Die Regte GodVoorbeeld

God is soewerein

God is goed. Maar ’n goeie God wat magteloos is in die aangesig van omstandighede sal nie baie mense tot geloof inspireer nie. Wat van ’n goeie God wat regeer oor elke uithoek van die heelal?

Ons God is bo alle dinge, voor alle dinge en onderhou alle dinge.

Dit maak Hom soewerein. Wat beteken dit?

Om soewerein te wees beteken God is nie net een god van vele nie. Hy is die Heer van here, die Koning van konings, die Oppermag en Oppergesag oor elke ander mag en gesag. Hy is nie onderhewig aan die giere van konings en presidente nie, gebonde aan die kinkels van die noodlot of die wette van die heelal nie. Hy is die wet van die heelal.

So sê die Here, die Koning van Israel, sy Verlosser, die Here die Almagtige: Ek is die eerste en Ek is die laaste, buiten My is daar geen God nie (Jesaja 44:6, 1983-vertaling).

As jy dit verstaan, weet jy jy kan Hom heeltemal vertrou.

·  Jy kan vertrou dat sy beloftes nie leë woorde is nie.

·  Jy kan vertrou dat Hy jou gebede hoor en dat Hy die mag het om dit te verhoor, en dit sal doen.

·  Jy kan verseker wees dat Hy al jou dae in sy hande hou.

·  Jy kan hom aanbid, seker dat Hy jou aanbidding waardig is.

·  Jy kan Hom volg as die Here sonder om bang te wees dat jy teleurgestel sal word.

·  Jy kan leef in die sekerheid van sy wysheid, liefde en mag.

Die woord soewereiniteit is dalk nie so warm nie. Maar om die regte God as die heerser van alles te sien, sal jou geloof ’n onwankelbare fondament gee.