LUCAS 18
18
Seña-kꞌop te meꞌbaꞌ ants y sok te alkale
1Te Jesuse la yaltalanbe jun seña-kꞌop yuꞌun jich aꞌ snopelan te ya skꞌopon Dios sil tiempoe, sok te makꞌ xcheꞌbaj yoꞌtanike. 2Jicha altalanbot yuꞌun:
—Ay jtul alkal te ba jun jtejklume te ni makꞌ xiꞌ yuꞌun te Diose ni ma xyakꞌ ta jkuenta te winketike. 3Mismo te ba jtejklum ay jtul meꞌbaꞌ ants teꞌa te ay spletoe. Ba skꞌopon te alkale yuꞌun ya skꞌan meltsaꞌanel sok te skontrae.
4Te alkale ayix kꞌaal te ma skꞌan a xchape, pero ta patil la snop: “Manchuk me makꞌ xiꞌon yuꞌun te Diose sok ni ma xkakꞌ ta jkuenta te winketike, 5pero ta skaj te ya swulilanon te meꞌbaꞌ ants to, ya me jmeltsaꞌan. Jich me makꞌ xtalulanix a sok jich me makꞌ xkꞌajkꞌubon a”, xchi ta yoꞌtan —xchi ta yalel te Jesuse.
6La yal xan te Kajwaltike:
—Aꞌiya awaꞌi te tuti yal te alkal te ma lekuk yoꞌtane. 7Jaꞌ yuꞌun te Diose, ¿meꞌn ma wan yauk skoltay te machꞌatik tsabil yuꞌune te ya swulilan ta kꞌajkꞌal ajkꞌubale? ¿Me ya to wan smali te ya xkoltaywane? 8Ya kalbeyex te ora ya xkoltaywane. Pero te kꞌalal ya xtal te Nichꞌanile, ¿me ay wan machꞌa jun yoꞌtan xchꞌuunej Dios te ya xjul jta ta balmilale? —xchi te Kajwaltike.
Seña-kꞌop te jtul fariseo sok te jtul jkꞌan-tojemale
9Te Jesuse la yal te seña-kꞌop to ta stojol te machꞌatik ya skuy sbaik te lek yoꞌtanik ta stojol Dios sok te ya yalik te ma tsaꞌamuk ta skꞌopik te yane. Jich a yal:
10—Ay cheb winketik ba skꞌoponik Dios ta templo. Te jtule fariseo, y te jtul xane jkꞌan-tojemal. 11Te fariseoe tekꞌel a skꞌopon te Diose. Jich a yal ta skꞌoponel te Diose: “Dios kuꞌun, ya kalbeyat kola awal te ma pajalukon sok te yan genteetike, te kꞌayemik ta elekꞌe, sok te ma tsaꞌamuk yoꞌtanike, sok te kꞌayemik ta antsiwejele. Sok ma jichukon te tutꞌil te jkꞌan-tojemal to. 12Te joꞌone ya jkom jweꞌel chaꞌmel ta semana, sok ya kaꞌbeyat jun ta slajunebal te tut ya jtae”, xchi.
13“Pero te jkꞌan-tojemale jakal tekꞌel jilel stukel. La snijan sba ta stojol Dios. Ma skꞌan a xjach moel sit stukel. La smajulan stiꞌ yoꞌtan ta ajtal oꞌtan, y jich a yal: “Dios kuꞌun, pasbon perdon te jmulawilon ta atojole”, xchi.
14“Ya kalbeyex: Te jkꞌan-tojemale te kꞌalal sujt bael ta snae pasbilix bael perdon yuꞌun a te Diose. Yan te fariseoe ma pasbot perdon stukel. Porke te machꞌa mukꞌ ya yakꞌ sbae, chꞌin me ya xkꞌot. Yan te machꞌa chꞌin ya yakꞌ sba, jaꞌ me mukꞌ ya xkꞌot stukel —xchi te Jesuse.
Te Jesuse la yaꞌbe bendision te untike
15Ay a yikꞌik tal chꞌin alaletik ta stojol te Jesuse yuꞌun ya skꞌajanbe skꞌab ta sjolik. Yan te jnopojeletike te kꞌalal la yilike, lijk skomik te machꞌatik yikꞌojik tale. 16Jich te Jesuse la yikꞌtalan tal te alaletike y la yalbe te nopojeletike:
—Ma akomik te untike, aꞌ taluk ta jtojol. Porke te machꞌa jachik yoꞌtanik te tutꞌil alaletik to, jaꞌ me ya xjuꞌ ya yajwalinik te Diose. 17Jamal ya kalbeyex: Te machꞌa ma jachikuk yoꞌtan te tutꞌil alal to ma xjuꞌ ya yajwalinik te Diose —xchi te Jesuse.
Jtul jkꞌulej winik tal skꞌopon te Jesuse
18Ay jtul te machꞌa statal yuꞌun te juriyoetik la sjojkꞌobey te Jesuse:
—Ben lekat Maestro. ¿Tut ya skꞌan ya jpas te tutꞌil ya jta te jkuxlejal sbajtel kꞌinale? —xchi.
