Veranderde LeweVoorbeeld

Vryheid

Jesus het gekom sodat ons die lewe kan hê, en dit in oorvloed. As gevolg van sy offer aan die kruis, is ons vry. Ons lewe egter nie altyd in daardie vryheid nie.

As jy Jesus as Here van jou lewe aanvaar het, het Hy jou sonde so ver van jou verwyder soos die ooste van die weste. Soms oortuig ons onsself dat dit nie op ons van toepassing is nie, of dat ons sonde te erg is. God se liefde vir ons ken egter geen perke nie. Ons hoef nie 'n lewe te lei waar ons onsself veroordeel, die las van die verlede dra, of deur die leuens van die vyand mislei word nie. 

Wanneer jy in ongeloof, haat of vrees verval, breek los uit daardie afwaartse spiraal, raak stil en praat met God. Vertel Hom wat jy voel en ervaar en vra Hom om sy waarheid aan jou te openbaar. Deursoek sy Woord om uit te vind wat die Bybel oor jou omstandigheid te sê het. Die Bybel is vandag nog net so van toepassing as toe dit geskryf is, en daar wag antwoorde vir jou.

Ek leef in vryheid. Nie omdat ek 'n perfekte mens is nie, maar omdat God oppermagtig is en Hy in die Bybel sê dat ek vry van twyfel en vrees kan wees. Sy Woord sê: "... maar hou moed: Ek het die wêreld klaar oorwin" (Johannes 16:33). Ek vertrou sy Woord en dit bepaal my lewe.

Ons is almal vry om saam met God te wandel en 'n noue, persoonlike verhouding met Hom te hê. Ons is vry om sy woord te vertrou en dit in ons lewens toe te pas. Vry om sy genade te aanvaar, vry van 'n ewige skeiding van Hom af, vry van veroordeling. Sy lewe, dood en opstanding vervang alles in ons verlede en in ons toekoms.

Hierdie soort vryheid verander ons uitkyk en verander alles wat ons doen. In plaas daarvan om Hom gereeld aan ons verlede te herinner, kan ons in die vryheid van sy verlossing leef. As ons leer om te leef soos die persoon wat Hy sê ons is, kan ons ophou om vir die wêreld te leef en net vir Hom leef. Ons kan weet ons is met 'n besondere doel geskape. Ons kan weet hoe ons ewigheid gaan lyk en ons bes doen om ander saam met ons soontoe te neem.

As ons met die ewigheid in gedagte leef, hoef ons nie oor die hede angstig te wees nie. Ons kan in vryheid leef en weet dat ons ewige lewe verseker is.