Wonderlik geskape: Ontdek die Identiteit, Liefde en Waarde Waarvoor Jy Geskep isVoorbeeld

Dag 3: Jy is Geskep om God te Verheerlik

Ons leef in 'n kultuur van selfverheerliking. Die pad na geluk blyk geplavei te wees met self-aanbidding en self-bevordering. Ons sien bekendes, atlete en "beïnvloeders" word beloon vir hul selfverheffing, terwyl die res van ons probeer bybly of wonder hoekom ons nie heeltemal goed genoeg is nie. Hierdie leefstyl mag skitter en skyn, maar uiteindelik neem die glans af. Die "houvan's" op jou sosiale media raak minder. Die aandag verskuif na iemand interessanter. Gelukkig is ons vir soveel méér geskep as 'n lewe wat net rondom onsself draai.

Ons ware doel word saamgevat in die "Westminster Shorter Catechism", wat sê dat ons hoofdoel of doelwit is "om God te verheerlik en Hom vir ewig te geniet." As God se beelddraers is ons geskape om God met ons hele lewe te verheerlik, om sy goedheid te geniet en om Hom te ken. 

Ons kan nie aan God se heerlikheid byvoeg of daarvan wegneem nie, maar ons kan Hom vereer, loof en aanbid in ons denke, optrede en verhoudings. Wanneer ons op so 'n manier leef dat die kollig op God skyn, eerder as op onsself, is ons lewend en op ons gelukkigste. Ons lewe doelgerig en vreugdevol.

Wanneer ons ons wegkeer van die fokus op onsself en ons oë na bo rig, leef ons in dankbaarheid teenoor God wat die Gewer is van elke goeie en volmaakte gawe. Ons erken nederig dat ons buiten God niks is nie. Ons begin eers regtig skyn wanneer ons ontspan in die bestemming wat God vir ons het: om deur Christus geliefd te wees, om Hom te verheerlik en ander lief te hê.

Jy is geskep om God te verheerlik en soos jy dit doen sal jy jou ware doel en vrede vind.

Nadenke

Hoe kan jy God verheerlik deur die gawes en passie wat Hy vir jou gegee het?

Gebed

Vader, dankie dat U my in u groter verhaal ingenooi het — om ten volle en tevrede in U te leef. Ek erken dat elke goeie en volmaakte gawe in my lewe van U af kom, en ek neem my voor om U te verheerlik in alles wat ek doen en sê sodat ander van u goedheid en liefde kan weet.