Божая зброяУзор

Рэчы, якія найбольш турбуюць цябе - тыя, што ты адчуваеш пяцьцю пачуцьцямі, - насамрэч не зьяўляюцца галоўнаю праблемаю. Усё, што здараецца ў бачным, фізычным сьвеце, беспасярэдне зьвязана з дужаньнем, якое адбываецца ў нябачным, духоўным сьвеце. Твой сапраўдны вораг - д'ябал - хоча, каб ты ігнаравала духоўную рэчаіснасьць, якая існуе па-за фізычнаю рэчаіснасьцю, бо пакуль ты засяроджваесься на тым, што бачыш на фізычныя вочы, ён можа працягваць бушаваць пад паверхняю. Чым больш ты не зварачаеш на яго ўвагі, тым больш шкоды ён можа нарабіць. Вораг можа быць нябачным, але ён ня выдумка. Ён вельмі рэальны, вельмі настырлівы і безупынна вядзе вайну супраць нас.

Тое, што ты зьяўляесься верніцай, ня робіць цябе адпорнаю да нападаў ворага, але яно дае табе доступ да Татавае сілы - да Ягонае сілы абараніць цябе, а таксама ануляваць тое, што вораг нарабіў табе. Калі ты жадаеш перамагчы ў бітве, калі жадаеш далучыцца да мяне і зламаць сцэнар, выкрыць ворага і сапсаваць ягоны плян на тваё жыцьцё, дык мусіш зразумець, што духоўная моц, якая з табою, ёсьць значна большаю за тую, якая супраць цябе.

Павал пісаў эфэсцам ня толькі дзеля таго, каб прыцягнуць іхную ўвагу да духоўнае бітвы, якая ідзе ў нябачным, незаўважным валадарстве, але таксама і дзеля таго, каб паказаць ім сілу, прысутную ў кожнай асобе, што мае блізкія адносіны з Богам праз Мэсію. У сваім лісьце да эфэсцаў Павал падкрэсьлівае адзін з найважнейшых, але незаўважальных аспэктаў духоўнае зброі - малітву.

Павал лічыў малітву гэтакаю істотнаю дзеля перамогі над шатанаваю сілаю ў нашым жыцьці, што, як заўважыў адзін вучоны, "прапарцыянальна кажучы, ліст да Эфэсцаў зьмяшчае на 55% больш вершаў аб малітве, чымся ліст да Рымлянаў, які зьяўляецца найдаўжэйшым Паўлавым лістом". Ён нават памаліўся некалькі разоў у працэсе напісаньня ліста да эфэсцаў. І калі ён маліўся... як жа ж стратэгічна ён тое рабіў! Ён казаў чытачам дакладна аб чым маліўся. Ён ведаў, што малітва была здольная зьмяніць траекторыю ўсяго іхняга жыцьця. Перамога ды малітва ў духоўнай вайне неразлучныя.

Прачытай Эфэсцаў 1:18-21 ды 3:14-19. Што з таго, аб чым Павал моліцца, патрэбна табе найбольш сёньня? Папрасі Бога аб гэтым.