РутУзор

Рут і Наомі толькі што даведаліся, што Боаз з'яўляецца адным з "адкупіцеляў" іхняй сям'і. У Ізраілі такі чалавек меў сацыяльны і юрыдычны абвязак клапаціцца пра бедных сваякоў, асабліва ўдоваў. У цяперашнім становішчы Наомі давядзецца прадаць зямлю сваёй сям’і, каб выжыць. Але калі Боаз ажэніцца з Рут, іх праблемы вырашацца! Дзякуючы Боазу канец іх пустаты можа стаць рэальнасцю. Але Рут таксама ўдава, да таго ж бедная і бяздзетная чужаземка. Незразумела, ці захоча Боаз нават разглядаць яе як магчымую партнёрку.

Наомі прыдумвае хітры, але рызыкоўны план, каб дамагчыся прапановы шлюбу ад Боаза. Рут мусіць прыгожа апрануцца, нанесці дарагія парфумы і чакаць, пакуль Боаз засне пасля сытнай вячэры. Пасля гэтага яна мусіць раскрыць яго ногі і легчы побач з ім.

Гэта быў вельмі прадуманы план, бо Наомі чакала, пакуль Боаз будзе сыты і задаволены. Раскрыванне яго ног азначае, што ў нейкі момант уначы Боаз прачнецца ад холаду і - вось дык нечаканасць! - пабачыць прыгожую Рут, якая пакорліва ляжыць ля яго ног. Але гэты план балансаваў на мяжы прыстойнасці: мужчына і жанчына сам на сам уначы, спяць разам і схаваныя ад вачэй. Рут нават “раскрывае” яго. Сэксуальнае напружанне настолькі ж моцнае, як і магчымыя наступствы, калі Боаз няправільна зразумее гэты план. Але Рут пагаджаецца на прапанову Наомі.

Аднак Рут адхіляецца ад сцэнару. Калі Боаз прачынаецца і бачыць яе, Рут не чакае ягонай рэакцыі. Замест гэтага, яна прапануе не толькі шлюб, але і адкупленне для Наомі і яе спадчыны. Рут называе Боаза "адкупіцелем". Яна хоча выйсці за Боаза замуж не столькі дзеля сябе, колькі дзеля Наомі. Без дапамогі Боаза род Наомі знікне. Але калі Боаз ажэніцца з ёй, то дзіця Рут стане нашчадкам Наомі, а яе зямля застанецца ў сям'і.

Боаз уражаны тым, наколькі Рут адданая Наомі. Яна не толькі пакінула сваю радзіму дзеля свякрові, але і гатовая выкарыстаць свой шлюб дзеля дабра і шчасця Наомі, а не дзеля сябе.

Боаз хоча сказаць "так", але ёсць праблема: існуе яшчэ адзін "адкупіцель", якому трэба даць магчымасць выказацца.

У гісторыі Рут пастаянна ўжываецца адно важнае габрэйскае слова, якое мае вялікае значэнне для разумення гэтага тэксту. У вашай Бібліі яно, хутчэй за ўсё, перакладаецца як "дабрыня".

Нам кажуць, што Рут праявіла дабрыню да Наомі, пакінуўшы сваю радзіму. Боаз праявіў дабрыню да Рут, шчодра падзяліўшыся ежай з ёй і Наомі. Боаз таксама называе прапанову шлюбу ад Рут актам дабрыні. Дабрыня ў кнізе Рут азначае нешта большае, а менавіта вернасць. І гэта асаблівая, ахвярная вернасць. Рут дорага заплаціла, пакінуўшы сваю радзіму. Прапанова шлюбу, якую яна зрабіла Боазу, азначае, што яна адмовілася ад магчымасці выйсці замуж па каханні ці дзеля грошаў. І як мы ўбачым у наступным раздзеле, прыняўшы гэтую прапанову, Боаз таксама панясе фінансавыя выдаткі, не кажучы ўжо пра магчымыя сацыяльныя наступствы, якія могуць узнікнуць праз шлюб з бясплоднай чужаземкай.

Упершыню гэты тып дабрыні згадваецца ў Бібліі, калі Бог апісвае сябе Ізраілю на гары Сінай. Бог кажа, што ён верны і нязменна добры. Ён будзе любіць Ізраіль, незалежна ад цаны, якую давядзецца заплаціць за гэта. У гісторыі Рут і Боаза мы бачым жывую ілюстрацыю Божай дабрыні, але мы таксама бачым жывое праяўленне любові Ісуса да нас.

З вернасці Божым абяцанням пра нязменную дабрыню Ісус пакінуў сваю радзіму і ўзяў сабе нявесту, заплаціўшы за гэта высокую цану. І як Рут прапанавала шлюб Боазу не таму, што ён быў прыгожы ці багаты, так і Ісус злучыўся з намі не таму, што мы найлепшыя ці найразумнейшыя. Ісус памёр за нас, бо ён добры і верны. Ён добры да тых, хто знаходзяцца ў патрэбе, і верны Сваім абяцанням.

Ці патрабуеце вы дабрыні ад Бога? Ці хацелі б вы, каб ахвярная міласэрнасць Госпада задаволіла вашыя патрэбы? Тады будзьце як Рут. Ляжце ля ягоных ног і зрабіце прапанову. Смела скажыце яму, што вам пагражае, калі ён не будзе дзейнічаць - і будзьце ўпэўненыя ў Богу, які больш добры, чым Боаз, і дасць вам усё, што вам трэба.

Паглядзіце самі.

Няхай Святы Дух расплюшчыць вашыя вочы, каб убачыць Бога, які закрывае нас сваімі крыламі. І вы ўбачыце верную дабрыню Ісуса, як ён спустошыў сябе, каб мы маглі быць напоўненыя.