LUCAS 16
16
Seña-kꞌop te jkanan te ma junuk yoꞌtane
1Te Jesuse jich a yalbe xan te jnopojeletik yuꞌune:
—Ay jtul jkꞌulej winik te ay jtul yaj-kanane. Te yane ba yalbe smul te jkanane te yipal ta slajimbeyel stutik yuꞌun te yajwale. 2Jich te jkꞌulej winike la stikon ta ikꞌel te yaj-kanane, y la yalbe: “Me jich te akꞌoplal te yipalon ta yaꞌiyele. Aꞌbon jil entregal te awaꞌtele, yuꞌun ma xjuꞌix te ya akanantaybon te stutik kuꞌune”, xyut. 3Jich te jkanane lijk spas pensar: “¿Tut lek ya jpas te tutꞌil ya slokꞌesonix ta kaꞌtel te kajwale? Yuꞌun ma xjuꞌix kuꞌun te tulan aꞌtele, sok ya xkꞌexawon teme lijkon ta kꞌambajele. 4Ta ora to laj jnaꞌix te tut ya jpase, yuꞌun ay me machꞌa ya yikꞌon ta sna te kꞌalal maꞌyukix kaꞌtel aye”, xchi ta snopel. 5Jich a yikꞌ tal ta jujutul te machꞌa ay sbetik yuꞌun te yajwale. Te primeroe la sjojkꞌobey: “¿Jayeb abet yuꞌun te kajwale?” xchi. 6La sjakꞌ: “Ay sien lata aseite te jbete”, xchi. La yal te jkanane: “Ilbe awil sjunal te abete. Najkan aba ta ora, pasbeya yan sjunal. Sinkuenta nax xꞌawakꞌ tal ta jun”, xyut. 7Ta patil la sjojkꞌobe xan te yane: “¿Jal jaꞌate, jayeb te abete?” xchi. Te winik to la sjakꞌ: “Ay sien ta jpꞌix triwu te jbete”, xchi. Te jkanane la yalbe: “Ilbe awil sjunal te abete. Pasbeya yan sjunal. Ochenta nax xꞌawakꞌ tal ta jun”, xyut.
8“Te yajwale la snaꞌbe sluwar. Jich a yal: “Te jkanan ma tsaꞌamuke ay spꞌijil yuꞌun te tutik ya spase”, xchi yuꞌun. Jich te machꞌatik ayik ta skuenta te balmilal to, mas ay spꞌijilik ta xchapel sbaik stukelik ke te machꞌatik ayikix ta sakil kꞌinale.
9“Joꞌon ya kalbeyex: Leaik me machꞌa ya akꞌuxutay aba sok ta skuenta te akꞌulejal liꞌ ba jmulawil balmilal to, yuꞌun te kꞌalal ya xlaj te akꞌulejale, ay me machꞌa ya yikꞌat ochel te ba kuxlejal sbajtel kꞌinale.
10“Te machꞌa ben jun yoꞌtan ya skanantay te tut aꞌbil chꞌinuke, jich me ben jun yoꞌtan ya skanantay teme ay bayal tut xkꞌot ta skuentae. Yan te machꞌa ma junuk yoꞌtan ya skanantay te tut ya xꞌaꞌbot chꞌinuke, jich ma junuk yoꞌtan ya skanantay teme ay bayal tut ya xꞌaꞌbote. 11Jaꞌ yuꞌun teme ma junuk awoꞌtan ya akanantay te akꞌulejal ta skuenta te jmulawil balmilal to, ¿machꞌa kꞌan yaꞌbeyat akanantay te lekil kꞌulejalile? 12Sok teme ma junuk awoꞌtan ya akanantaybe stutik yuꞌun te yane, ¿machꞌa kꞌan yaꞌbeyat te stutik awuꞌune?
13“Maꞌyuk jtuluk aj-aꞌtelil te ya xjuꞌ yuꞌun te ya yakꞌ sba ta abatinel yuꞌun cheb yajwale. Teme jich aye, jaꞌ ya spꞌaj te jtule; yan te jtule kꞌux ta yoꞌtan stukel, jun yoꞌtan ta stojol. Pero te jtul xane maꞌyuk ta jkuenta yuꞌun. Jich te jaꞌexe, ma xjuꞌ awuꞌunik te ya awakꞌ abaik ta mantaltesel yuꞌun Dios sok te akꞌulejalike —xchi te Jesuse.
14Te fariseoetike jaꞌ nax ben baem ta yoꞌtanik te stakꞌinike, jaꞌ yuꞌun te kꞌalal la yaꞌiyik te tuti yal te Jesuse, lijk yikꞌtinik yuꞌun. 15Te Jesuse la yaltalanbe:
—Te jaꞌexe jaꞌ nax ya aleik te tut lek ya skuyex a te genteetik. Pero te Diose ya snaꞌ tut ay te awoꞌtanike. Te tut lek ya yaꞌiyik ta yoꞌtan te genteetike, ta sit te Diose pꞌajbilix yuꞌun.
