In Afwagting van Kersfees: 'n 5-dag AdventleesplanVoorbeeld

Die Opwinding van Hoop

Stel jou voor dis 'n stil, donker nag en jy is in die veld omring deur skape. Skielik verskyn 'n menigte engele en kondig aan dat na 400 jaar se gewag, die hoop van die wêreld opgedaag het — 'n baba wat Immanuel, "God met ons", genoem word. 

Dis so maklik om op al die moeilike omstandighede en ervarings ingestel te wees, veral ná die uitdagings van die afgelope jaar. Advent bied egter vir ons die geleentheid om op God se beloftes te konsentreer en ons oë op Hom gevestig te hou. 

Hierdie Kerstyd dien as 'n herinnering dat ons toegang tot dieselfde hoop het wat die skaapwagters jare gelede gehad het — in die wete dat die God van die heelal neerbuig om ons noodkrete te hoor en ons harte te genees. 

Dit maak nie saak hoe vreesaanjaend of erg die donkerte vir 'n mens voorkom nie, ons kan vertrou dat daar sekerheid is in die beloftes wat in die Woord van God aangeteken is. Kom 'n rukkie tot stilstand en dink na oor God se getrouheid, terwyl ons hierdie Kerstyd ons oë op hoop vestig.

'n Gebed vir Hoop:

Hemelse Vader, 

help my, met Kersfees op hande, om tot stilstand te kom en alles te onthou wat U in my lewe, my familie en my gemeenskap gedoen het.  

Ek prys U omdat U die God is wat red. Ek is dankbaar dat my hoop in U is en nie in omstandighede of mense nie.

Omdat ek my hoop in U stel, is ek vol vertroue dat U u beloftes sal vervul. Herinner my vandag aan dit wat regtig saak maak. Help my om raak te sien hoe U te midde van my afwagting aan die werk is. 

Trek my in hierdie Kerstyd nader aan U en berei my hart voor vir die vervulling van u beloftes.

In die Naam van Jesus.

Amen.