Hier Is Ek, HereVoorbeeld

JOU HELE LEWE LANK

Die transformasie waarvan ons praat, ons geestelike vorming, is ’n proses wat ons lewe lank sal duur. Onthou, ’n geboorte is nie ’n groot einddoel op sigself nie. O nee, dis net die kleinste begin van ’n lewenslange proses van groei en ontwikkeling. So is die nuwe geboorte ook net die klein, meestal onsigbare, begin van die nuwe lewe in jou. Die wind van die Gees doen sy skeppingswerk in jou, soos Jesus dit beskryf, maar die effek daarvan ontplooi vir die res van jou lewe.

Moenie daaroor moedeloos wees nie – die Here is nie. Onthou, ons het ver om te groei: van ’n hoogmoedige en eie-ek-mens tot by “Christus gelykvormigheid”, selfloos en oorgegewe aan God, beskikbaar en bruikbaar in sy hand. Weereens: Dis sý werk, nie joune nie – Hý neem daarvoor verantwoordelikheid. Bly vandag net naby Hom – Hy wil jou in die volgende stap inlei, en jy wil dit nie mis nie!

Vader, my hele lewe behoort aan U. Lei my dag vir dag in u wil in – maak my daagliks meer soos Christus. Amen.