Hoekom wag?Voorbeeld

My vriendin het my histeries, huilend en radeloos gebel. Drie van haar kinders het op skokkende intense maniere van God af weggestap. Haar gesin was in 'n krisis gedompel.

Ons het dadelik begin bid. Ons het vir hulle beskerming gebid. Ons het gebid dat hulle na God, hul familie en die liggaam van Christus sou terugkeer.

Ons het gereeld vir hulle gebid vir dae, toe weke, toe maande, toe jare. Op 'n stadium was ons saam met ander vroue bymekaar, en ons het die name van al ons kinders neergeskryf en dit voor die Here neergelê, soos wat koning Hiskia in 2 Konings 19, die brief van Sanherib, koning van Assirië, voor die Here neergelê het. Ons het hartseer by God gepleit vir antwoorde uit die hemel.

Wat was ons besig om te doen? Ons het op die Here gewag. Onthou jy die definisie hoe om op die Here te wag? Dit beteken: “om te bid terwyl ek gretig en hoopvol van God verwag om te doen wat net Hy kan doen, terwyl ek doen wat ek kan doen.”

Terwyl ons gebid het, het my vriendin gedoen wat sy kon. Sy het kommunikasielyne met haar kinders oopgehou. Sy het om verskoning gevra vir dinge waarvoor sy om verskoning moes vra. Sy het probeer om hulle te help waar sy kon. Sy het gebid en sy het haar deel gedoen, terwyl sy op God gewag het om te doen wat net Hy kon doen.

Ons getroue, Almagtige God het merkwaardige werk begin doen. Haar kinders het weer met haar begin kommunikeer, sommige vir die eerste keer in 'n baie lang tyd. Van haar kinders het haar selfs om verskoning gevra vir hul rol in die verbrokkeling van hul verhouding. Ander het selfs begin om kerk toe te gaan en begin om oor God te praat!

Alhoewel die pad nog lank was, werk God. God antwoord. Soos ons geleer het, is God altyd die wag werd.

Haar ervaring het ons albei en ook baie ander aangemoedig OM NOOIT MOED TE VERLOOR tydens wagtydperke nie.Ons God hoor ons, selfs wanneer dit lyk asof niks gebeur nie, selfs wanneer dinge lyk asof dit nie beter word nie.

Vandag se leesstuk herinner ons aan hierdie kritiese waarheid. Terwyl ons op die Here wag: “hoop ons nie net vir die beste” of sit ons met “ons hande gevou” nie. Nee! Ons is hoopvol want: “Hy is ons hulp en ons beskermer” (Psalm 33:20). Hy werk, selfs wanneer ons dink niks gebeur nie!

As jy vind dat jy vir God wag om jou te antwoord, onthou dan vandag se Bybelgedeelte. Word vandag bemoedig! Selfs terwyl jy wag, kan jy moed skep en hoop hê!