta aliba Khrista oda Yisu, pai nenok dangi yoktsü. 21Ajak teyanglushiba mapang ka maru tashi pa kotak nung atatsüla, koba indang alemli nungi ainkartem bang ajanga Tsüngremi jembi. 22#Taz. 18.15,18Mosai ashi, ‘Nenok adianutem rongnungi nenok asoshi ni ama ainkar ka Kibuba Tsüngremi adokdaktsütsü. Pai kechisa nenok dang shidir, nenoki pa dang angatsü. 23#Taz. 18.19 Saka taküm shia shibai iba ainkar dang mangalir, pa nüburtem rongnungi khenyongi samadaktsütsü.’ 24Hau, Samuel nungi tenzüka pa sülen arubatem kwikati jembiogo, parnokia item anogo asoshi jembia liasü. 25#Lip. 22.18 Item semchirtemji nenok lir aser Tsüngremi kechi tezüngzüktepba nenok tetsü-teboutem den yanglu iba senmangerji nenok lir, oda Abraham dang ashi ama, ‘Ne metsü ajanga alima kin ajak moatsütsü.’ 26Nenok nisung shia pei pei temenen nungi temulung meyipdaktsüba agi nenok moatsütsü asoshi, Tsüngremi pei chir shia arudaktsür külen pa nenok dangi tamasa yok.”

Currently Selected:

TENYARTEM MAPA 3: AONAGABSI

Highlight

Copy