LUCAS 17
17
Ya xchꞌayawan te yalesel ta mulile
1Te Jesuse la yalbe te jnopojeletik yuꞌune:
—Puersa me ay yalesel ta mulil. Pero oꞌol me sba te machꞌa ya syaleswan ta mulile. 2Te machꞌa ya syales ta mulil jtuluk te machꞌatik chꞌin yakꞌoj sbaike, jaꞌ lek te yauk yichꞌ chukel ta snukꞌ junuk chaꞌ, ya xchꞌojot ochel ta mar. 3Ila me abaik yuꞌun.
“Teme ay jtuluk awermano te ay tut ma tsaꞌamuk ya spasbeyate, ban kꞌopona ta lek nax. Teme la sujtes yoꞌtane, pasbeya me perdon yuꞌun. 4Manchuk me ya sta smul awuꞌun jukeb buelta te jun kꞌaale, teme ay jukeb buelta ya xtal yalulanbeyate: “Makꞌ jpasix a”, teme xchie, pasbeya perdon —xchi te Jesus.
Te tutꞌil ay spoder te machꞌa ay xchꞌuunel yoꞌtane
5Te apostoletike la skambeyik te Kajwaltike:
—Aꞌbotik xan mas xchꞌuunel koꞌtantik —xchiik.
6Te Kajwaltike la sjakꞌtalanbe:
—Teme jich ay xchꞌuunel awoꞌtanik chꞌinuk jich tutꞌil te xchꞌin bakꞌ mostesia, ya me xjuꞌ ya awalbeyik te sikomoro-teꞌ to: “Bula aba lokꞌel liye, ban tsꞌuna aba ta mar”, teme ya awute, y te teꞌe jich me ya xchꞌuunbeyat amantal.
Te tut ya skꞌan spas te aj-aꞌtelile
7Teme ay jtuluk te jaꞌexe teme ay awaj-aꞌtelik te sujtix tal ta jokꞌojel ta alume o ta skanantayel te awakaxe, ¿me ya wan awalbey: “Ochan, naklan, baan weꞌan”, me ya wan awut? 8Njuꞌu. Sino ke ya awalbe: “Ban chapa jweꞌel y ban chapa aba. Ya me akꞌasesbon tal yuꞌun ya xweꞌ-xꞌuchꞌaon nailuk. Patil ya me xweꞌ-xꞌuchꞌaat euk”, ya awut. 9¿Sok me ya wan awalbe kola yal te awaj-aꞌtel te la spasbeyat te awaꞌtel te la awalbeye? Maꞌuk. 10Jich euk te jaꞌexe teme la apasix spisil te tut la yalbeyat te Diose, ya skꞌan te jich ya awalike: “Ma tsaꞌamukotik ta mantaltesel. Porke ma juꞌemuk kuꞌuntik spasel ta mas te kaꞌteltike”, xchaex me —xchi te Jesuse.
Te Jesuse la slekutes lajuntul jkꞌaꞌel-chameletik
11Te tutꞌil yipal bael ta beel ta Jerusalen te Jesuse, kꞌax ta stiꞌil estado yuꞌun Samaria y sok Galilea. 12Kꞌalal kꞌot ta jun kolonya, tal taek yuꞌun lajuntul winketik te yichꞌojik kꞌaꞌel-chamele. Jakal tekꞌajtik julel ta stojol, y xꞌawlajan:
13—¡Jesus, Maestro, kꞌuxutayaotik! —xchiik ta aw.
14Kꞌalal la yil te Jesuse, jicha yaltalanbe:
—Baanik, ban akꞌa abaik ta ilel ta stojol te saserdoteetike —xchi.
Te tutꞌil yipalik kꞌal ta beel ae, chꞌay bael te xchamelike. 15Ay jtul te ta spisilike la yil te lekix te stiꞌbalule, jicha sujt tal ta stojol te Jesuse. Tulan yipal tal ta yalbeyel kola yal te Diose. 16Jul skejan sba ta sit te Jesuse, la snijan sba ta lum ta yalbeyel kola yal. Te winik to, samaria-winik. 17La yal te Jesuse:
—¿Meꞌn ma lajuntuluk te machꞌatik kolik ta chamele? ¿Ba ay te baluntul xane? 18¿Me jaꞌ nax wan te jyanlum winik to te sujt tal ta yalbeyel kola yal te Diose? —xchi te Jesuse.
