Spreuke: Die Waarde Van WysheidVoorbeeld

Jou woorde weerspieël jou karakter

Die woorde wat jy sê, spreek boekdele oor jou karakter (Spreuke 10:11, 20). Dit is nie vergesog om te sê dat mense ons siel kan sien elke keer wat ons ons monde oopmaak nie. Gelukkig kan ons, met God se bystand en krag, altyd aanhou probeer om beter te vaar wanneer dit kom by die woorde wat ons kies om te uit te spreek. Spreuke help ons hiermee op drie spesifieke maniere:

Ek kan beter doen: Spreuke leer ons dat ons nie ’n slagoffer van ons woorde is nie. Ek kan kies om beter te praat. God gee vir ons die verantwoordelikheid om reg met ons woorde om te gaan. Spreuke 10:19 sê dat ons soms ons woorde moet tel. Dit is nie maklik nie, maar dit is ’n dissipline wat ’n kind van God móét bemeester. In Psalm 141:3 belowe God dat sy Heilige Gees ons hierin sal lei.

Praat minder: Spreuke 17:27-28 sê iemand met kennis praat nie baie nie. Dit wys ons dat ons moet luister en kies om nie vinnig te reageer nie sodat ons met meer wysheid kan optree. Om meer na ander te luister, is altyd goed vir ál ons verhoudinge.

Die wyse gebruik van woorde begin in ons harte: Spreuke leer ook vir ons dat wyse woorde in die hart begin. Dit is onmoontlik om mooi woorde uit ’n lelike hart voort te bring; in die eerste plek moet jy seker maak jou hart is skoon voordat jy kan verwag jou woorde moet wees. As jy agterkom dat woorde van woede en haat baie vinnig uit jou mond kom, is dit ’n teken dat daar iets in jou hart is wat jy vir God moet oorgee. Wat is daar in jou binneste wat hierdie reaksies veroorsaak? Om jou woorde gesond te maak, moet jy jou hart gesond maak.

Ons woorde dra baie meer krag as wat ons besef. Hulle het amper ’n lewe van hulle eie. Hulle gaan ons soms vooruit en hulle bly voortleef in die harte van ander mense wanneer ons lankal nie meer hier is nie. Kom ons gryp elke geleentheid aan wat ons vandag kry om woorde te sê wat versterk en bemoedig.