Усё новаеУзор

Калі існуе прынамся адна рэч, што прымусіла мяне шмат над чым паразважаць падчас вывучэньня 2 Карынцянаў, дык гэта тое, што Павал не баіцца цяжкіх узаемаадносінаў. Мы яшчэ пагаворым пра гэта пазьней, але карынцяне пакрыўдзіліся былі на Павала празь некаторыя рэчы, у тым ліку праз тое, што ён не адведаў іх тады, калі ён сказаў, што адведае. Але перад тым, як патлумачыць свае дзеяньні, Павал распавёў ім пра свае пачуцьці да іх.

Царква дрэнна адгукнулася на першы ліст Паўла. Паўлаў супрацоўнік у служэньні, Цімафей, наведаў карынцянаў пасьля таго, як Павал напісаў той ліст, і паведаміў яму пра значныя праблемы - маральныя заганы, сапсаваныя перакананьні, сваркі ды шмат іншых. У выніку, Павал паплыў чоўнам з Эфэсу ў Карынт, каб асабіста разабрацца з Карынцянамі, што ён называе ў 2 Карынцянаў 2:1-2 “засмучэньнем”.

Сёньняшні ўрывак кажа пра тое, як Карынцяне ставілі пад пытаньне прычыны, празь якія Павал не адведаў іх. Нягледзячы на тое, што ён вельмі любіў іх, група праціўнікаў падбухторыла карынцкую царкву, сумняваючыся ў сапраўдным ды шчырым характары Паўлавае адданасьці. Тутака я дадам, што для мяне асабіста - гэта найгоршае. Я ненавіджу, калі мяне памылкова разумеюць, асабліва тады, калі я насамрэч зрабіла ўсё, што было ў маёй сіле, заступілася, ахвяравала або рызыкавала дзеля нейкага чалавека. Я не кажу, што гэтакае здараецца са мной часта, але калі яно здараецца, дык мне ў галаву прыходзяць два асноўныя пытаньні: 1. Ці я давяраю Госпаду наконт мае рэпутацыі з чыстым сумленьнем перад Ім (верш 12)? 2. Ці я магу працягваць любіць тых, хто абвінаваціў мяне?

Звычайна, калі нехта кажа табе, што ты занадта крыўдлівы, дык тое ня кажацца ў станоўчым тоне. Можна падумаць, што адзіны багабойны адказ на гэта - прамаўчаць ды ніколі не тлумачыць нашыя паводзіны. (Выслоўі 9:8 вучыць не дакараць насьмешніка.) Але часам, тлумачыць нашыя паводзіны - ня толькі разумна, але істотна дзеля ўзаемаадносінаў. Дык як ведаць, ці варта бараніцца? Вось вырашальны тэст, якім карыстаюся я: калі гэта самаабарона на падставе самааховы і калі яна характарызуецца пагардай, злосьцю, страхам або самаўпэўненасьцю, дык яна, напэўна, ад мае плоці. Адылі, калі гэта самаабарона на падставе любові да іншае асобы і калі яна характарызуецца шчырасьцю, разуменьнем, дабрынёю ды ціхманасьцю, дык яна ад Сьвятога Духа. Заўваж, што ў сваім лісьце Павал ясна бараніўся ня дзеля самаабароны, а дзеля ягонае любові да карынцянаў.

Як ты звычайна рэагуеш, калі цябе памылкова разумеюць або вінавацяць?