Божая зброяУзор

Мы далі веры наступнае азначэньне: ведаць, што Божае Слова - гэта праўда, і дзеяць паводле таго.

Праўда - гэта аснова жыцьця ў веры. Калі ты ня ведаеш праўды, дык ты ня можаш ведаць, як дзеяць паводле яе. Праўда Божага характару і Ягонага Слова - гэта каркас, які дазваляе веры расьці й квітнець.

Божая праўда - гэта тое, што надае веры вартасьць. Бяз праўды няма нічога моцнага, каб падтрымліваць наш шчыт веры. Ведаць Божую праўду і праўду пра Бога, адкрытую ў Ягоным Слове, зьяўляецца істотным, калі мы хочам сапраўды жыць у веры ды зазнаць прывілей абароны шчытамі веры.

Разважаючы пра веру, варта падкрэсьліць важнасьць таго, каб ясна й дакладна чуць Божы голас.

Калі мы не асьцярожныя, дык вера можа лёгка ператварыцца ў дурноту - неразумныя, імпульсіўныя, легкадумныя і нават небясьпечныя паводзіны ў імя веры. Але сапраўдная вера мусіць заўсёды мець за падмурак напісанае Божае Слова, у той час як Сьвяты Дух паказвае табе, як прымяняць Яго ў тваім жыцьці. Як бы ты апісала розьніцу паміж вераю ды дурнотаю? Што ўтрымлівае чалавека ад таго, каб перайсьці мяжу паміж імі?

Як вернікі, мы маем прывілей ведаць Ягоны накірунак праз малітву. Ён абавязкова навучыць нас, што ёсьць праўдай, і пакажа, які крок зрабіць далей. Насамрэч, добра ведаць наступны крок зьяўляецца істотным дзеля таго, каб заставацца ўраўнаважанымі, у той час як мы жывем жыцьцё пад аховаю шчыта веры.

Калі ты пачнеш ясна бачыць Божую праўду або Божае абяцаньне наконт нечага, дык ты мусіш дзеяць паводле гэтага. Уважліва слухай - твае пачуцьці ніколі не павінны быць вырашальным фактарам таго, як ты будзеш дзеяць. Пачуцьці могуць зьмяняцца і на іх часта ўплываюць вонкавыя стымулы. Дзеяньні паводле веры павінны мець за падмурак нешта больш моцнае і надзейнае.

Наш Бог верны і годны таго, каб ісьці за Ім.

Ён заўсёды побач, і Ён нашмат мацнейшы за Шатана. Ён заўсёды чуе нашыя малітвы, поўныя турботы, пацьвярджае Свае бясстрашныя абяцаньні і забясьпечвае наступную порцыю сьвятла, неабходную нам дзеля таго, каб ісьці далей. Падняць шчыты, жаўнеры! Мы ідзем у веры.