Не турбуйся ні пра штоУзор

На ўцёках

Жыцьцё з трывогай у душы падобнае да жыцьця на ўцёках - але ты ўцякаеш ад уласнага жыцьця. Паніка прыходзіць да цябе, калі ты адчайна намагаесься ўцячы ў бясьпечнае, але, здаецца, недасягальнае, месца. Згрызоты круцяцца ў галаве з гэтакай хуткасьцю, што становіцца цяжка дыхаць, і страх б'е крыніцай, спрычыняючы нерашучасьць ды сумнеў у самім сабе.

Гучыць знаёма? У нашым жыцьці ёсьць заўсёдны ціск ніколі не запавольвацца - эмэйлы ніколі не спыняюцца, апавяшчэньні так і льюцца ў нашыя мабільнікі, і да таго ж ёсьць сацыяльныя сеткі зь іхняю пасткаю параўнаньняў. Дык як жа нам жыць з гэтым, калі мы ведаем, што мы, як Ісусавы пасьлядоўнікі, мусім жыць, не турбуючыся ні пра што?

Зачаста мы адчуваем сябе вінаватымі, бо думаем, што хрысьціяне ня могуць адчуваць сябе так.

А што, калі мы кінем бегчы ад нечага і пачнем бегчы да некага?

Можам. Можаш. Абяцаньне жыцьця без турботаў заснаванае не на тым, што мы можам зрабіць, а на Божай прысутнасьці. Глядзі, што напісана ў Піліпянаў 4:6-7:

Не турбуйцеся ні пра што, а заўсёды ў малітве і прашэньні з падзякаю адкрывайце свае жаданьні Богу, - і супакой Божы, які вышэйшы за ўсякі розум, ахавае сэрцы вашыя і помыслы ў Хрысьце Ісусе.

Мы ня здолеем перамагчы трывогу самастойна. Але з Богам? Мы маем доступ да Ягонае прысутнасьці, дзе ёсьць супакой, які мы нават ня можам сабе ўявіць.

Што ёсьць найлепшым у тым абяцаньні? Тое, што гэта безупынны працэс. Ува ўсякіх абставінах. Штораз як мы адчуваем трывогу, мы можам ісьці да Бога па Ягоны супакой, бо супакой зьяўляецца пабочным прадуктам Божае прысутнасьці.

Трывога не заўсёды зьнікне адразу ж. Тое адбудзецца, калі мы будзем шукаць Божае прысутнасьці бесьперапынна, крок за крокам. На працягу наступных некалькіх дзён мы падзелімся з табой гісторыямі простых людзей, добра знаёмых з трывогаю, і чаму яны навучыліся праз гэта.

Хочаш даведацца болей пра тое, як жыць, не турбуючыся ні пра што? Каб знайсьці больш супакою, паглядзі казані да гэтага пляну.

*Калі ў цябе трывожны разлад, варта шукаць прафэсійнае дапамогі. Калі ты думаеш, што ў цябе разлад, схадзі да доктара. Прашэньне дапамогі ня робіць цябе слабым; яно робіць цябе мудрым.