ValentynsdagVoorbeeld

STIL

"Die Here jou God is in jou midde,

'n held wat verlos.

Hy verheug Hom met blydskap oor jou,

Hy maak jou stil met sy liefde.

Hy sal oor jou juig met jubelkrete."

– Sefanja 3:17 AFR20

Hierdie Skrifgedeelte is vol kragtige waarhede wat vandag en in die toekoms van toepassing is. Gedurende die laaste paar dae het ons gekyk hoe God sy liefde oorvloediglik aan ons wil oordra en ons nader aan sy hart trek. Vandag kyk ons na ander waarhede uit die teks hierbo wat ook sy hart verteenwoordig. Ons kan op baie dinge fokus, maar ek wil hê ons moet kyk na die frase: "Hy maak jou stil met sy liefde."

Dit maak nie saak wat jy gesê of gedoen het nie, vergifnis is die sleutel om in jou lewe vorentoe te beweeg. Vir baie mense is die vermoë om hulleself of iemand anders te vergewe, die ding wat hulle beperk, hulle verhoed en uiteindelik hulle vooruitgang belemmer. Wanneer ons kies om te vergewe, kies God om te vergeet. Hy vee die blad skoon en besluit om nie langer aan ons sondes te dink nie.

Die Here, die Almagtige, wil jou in sy liefde laat rus, maar is daar iets wat jou verhinder om hierdie liefde te ontvang? Beskuldig die vyand jou van oortredinge of sondes uit die verlede? Die Bybel sê dat as jy jou sonde bely en om vergifnis vra, dan is jy vergewe. Die beskuldiger probeer jou dalk beskuldig en jou aan jou verlede herinner, maar jou hemelse Vader kies om 'n kombers van sy stille liefde om jou te plaas en maak geen melding van jou vorige sondes of oortredinge nie. Hierdie kombers van liefde bedek en beskerm; dit bied veiligheid en sekuriteit teen die beskuldigings uit jou verlede. Die frase: "Hy maak jou stil met sy liefde" kan ook beteken "Hy sal jou vernuwe en jou vrese kalmeer."

Laat sy bevestiging van die waarheid elke vrees tot stilte dwing. As jy stil raak en luister, sal jy Hom hoor sê: "[Ek] sal oor jou juig met jubelkrete." Rus vandag in die wete dat Hy jou liefhet en waarlik die beste vir jou wil hê!

Bid saam met my:

Vader,

Dankie dat u liefde die vermoë het om my te kalmeer en rustig te maak. Dankie dat U my ken en geen aanstoot neem of sonde teen my hou nie. Ek stort vandag my dankbaarheid teenoor U uit en is geëerd dat U my u seun of dogter noem.

In die Naam van Jesus. Amen.

Vir verdere oordenkings van CBN Europa, of om meer uit te vind oor hul bediening, klik hier.