Corrie ten Boom se Kersfeesherinneringe Voorbeeld

Kersfees voor die Oorlogsjare

“Soos die dag toe Midian verslaan is, het U die juk verbreek wat op die volk gedruk het, die stok waarmee hulle geslaan is, waarmee hulle gedryf is" (Jesaja 9:3).   

Desember was altyd 'n baie besige maand vir Betsie en Corrie ten Boom. Hulle het soos 'n span saamgewerk en moes dikwels ongeveer tien verskillende Kersvieringe toespreek. Wanneer hulle genooi is en die kans gekry het, het hulle by jeugklubs, Sondagskole, hospitale, militêre groepe en kerke opgetree.

Hulle het altyd die Kersverhaal uit Lukas 2 bespreek en die Kersverhaal “Vader Martin”, ook bekend as die storie van “Papa Panov”, vertel. Gewoonlik het Corrie Lukas 2 by die eerste feesviering bespreek en Betsie die storie van Vader Martin; die volgende keer het hulle omgeruil en sou Betsie oor Lukas 2 praat en Corrie van Vader Martin vertel. Elke kind teenwoordig het 'n lemoen ontvang. Indien moontlik, is 'n Christelike boekie en 'n boekmerk of 'n plakkaat met 'n Bybelvers daarop en versier met pragtige blomme en voëls, uitgedeel. Natuurlik, volgens 'n goeie ou Nederlandse tradisie, was daar sjokolademelk vir elke besoeker.

Desember was ook 'n baie besige maand in die winkel van die horlosiemaker. Corrie was dikwels baie moeg na 'n volle werksdag. Sy het eenkeer na een van die  Kersvierings gegaan en by haarself getel: “Dit is nommer vier, daar is nog vyf oor en dan is ons deur Kersfees!” Sy het skielik besef dat dit die verkeerde gesindheid is en gebid: “Here, gee my die wonderwerk dat ek nie moeg sal word nie, maar elke Kersviering sal geniet, al is dit die tiende een. Daar is so baie mense wat in donker en duisternis wandel en blydskap en lig en die groot vreugde behoort te ontvang en te ervaar dat U na hierdie wêreld gekom het om ons te red. Sal U asseblief vir ons u vreugde vir elke viering gee sodat ons hierdie vreugde aan ander kan oordra?”

God het in sy genoegsaamheid daardie gebed verhoor, en in die daaropvolgende jare het Betsie en Corrie met groot vreugde die wonder gedeel dat God mens geword het om verlorenes met Homself te versoen deur aan die kruis vir hulle sondes te sterf.

Vraag

Ervaar jy dat die gewoel gedurende Kersfees jou van ware vreugde kan ontneem?

Gebed

Liewe Here Jesus, U is die Een wat ons vreugde sal vermeerder soos dit in Jesaja 9:3 staan. Ons het daardie vreugde nodig en ons wil u koms na die aarde vier en nie so besig raak dat ons net deur die Kersvieringe wil kom, in plaas daarvan om ons te verheug in Wie U is en hoekom U gekom het nie.