РутУзор

Зямля, спадчына і матэрыяльнае існаванне Наомі цалкам залежаць ад Боаза. Ён з'яўляецца яе патэнцыйным адкупіцелем, і Рут толькі што зрабіла яму прапанову. Адкупіцель - гэта той, хто бярэ на сябе юрыдычную, сямейную і фінансавую адказнасць за больш бедных сваякоў, асабліва ўдоваў.

Боаз пагаджаецца ажаніцца з Рут, але ёсць праблема. Ён не можа дзейнічаць як адкупіцель Наомі, бо спачатку мусіць даць шанс больш блізкаму сваяку-адкупіцелю.

Боаз не марнуе час. Наступнай раніцай пасля прапановы ён чакае патэнцыйнага адкупіцеля каля гарадской брамы. Не згадваючы Рут, Боаз тлумачыць неназванаму адкупіцелю, што Наомі выставіла на продаж зямлю свайго мужа, і што ў яго ёсць права першачарговага выкупу.

Думаючы, што гэта інвестыцыя з нізкімі рызыкамі і высокім прыбыткам, той адразу пагаджаецца. Але потым патэнцыйны адкупіцель даведваецца, што разам з купляй зямлі яму таксама давядзецца ўзяць на сябе абавязак клапаціцца пра аўдавелых Наомі і Рут. Таму ён адмаўляецца. Купіць зямлю - гэта адно, але ажаніцца з Рут, і, магчыма,раздзяліць сваю спадчыну і страціць зямлю на карысць магчымых дзецей Рут - гэта занадта вялікая рызыка.

І Боаз робіць тое, на што гэты чалавек не здольны. Ён бярэ на сябе рызыкі, звязыныя з яго спадчынай, і адказнасць за захаванне спадчыны і зямлі Наомі.

Усе прысутныя разумеюць, што, аўдавелая бяздзетная чужаземка Рут, разам з аўдавелай Наомі, атрымалі надзвычайную дапамогу. Яны моляцца, каб Бог зрабіў мааўлянку Рут падобнай да прамаці Ізраіля - Рахілі, Ліі і Тамар. У адказ на іх малітвы, пасля дзесяці гадоў бясплоддзя, Бог цудоўным чынам даў Рут сына, якога назвалі Абэдам.

Горад напаўняецца радасцю. Цяпер у Наомі ёсць адкупіцель не толькі ў асобе Боаза, але і ў гэтым нованароджаным хлопчыку. Калі Абэд вырасце, ён будзе клапаціцца пра яе і падбае пра тое, каб спадчына Наомі ніколі не знікла.

Кніга пачынаецца з нагадвання, што Рут жыла ў "дні, калі кіравалі суддзі", і ў Ізраілі не было цара. Але заканчваецца тэкст царскім радаводам. Абэд - гэта дзед цара Давіда (Рут 4:22).

Гэта азначае, што Рут была не проста добрай. Боаз быў не проста ахвярным. Пустата Наомі была не проста запоўненая. Гэтыя героі паказваюць нам, як Бог збіраецца адкупіць Свой народ. Праз ахвярную дабрыню Боаза і Рут Бог даў адкупіцеля як для Наомі, так і для Ізраіля.

Абэд стаў продкам цара Давіда, які праз пэўны час узышоў на трон. Давід узяў на сябе адказнасць за спадчыну і зямлю Ізраіля, як яго прадзед Боаз узяў на сябе адказнасць за зямлю і спадчыну Наомі. І гэтак жа, як цудоўнае нараджэнне Абэда дазволіла працягнуць род Наомі, гэтаксама Бог цудоўным чынам паведаміў Давіду, што яго род будзе існаваць вечна. Бог абяцае праўнуку Рут, што сын Давіда будзе валадарыць вечна.

Аўтар Евангелля паводле Мацьвея кажа нам, што Рут і Боаз былі продкамі не толькі Давіда, але таксама Ісуса. Ісус - нашчадак Боаза і Давіда. Сваёй ахвярнай дабрынёй Ісус, як і яго продкі, выратаваў сваю сям'ю ад галечы. На крыжы Ісус становіцца нашым канчатковым адкупіцелем. Ён бярэ на сябе адказнасць за нашу фізічную і духоўную галечу, каб мы ніколі не засталіся без зямлі, спадчыны ці сродкаў да існавання.

Як Бог і абяцаў Давіду, Ісус жыве і ўваскрослы вечна валадарыць. Як Рут і Наомі, мы можам прыйсці да Яго са сваёй пустатой. Мы можам прасіць Яго адкупіць нас. Мы можам прасіць Ісуса ўзяць на сябе адказнасць за наш грэх і нашу безнадзейнасць і зрабіць нешта, каб выправіць гэта. І добрая навіна кнігі Рут у тым, што Ісус выратуе нас адначасова як блізкі сваяк і як магутны Цар!

Няхай Святы Дух расплюшчыць вашыя вочы, каб убачыць Бога, які не пакідае Свой народ без Адкупіцеля. І вы ўбачыце Ісуса як нашага ахвярнага і добрага Збаўцу, які памірае, каб адкупіць усіх нас.