Verlos Van SkandeVoorbeeld

Bartimeus en die Skande van Afhanklikheid

Lees: Markus 10:46-52; Psalms 121:1-2; Hebreërs 12:2

SOAP

Hebreërs 12:2

... die oog gevestig op Jesus, die Begin en Voleinder van die geloof. Ter wille van die vreugde wat vir Hom in die vooruitsig was, het Hy die kruis verduur sonder om vir die skande daarvan terug te deins, en Hy sit nou aan die regterkant van die troon van God. 

Oordenking

Die verhaal van Bartimeus is ‘n pragtige verhaal van geloof en genesing. Sy hele lewe lank was Bartimeus blind en is hy soos ‘n buitestander behandel. Bartimeus was van ander afhanklik omdat hy blind was. Toe Jesus verbykom, het Bartimeus na Jesus uitgeroep en vir ontferming gepleit. Die mense het met Bartimeus geraas omdat hy na Hom uitgeroep het. 

Baie het gedink die blinde, gebroke man is nie Jesus se tyd werd nie. Jesus het egter vir Bartimeus genees en daarmee sy mag en deernis getoon. Jesus aanvaar ons net soos ons is, maar hy hou nooit op om ons te vernuwe nie. Niemand verdien God se reddende liefde nie, en tog het Hy ons nogtans verlos.

Wanneer ons, net soos Bartimeus, ons oë op Jesus vestig, kan ons groot vreugde vind. Jesus het voor ons uit gegaan, en die skande en foltering aan die kruis namens ons verduur. Hy het ons die vryheid gegee om ons lewens volkome toegewy aan Hom te leef. Mag ons, soos Bartimeus, die skande of gebrokenheid of sonde wat ons probeer terughou, afgooi en voluit agter Hom aan hardloop. 

Gebed

Here, help my om dankbaar te wees vir die verlossing wat ek het en om ‘n begeerte te hê dat almal gered sal word, selfs hulle wat deur die wêreld onwaardig geag word. Herinner my dat ek u genade nie waardig is nie. Dankie dat U my nogtans met u genade toegooi. Amen.