Skꞌoplal te mantaliletike sok te tutꞌil ya xmantalaj te Diose
16Te mantaliletik yuꞌun te Moisese sok te tuti yalik jilel te jꞌalwanejetik yuꞌun te Diose, jaꞌ nax a spꞌijutesotik stukel jaꞌto te kꞌalal tal te Juane. Jicha lijk ta alel te lek achꞌ kꞌop te tutꞌil ay ta ajwalinel te Diose, y spisil genteetik ya stenten sbaik ochel teꞌa. 17Ya xjuꞌ ya xlaj te chꞌulchan sok te balmilale, pero ma xchꞌay skꞌoplal ni jpꞌaluk stukel te mantaliletike.
Te Jesuse jpꞌijuteswan tut ay sluwar te ya xchꞌoj sbaik te machꞌa nujpunemike
18“Teme ay jtul winik te ya xchꞌoj sba sok yiname, teme ya sle yan te ya xnujpun sok xane, yipalix ta antsiwejel abi. Jich euk te ants te chꞌojbil. Teme ya xnujpun sok yan winike, yipalix ta kremiwejel abi.
Te jkꞌuleje sok te jLazaroe
19“Ay jtul jkꞌulej winik te kꞌayem ta slapel ben tsaꞌam tsajal pino pakꞌ sok ben tsaꞌam sakil pakꞌ, y te jujun kꞌaale ya spas kꞌin sok ben lek weꞌelil. 20Sok ay jtul meꞌbaꞌ winik te jLazaro sbiile te skojtol stiꞌbalul kꞌaꞌemik te yejchꞌene. Ya snajkan sba ta lum te ba spuerta te jkꞌuleje, 21yoꞌtanuk ya skꞌan sweꞌ te stsꞌubil te tutik ya xtꞌuxaj koel ta xmexa te jkꞌuleje. Pero te tsꞌiꞌetike ya xtal lekꞌtalanbek yuꞌun te yejchꞌene.
22“Ta patil te winik te lom oꞌol sbae cham. Y te chꞌul angeletike la yikꞌ bael, ba yaꞌbe sjoyin te jAbrahame. Y te jkꞌulele cham euk y ba mukek te stiꞌbalule. 23Te kꞌalal ayix ta wokol a te jkꞌulej winik te ba ya xbajt te animaetike, la stoy sit. La yil ta jakal te jꞌAbrahame te sjoyinej sba sok te jLazaroe. 24Jich a lijk yawuntay: “Jtatik Abraham, kꞌuxutayaon. Tikombon tal te jLazaroe. Aꞌ yajtsꞌes tal ta jaꞌ te sba yal skꞌab yuꞌun ya xtal sikutesbon a te kakꞌe. Porke ben ayon ta wokol liꞌ ba kꞌajkꞌe”, xchi.
25“Pero te Abrahame la sjakꞌbe: Jnichꞌan, naꞌa me te lek a kꞌaxat tal ta balmilale. Yan te jLazaroe lom oꞌol sba a kꞌax ta balmilal stukel. Te ora to maꞌyukix ta wokol liye. Yan te jaꞌate ayatix ta kastigo. 26Tutꞌ kꞌan juꞌuk. Yuꞌun ay jun mam chꞌen ta koliltik xatꞌbil liꞌ ba ayotike sok te ba ayexe. Manchuk me ay machꞌa liꞌiye te yoꞌtanuk ya xkꞌax bael teye, ma xjuꞌ yuꞌunik. Jich teme ay machꞌatik yoꞌtanuk ya xkꞌaxik tal liye, ma spas xkꞌax tal”, xchi te jꞌAbrahame.
27“Te jkꞌuleje la yal: “Awokoluk cheꞌe, jtatik Abraham, ya jkꞌambeyat pawor. Tikonbon bael ta sna jmeꞌ-jtat te jLazaroe. 28Yuꞌun ay to joꞌtul kijtsꞌinab teꞌa. Aꞌ ba skꞌoponbon yuꞌun makꞌ xlaj talix a liꞌ ba ay kastigoe”, xchi.
29“Te jꞌAbrahame la yalbe: “Yichꞌojbeyikix te sjun Moisese sok euk te sjun jꞌalwanejetik yuꞌun te Diose. Jaꞌ me aꞌ yakꞌik ta jkuenta te tut ya yalike”, xchi.
30“Te jkꞌuleje la sjakꞌ: “Ma teyuk a, jtatik Abraham. Yan te ayuk jtul anima te ya xchaꞌkux sok te ya xba albek yuꞌune, jich me ya sujtes yoꞌtanik yuꞌun te smulike”, xchi.
31“Pero te jꞌAbrahame la yalbe: “Teme ma skꞌan yakꞌ ta jkuenta te tut ya yal te jMoisese sok te jꞌalwanejetik yuꞌun te Diose, ni ma jaꞌuk ya xchꞌuunik a, manchuk me ay anima ya xchaꞌkux tal”, xchi te jꞌAbrahame —xchi ta yalel te Jesuse.
المحددات الحالية:
LUCAS 16: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
