Die Laaste Lesse: 'n Leesplan vir die Heilige WeekVoorbeeld

Opoffering

Ons begin vandag, die dag voor Palmsondag, die Heilige Week se amptelike begin omdat ons nie die plek waar die Paasverhaal eintlik begin, kan mis nie. 'n Mens moet verby die skare, die donkievul en die palmblare kyk om die verhaal van Maria en haar opoffering raak te sien. Ons begin dus op Saterdag sodat ons gereed is vir Palmsondag.

Vandag begin ons op 'n baie nederiger plek as juigende skares. Ons begin by 'n plek waar ons so gemaklik voel soos aan 'n etenstafel saam met vriende.

Lees Johannes 12:1-8.

Onthou jy hierdie vriende van Jesus? Hier is die agtergrond as jy nie onthou nie: Lasarus se susters was nie baie tevrede dat Jesus so lank gewag het om te kom nadat Hy van Lasarus se siekte gehoor het, wat tot sy dood gelei het nie. Ons sien dat Jesus hartseer was. (Johannes 11:35 sê: "Jesus het gehuil.") Daarna het Hy 'n wonderwerk verrig — Hy het Lasarus uit die dood opgewek!

Hierdie vriende was bekend met die dood, sowel as die opstanding. Lasarus se susters het so pas hulle broer lewendig uit die graf sien kom (Johannes 11:44). Hulle het gesien hoe die onmoontlike moontlik word.

Tydens hierdie aandete het Maria iets besonders gedoen. In Johannes 12:3 lees ons: "Toe het Maria 'n halfliter egte, baie duur nardusolie gebring en dit op Jesus se voete uitgegiet en sy voete met haar hare afgedroog."

Die "duur olie" was nie soos jou gewone parfuum of reukwater nie. Elke kommentaar of Bybel studiegids wat ek gelees het, sê dat dit gelykstaande was aan 'n jaar se salaris.

Dit gaan my verstand te bowe. Ek sukkel om vir God my tiende te gee of 30 minute van my tyd in die oggend saam met Hom of om Sondagoggend saam met my gesin kerk toe te gaan. Dus, om 'n offer gelykstaande aan jou volle jaar se salaris te bring? Beslis nie. Dit kan ek nie doen nie.

Dit is egter waar die Paasverhaal begin — met 'n vrou, 'n vriendin van Jesus, wat iets van waarde gegee het (nardusolie) en haarself verneder het deur Jesus se voete met haar hare te was. Maria het verstaan waaroor dit gaan — Christus verdien ons alles, ons beste.