Saam Met Jesus in Die BootVoorbeeld

Die waarheid is een lyn lank

Kwinkslae is baie gewild – ek praat nou van daardie kort en kragtige uitsprake van een of ander bekende wat jou anders oor die lewe laat dink. “One-liners” noem die Engelse ouens dit. Jesus self is briljant met sulke kwinkslae oor God en oor die lewe. Daar is in die evangelies te veel om op te noem: “Soek eerste die koninkryk van God, en alles sal vir jou gegee word.” “Wie eerste is, sal laaste wees, en wie laaste is, eerste.” “Bekeer julle, want die koninkryk van God is hier.” “Wie sy lewe wil behou, sal dit verloor, maar wie sy lewe om My ontwil verloor, sal dit behou.”

Jesus se kort en kragtige uitsprake is nie net mooiklinkende woorde, of “goed-voel”-lesse wat bedoel is om op sosiale media gedeel te word nie. Jesus wil elke keer met sy kwinkslag-uitsprake ’n ruim venster op God se nuwe wêreld oopmaak. Sy woorde is uitnodigings om vars en anders te dink oor God en oor die lewe. Dit is uitnodigings om in die Here se spasie en in sy lewegewende verhaal in te beweeg. Jesus wil hê dat ons deur sy oë na die lewe sal kyk. Jesus se woorde is bedoel as kort en kragtige padwysers na God en na mekaar toe. Dit leer ons om te leef met liefde en respek. Luister hierna. Leef dit!