TYDSAAMVoorbeeld

Dag 3: Wees stil

Psalm 37:7a NLV: "Wees stil in die HERE en wag geduldig op Hom.”

Kan jy getuig dat om te wag en geduldig te wees jou beste eienskappe is? Ek kan beslis nie. Die woorde "wag" en "geduldig" vra dat ons vertroue in ons Vader moet plaas en stadig en rustig volgens die pas wat Hý bepaal moet voortgaan. Ons moet in gehoorsaamheid dié woorde indrink in ons siele en stadig verteer.

Ons almal beleef tye wanneer ons geduldig moet wag. Ek wag al jare lank vir sekere situasies om positief te verander en vir probleme om opgelos te word. Ek verstaan nie hoekom dit jare moet neem nie. Ek sal dit nooit verstaan nie máár ek weet wel dat die verloop van hierdie lang wagperiode die verhaal van my tyd saam met God skilder. Daar is baie onbeantwoorde vrae maar ook die besef dat Hy nog altyd by my was.

My truspieël van die lewe vertel baie verhale. Elke verhaal verloop tydsaam saam met Hom en eendag in die hemel in!

Gebed: "Here, ek wil stil wag saam met U. Dit is u hand wat my tyd bepaal."

Terwyl jy hier lees wéét net dat jy nie alleen is nie. God ken jou diepste gedagtes en sal jou nie teleurstel nie.