ЗвычкіУзор

Здаровая таясамасьць

Кожны з нас хоча мець добрыя штодзённыя звычкі. Але замест гэтага, мы сьпім позна, прыходзім на працу позна, вяртаемся дахаты позна, крычым на дзяцей, ямо або п'ем "яшчэ трошачкі" і правяраем эмэйл у ложку.

Дык як жа ж мы можам пачаць пазбаўляцца дрэнных звычак і фармаваць добрыя? Можа, існуе нейкі просты плян з трох крокаў, які здолее вызваліць мяне? Не. Але ёсьць надзея, і Божае Слова поўнае яе.

Крэйг Грашэл, пастар царквы Life.Church, кажа, што адна з найгалоўнейшых прычынаў, празь якія людзям не ўдаецца прытрымлівацца добрых звычак, адкідаючы дрэнныя, - гэта тое, што нашая перакрыўленая таясамасьць сабатуе наш посьпех. Настаў час пагутарыць пра здаровую таясамасьць.

Вельмі часта, калі мы гатовыя пачаць нешта новае, або кінуць дрэнную звычку, мы робім плян, абапіраючыся на тое, што мы будзем рабіць. Замест гэтага, нам неабходна пачаць з мэтаў, заснаваных на тым, Кім ёсьць наш Бог і кім мы жадаем быць. Сказ "Я зьбіраюся прабегчы маратон" заснаваны на тым, што ты хочаш зрабіць. А вось "Ты ўладзіў вантробы мае і выткаў мяне ў чэраве маці маёй, я дзівосна зладжаны, і з Божаю сілаю я хачу стаць бегуном" заснаваны на тым, кім Бог ёсьць і кім ты хочаш стаць. Гэтая мэта заснаваная на таясамасьці. Мы мусім сьпярша дбаць пра "хто", а потым пра "рабіць".

Мэты, заснаваныя на таясамасьці, не зьяўляюцца адзіным аспэктам адкрыцьця здаровае таясамасьці. Наступны кавалачак свабоды прыходзіць праз разважаньне над мінулымі крыўдамі, хлусьнёй, у якую ты паверыў, непрабачэньнем, памылкамі ды жыцьцёвымі абставінамі, якія прымусілі цябе паверыць у гэткую вэрсію цябе самога, што адрозьніваецца ад таго, кім Бог стварыў цябе быць. Распазнаўшы хлусьню, замяні яе праўдаю з Божага Слова. Здаровая таясамасьць, заснаваная на тым, што Бог кажа пра цябе, - гэта падмурак, неабходны дзеля таго, каб кінуць дрэнныя звычкі ды прыдбаць добрыя.

Шмат хто з нас верыць, напрыклад, у хлусьню накшталт "Я заўсёды буду такім". Гэта страх, заснаваны на таясамасьці, і каб пераадолець яго, трэба ўсьвядоміць праўду, заснаваную на таясамасьці, накшталт "Божы Дух ня даў мне страх. Ён даў мне сілу, любоў ды самакантроль!" У якую хлусьню, заснаваную на таясамасьці, верыш ты? Замяні яе Божаю праўдаю.

Памаліся: Госпадзе, якія звычкі мне трэба кінуць? Ці ёсьць у маёй таясамасьці нешта такое, што вымусіла мяне мець гэтыя звычкі? Сьвяты Дух, мне патрэбна Твая сіла, каб зьмяніцца. Амін!

Глядзі відэа, у якім пастар Крэйг вучыць пра звычкі.