Hier Is Ek, HereVoorbeeld

VAL, MAAR STAAN OP

Ons geestelike groei vind nie gelykmatig opwaarts plaas nie. Nee, dit gebeur met rukke en stote, in seisoene, gekenmerk deur krisisse of groot gebeurtenisse. Dikwels is dit teenspoed of probleemtye wat ons na die Here toe dryf, wat ons die diep lesse leer. Voorspoed, daarenteen, is dikwels sleg vir die geestelike lewe. Soms groei ons deur spesifieke ervarings met God, wat ons in nuwe dimensies inlei, maar ander kere groei ons deur geestelike dissiplines: ritmes en gewoontes wat ons op God gefokus hou.

As ons geestelik struikel, is dit gewoonlik as gevolg van versoekings. Wat doen ons as ons dan geval het? Wel, ons staan bloot weer op! Wat anders? By die Here is daar altyd ’n nuwe begin – Hy breek ’n geknakte riet nie af nie! Het jy geestelik misluk, het jy teruggeval? Het jy vandag berou daaroor? Neem dan jou belydenis na die Here toe en ontvang sy vergifnis. Staan dan op en gaan weer aan. Verhoed egter dat jy val. Vermy versoekings. Sonde is gevaarlik!

Hemelse Vader, ek bely dat ek met sonde worstel. Dit gaan vir my steeds oor my eie behoeftes en begeertes. Help my om totaal oorgegewe te leef! Amen.