У пошуках супакоюУзор

Пераадолей страх

Шмат якія людзі думаюць, што адваротнае страху - гэта надзея, мужнасьць або сіла. Насамрэч, адваротнае страху - гэта вера. І калі страх выклікае параліч, дык ён ня толькі адбірае ў чалавека супакой, але й руйнуе падмурак таго супакою - веру. Калі ёсьць страх, супакой зьнікае.

З большага, страх бярэ пачатак ад сумневу ў тым, што Бог будзе побач, што Ён дапаможа, што Ён усталюе справядлівасьць або здолее разабрацца ў крызісных абставінах, у якіх мы апынуліся. Вера кажа: “Так, Бог тутака. Так, Бог падбае пра мяне. Так, для Бога няма нічога немагчымага!”

З большага, страх бярэ пачатак ад пагрозаў - часам ад пагрозьлівых словаў, часам ад пагрозьлівых паводзінаў. Вера кажа: “Пагрозы не нашкодзяць мне. Я буду дзейнічаць з мудрасьцю, а не са страхам. Я веру, што Бог не дазволіць, каб гэтая пагроза споўнілася. А нават калі яна і споўніцца, я веру, што Бог дапаможа мне перажыць усё тое, што здарыцца.”

Калі Саўл, ізраільскі валадар, зразумеў, што Бог узяў ад яго ягонае памазаньне й дабраславеньне (празь ягоную пыху й непаслушэнства) і даў іх юнаку Давіду, дык ён моцна ўзлаваўся. Ён распачаў вайсковую кампанію, каб адшукаць Давіда й забіць яго - і гэтак выкараніць гэтую пагрозу са свайго жыцьця (1 Царстваў 19). Зь іншага боку, Давід адчуваў пагрозу ад Саўлавае арміі і некалькі разоў баяўся за сваё жыцьцё. Але Сьвятое Пісьмо кажа нам, што Давід знайшоў сілу ў Божых абяцаньнях абараніць яго й аднаго дня зрабіць яго ізраільскім валадаром.

У сучасным сьвеце мы часта чытаем пра людзей, якія, нягледзячы на запалохваньне хваробаю, нешчасьлівымі выпадкамі або небясьпекаю, рухаліся насустрач невядомым вынікам - непрыманьню, паразе - і так, часам, і перамозе. Можна прыгадаць палярнікаў, алімпійцаў, місіянэраў, прадпрыемцаў, філянтропаў. Пагрозы не павінны замінаць і шкодзіць нам.

У час пагрозаў, мы павінны засяроджваць сваю ўвагу не на тым, што можа здарыцца, а на тым, што сапраўды зьяўляецца праўдаю.

Шмат якія людзі сёньня жывуць пад цёмнымі аблокамі пагрозы. Некаторым пагражае хвароба, некаторым пагражае калецтва іхных дзяцей, а некаторым пагражае небясьпека страціць працу.

Адказ на ўсе гэтыя пагрозы - гэта вера ў тое, што мы ведаем зьяўляецца праўдаю пра Бога й Ягоную любоў і клопат пра нас, а таксама Ягоную здольнасьць забясьпечыць нас усім неабходным - асабліва Ягоным супакоем, які можа дапамагчы нам перажыць усё.