19Te Jesuse la sjakꞌbe:
—¿Tuꞌun te ya awalbon te ben lekone? Maꞌyuk machꞌa lek. Jaꞌ nax lek stukel te Diose. 20Me anaꞌojix te mantaliletike: “Ma me antsiwejan, ma me milawanan, ma me elkꞌajan, ma me leawanan ta kꞌop, sok akꞌa me ta jkuenta te ameꞌ-atate”, xchi me —xchi te Jesuse.
21Te winike la yal:
—Spisil jchꞌuunej spasel desde chꞌinon to a —xchi.
22Te kꞌalal la yaꞌi te Jesuse, la sjakꞌbe te winike:
—Ay to xan yan te tut ya skꞌan ya apase: Chona spisil te tut ay awuꞌune, y kꞌebenbeya te meꞌbaꞌetike. Jich me ay akꞌulejal ta chꞌulchan ya xkꞌoat. Laꞌ me joyinaon bael tsꞌiin —xchi.
23Pero te kꞌalal la yaꞌibe sluwar te winike, lijk yakꞌ yajtal yoꞌtan yuꞌun, skaj te ben jkꞌuleje. 24Te Jesuse la yil te ay yajtal yoꞌtan te winike. Jaꞌ yuꞌun la yal:
—Te jkꞌulejetike wokol ya yajwalinik te Diose. 25Jich tutꞌil te ma xjuꞌ ta kꞌasesel ta sujtulel yit tsꞌisonajib te kameyoe, jaꞌ jich euk te jkꞌulejetike. Ma xjuꞌ yuꞌunik te ya yajwalinik te Diose —xchi.
26Te machꞌatik la yaꞌiybeyik sluware la sjojkꞌoyik:
—¿Machꞌa kꞌan koluk teme jichte? —xchiik yuꞌun.
27Te Jesuse la sjakꞌtalanbe:
—Te tut ma xjuꞌ yuꞌun spasel te genteetike, jaꞌ ya xjuꞌ yuꞌun spasel stukel te Diose —xchi.
28Te jPedroe la yal:
—Kajwal, te joꞌotike jilemix kuꞌuntik te tutik ay kuꞌuntike y tsꞌakliyejtikatix —xchi.
29Te Jesuse la yalbe:
—Jamal ya kalbeyex: Te machꞌa ay tut ya sjiles yuꞌun te ya yaꞌbe yajwalin Dios te yane, chikan teme ya sjiles snae, o yinam, o sbankiltak, o yijtsꞌinab, o smeꞌ-stat, o yuntikil, 30ya yichꞌbe bayal sjelol liꞌ ba balmilale, sok ta patil bael ya me yichꞌ xkuxlejal sbajtel kꞌinal —xchi te Jesuse.
Te Jesuse yoxmelal ya yal a te ya xchame
31Te Jesuse la yikꞌ tal ta stojol te lajchaytul jnopojeletik yuꞌune y la yaltalanbe:
—Te ora to ya xmootikix bael ta Jerusalen. Teꞌ me ya xkꞌot ta pasel ta stojol te Nichꞌanile, te tut la stsꞌiba jilel te antibo jꞌalwanejetik yuꞌun te Diose. 32Yuꞌun ya me xkꞌo akꞌek entregal yuꞌun te jyanlumetike. Ya me yikꞌtinik, sok ya me sbolkꞌoptayik, sok ya me stubutayik. 33Ya me smajik sok ya me smilik. Pero ta yoxebal kꞌaal ya me chaꞌkux tal —xchi.
34Te jnopojeletik yuꞌune ni ma snaꞌbeyik sluwar te tuti yale, yuꞌun ma chikanuk a yaꞌibeyik sluwaril. Jich ma kꞌot ta yoꞌtanik.
Te Jesuse la slekutes jtul chok ta jtejklum Jerico
35Kꞌalal tijilaj bael ta jtejklum Jerico te Jesuse, ay jtul chok nakal ta kꞌambajel ta tiꞌbe. 36Te kꞌalal la yaꞌi te yipal ta kꞌaxel bayal genteetike, la sjojkꞌoy te tut yipal kꞌoel ta pasele. 37La yalbeyik te jaꞌ te Jesus Nazaret te yipal ta kꞌaxel teꞌ ae. 38Jicha lijk yawutay:
—¡Jesus te stsꞌumbalat jDavide, kꞌuxutayaon! —xchi.
39Te genteetik te nailik kꞌale la skomik te yauk xkom ta awe, pero mas tulan a lijk xan ta aw:
—¡Stsꞌumbal jDavid, kꞌuxutayaon! —xchi.
40Te Jesuse la stejkꞌan sba. La yal mantal te ya xꞌikꞌot tal ta stojole. Te kꞌalal ayix ta stojole ae, la sjojkꞌobey:
41—¿Meꞌn yuꞌun ay tut ya akꞌan te ya jpasbeyate? —xyut.
Te choke la sjakꞌ:
—Kajwal, ya jkꞌan te ya ajambon jsite —xchi.
42Te Jesuse la yalbe:
—Jamuk te asite. Ta skuenta te xchꞌuunel awoꞌtan lekubatix —xchi.
43Mismo tiempo a te choke jam te site y la stsꞌakli bael te Jesuse. Yipal kꞌael ta yalel kola yal Dios yuꞌun te lekubix te site. Spisil te genteetik te la yile la yalbeyik kola yal Dios yuꞌun euk.
المحددات الحالية:
LUCAS 18: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
