ለዕለት ተዕለት ሕይወትዎ ተስፋናሙና

ፍርሀትን አውጥቶ መጣል

በፍቅር ፍርሀት የለም፤ፍጹም ፍቅር ግን ፍርሀትን አውጥቶ ይጥላል፤ፍርሀት ከቅጣት ጋር የተያያዘ ነውና፡፡ - 1 ኛ ዮሐ 4፡18

አራት ፊደል ስላለው ቃል ነው ላዋራችሁ የፈለግኩት፡ፍርሀት!

አብዛኞቻችን በልጅነታችን መጥፎ ቃል ከተናገርን እናቶቻችን አፋችንን በሳሙና እናጥባለን እያሉ ያስፈራሩን እንደነበር ሳናስታውስ አንቀርም፡፡ፍርሀት ቆሻሻ የሆነ ባለ አራት ፊደል ቃል ከሆነ በእግዚአብሔር ፍቅር ላይ ያለ እምነት ደግሞ ሳሙና ነው፡፡

እያወራሁ ያለሁት ስለደካማ እምነት አይደለም፡፡እያወራሁ ያለሁት እግዚአብሔር ለእኛ ባለው ወሰን የለሽ፣የማይለዋወጥ እና ፍጹም የሆነ ፍቅር ላይ ስላለ ሀይለኛ እምነት ነው፡፡

አንደኛ ዮሐንስ 4፡18 የሚያስተምረን ለእኛ ያለውን የእግዚአብሔርን ፍቅር መረዳት ከፍርሀቶቻችን እንደሚያድነን ነው፡፡ይሄ ማለት የፍርሀት ስሜት ጭራሽ አይሰማንም ማለት ሳይሆን በእግዚአብሔር ላይ ያለን እምነት እና ፍቅሩ አስፈላጊ ከሆነ እንድንቋቋመው ያደርገናል ማለት ነው፡፡

እግዚአብሔር አብሯችሁ እንዳለ እንድታውቁ ይፈልጋል፡፡ስለሚመራችሁ እና መንገዳችሁን ስለሚያሳያችሁ እምነታችሁን እና መደገፋችሁን በእርሱ ላይ ማድረግ ትችላላችሁ! እኛ እንኳ ፍጹም ባልሆንን ጊዜ የእርሱ ፍቅር ግን ፍጹም እንደሆነ አስታውሱ፡፡በስህተቶቻችን የተነሳ ትንሽ ወይም ብዙ አይወደንም፡፡እግዚአብሔር ከነአላችሁበት ሁኔታ እንደሚወዳችሁ ማወቅ አያስደስትም? ይሄንን ማሰብ ብቻ እምነታችሁን አሳድጎ ትንሽ ፍርሀታችሁን አይቀንሰውም?

እኔና እናንተ አሁንም አሁንም የፍርሀት ስሜትን እናስተናግዳለን፡፡ እንደዚህ ሲሰማን እያጋጠመን ባለው በማናቸውም ሁኔታ ውስጥ እግዚአብሔር እንደሚመራን በማወቅ ትኩረታችንን ወደ እርሱ መመለስ እንችላለን፡፡

በእያንዳንዱ ጊዜ ፍርሀትን አውጥቶ የሚጥለው ፍጹሞቹ እኛ ሳንሆን ፍጹሙ የእግዚአብሔር ፍቅር ነው፡፡ 

የጸሎት መጀመሪያ

እግዚአብሔር ሆይ ፍርሀቶቼን አውጥቶ መጣል የሚችለው የአንተ ፍቅር ብቻ ስለሆነ እምነቴን በአንተ ላይ አደርጋለሁ፡፡ህልውናህ ከእኔ ጋር እንዳለና በማናቸውም በሚያጋጥመኝ አስፈሪ ሁኔታ ውስጥ ሳልፍ እንደምትመራኝ አውቃለሁ፡፡ፍቅርህን እቀበላለሁ፡፡