Jesus, Ons Alles. 'n Studie Van Hebreërs Voorbeeld

Lees: Hebreërs 13:20-25

SOAP: Hebreërs 13:20-21

God wat vrede gee, het ons Here Jesus wat deur die bloed van die ewige verbond die groot Herder van sy kudde is, uit die dood teruggebring. Mag dié God julle toerus met alles wat goed is, sodat julle sy wil kan doen. Mag Hy deur Jesus Christus in ons tot stand bring wat vir Hom aanneemlik is. Aan Hom behoort die heerlikheid tot in alle ewigheid! Amen.

Oordenking

Die skrywer van Hebreërs sluit af met ’n seënbede en gebed vir sy lesers. Hy sluit sy punte en argumente af deur lesers te herinner wie aan bewind is. Dit is God self wat ons toerus om sy wil te doen. 

In die eerste plek, rus God ons toe om sy wil te doen deur Jesus vir ons te gee. Hy het ’n nuwe verbond gestig deur die bloed van Christus wat vir ewig duur; een wat die verbond wat Hy met Israel gesluit het vervang. Jesus is ons voorspraak, ons rus, ons Hoëpriester, ons beter opoffering en ons vrede. Met ons geloof in Jesus het ons alles wat ons nodig het om sy wil te doen. Ons sal nie wegdwaal nie, want dit is God wat ons redding is.

Die boek Hebreërs bied aan ons ’n diepgaande boodskap van rus. Christus is ons opperste rus en in Hom vind ons vrede en ewige veiligheid. Ons kan ophou streef, wetende dat Hy vir ons ’n weg gebaan het. Selfs terwyl ons aanhou groei in ons geloof, rus God ons toe om — deur middel van die Heilige Gees — sy wil te doen en om Hom beter te leer ken. Wat ’n genade!

Gebed

Vader God, ek loof U vir die rus wat U my gee. Ek hoef nie daarna te streef om gered te word, om voor U te staan of dat my geloof sal groei nie, want U is in beheer en rus my toe op my pad. Help my om tot u eer te leef en te berus in die waarheid dat U die werk van verlossing en heiliging vir my doen. In Jesus naam. Amen.