19Y la yalbe te winike:
—Jajchan y baan. Ta skuenta te xchꞌuunel awoꞌtan te lekubenatixe —xchi.
Te tutꞌil ya xtal ta ajwalinel te Diose
20Te fariseoetike la sjojkꞌobeyik te Jesuse tut ora ya xlijk ta mantal te Kajwaltik Diose. Te Jesuse la sjakꞌtalanbe:
—Ma chikanuk ta ilel te tut ora ya xlijk ta mantal te Kajwaltik Diose. 21Maꞌyuk machꞌa ya yal: “Liꞌiyix to”, o “Lum ayix to”, maꞌyuk machꞌa xchi ta yalel. Porke ayix ta mantal ta awolilik te Diose —xchi te Jesuse.
22Y la yalbe te jnopojeletik yuꞌune:
—Ya me sta yorail te awoꞌtanikuk ya awilik jun xanix me kꞌaal a te Nichꞌanile, pero makꞌ ya awilikix a. 23Ay me machꞌatik ya yalbeyex: “La, ilawil liꞌ ayix to”, o “Koꞌn kiltik lum ayix to”, ya me yutex. Pero ma me baanik, ni ma me tsꞌakliyik bael. 24Yuꞌun te tut ora ya sujt tal te Nichꞌanile, jich me ya xchiknaj tal te tutꞌil ya xtil te sansewal ta juju-mejch te chꞌulchane. 25Pero nail ya xkꞌax bayal swokol, sok pꞌajbil me ya xkꞌot yuꞌun te genteetike te kuxajtik te ora to. 26Jich te tutꞌil ayik a te genteetik ta yorail te jNoee, jich mismo ayik a te ya xtal te Nichꞌanile. 27Te genteetike xweꞌik xꞌuchꞌaik a, sok yipalik ta nujpunel a, sok yipalik ta chꞌom a, jaꞌto te tut kꞌaalil a och ta arka te jNoee. Tal te nojel jaꞌe, y spisil a laj cham. 28Jich mismo a kꞌot ta pasel ta yorail te jLote. Te genteetike xweꞌik xꞌuchꞌaik a, sok yipalik ta mambajel, y chombajel, y tsꞌumbajel, y yipalik ta spasel snaik a. 29Pero te kꞌalal lok bael ta jtejklum Sodoma te jLote, koj tal kꞌajkꞌ sok azufre ta chꞌulchan y spisil a laj cham. 30Jich mismo yipalik ta spasel a te genteetik te kꞌalal ya xchiknaj tal te Nichꞌanile.
31“Te tut kꞌaalil te jich ya xkꞌot ta pasele, te machꞌa moem bael ta sba te snae, y teme ay stutik yuꞌun ta yutil snae, ma me wakꞌ kouk tal ta slokꞌesel. Sok te machꞌa baem ta kꞌaltik, ma me wakꞌ sujtuk bael ta sna. 32Naꞌaik me te yinam jLote. 33Te machꞌa ya sle tutꞌ ya xkol sok te xkuxlejale, ya me xchꞌay sok te xkuxlejale. Pero te machꞌa ya xchꞌay sok te xkuxlejale, jaꞌ me ya xkuxuyin stukel.
34“Ya kalbeyex, teme ta ajkꞌubal ya xkꞌot ta pasele, ay me chaꞌtul wayajtik ta jun nax wayibal, jtul ya xꞌikꞌot bael y jtul ya sjilesot. 35Sok ay cheb antstik te sjoyinej sbaik ta juchꞌunele, jtul ya xꞌikꞌot bael y jtul ya sjilesot. 36Sok ay cheb winketik te sjoyinej sbaik ta aꞌtel ta kꞌaltike, jtul ya xꞌikꞌot bael y jtul ya sjilesot —xchi te Jesuse.
37Te kꞌalal la yaꞌiyike, la sjojkꞌobeyik:
—¿Ba ya xkꞌot ta pasel tsꞌin to, Kajwal? —xchiik.
Te Jesuse la sjakꞌtalanbe:
—Te ba ay pojol stiꞌbalul te tut chamene, teꞌ ya stsob sba tal ekꞌa te tsaꞌlose —xchi.
المحددات الحالية:
LUCAS 17: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
