Jesus, Ons Alles. 'n Studie Van Hebreërs Voorbeeld

Lees: Hebreërs 12:1–13

SOAP: Hebreërs 12:1-2

Terwyl ons dan so 'n groot skare geloofsgetuies rondom ons het, laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, die oog gevestig op Jesus, die Begin en Voleinder van die geloof. Ter wille van die vreugde wat vir Hom in die vooruitsig was, het Hy die kruis verduur sonder om vir die skande daarvan terug te deins, en Hy sit nou aan die regterkant van die troon van God.

Oordenking

Die skrywer van Hebreërs skryf van mans en vroue wat dwarsdeur die Bybel vir hulle geloof aangeprys word. Nie een van hierdie mense het die belofte (ewige lewe saam met God) ontvang nie, maar wag net soos ons steeds daarop. Hulle (en ander) helde van die Bybel maak hierdie groot skare van gelowiges uit waarvan daar in Hebreërs 12:1 melding gemaak word. Ons behoort aan ‘n groot vergadering van gelowiges – dié wat nog lewe sowel as hulle wat voor ons geleef het. 

Die hele Hebreër-boek wys na hierdie aansporing. Ter wille van wie Christus is, omdat Hy verhewe is bo die engele, bo Moses, bo die beloofde rus, bo die hoëpriester, bo Melgisedek, bo die verbond, bo die offerstelsel, moet ons op ‘n sekere manier leef en optree. Ons moet bereid wees om swaarkry te verduur, tugtiging te verdra en van sonde weg te vlug omdat ons aan iets groters as onsself behoort. 

As ons sonde ‘n vastrapplek in ons lewe gee, bring dit ons vinnig tot ’n val. Dit laat ons die goedheid van God bevraagteken, dit weerhou ons van volharding, en dit laat ons van ons anker, Christus, wegdryf. Ons moet die sonde afwerp sodra dit in ons lewens insluip. Ons leef vir soveel meer as onsself. Ons lewe moet ‘n getuienis aan die wêreld wees van wie Christus is. Laat ons volhard soos Hy volhard het, en die voorbeelde navolg wat Hy vir ons in sy Woord gee.

Gebed

Here God, help my om te volhard. Laat my nie in sonde vasgevang bly nie, maar laat my dit afwerp wanneer dit my wedloop begin belemmer. Laat my tug verdra, want ek weet u teregwysing is goed. Ek wil die skare gelowiges wat voor my gekom het, waardig wees. Help my om ‘n lewe te lei wat U elke dag eer. In Jesus se Naam, amen.